InfoHub Logo

Buryn bir molda bolypty. Ol únemi el aralap ólimdi jer izdep, janaza shyǵarady eken. Sol elde bir shal tumaýratyp úıinde jatsa, syrtta oınap júrgen balasy álgi moldanyń kele jatqanyn habarlapty. Shal dereý kempirine:

— Maǵan qalyńdap kıim jaýyp, molda kelgende qatty aýyryp qaldy, adamdy áreń tanıdy dep aıt, — dep úıretipti.

Molda úıge kempirmen amanshylyq surasqannan keıin:

— Shalǵa ne boldy? — dep surapty. Kempiri:

— Birneshe kúnnen beri naýqastanyp, adamdy áreń tanıtyn halde jatyr, — depti. Muny estigen molda dereý shaldyń janyna baryp onyń betin ashyp halin surapty. Kózin jumyp jatqan shal bir kózin syǵyraıta ashyp:

— Oı, moldamysyń? Iapyr-aı, kelgenińiz jaqsy boldy ǵoı, men endi adam bolatyn emespin, sóılesetin biraz jumystar bar, — dep moldanyń qulaǵyna sybyrlapty. Molda kempirge:

— Shaldyń aıtatyny bar kórinedi, syrtqa shyǵa tursańyz, — depti. Kempiri shyǵyp ketkennen keıin shal moldaǵa:

— Qudaıymnyń maǵan tiri dúnıeden bergen rızyǵy osy ǵana uqsaıdy. Kóz jumar aldynda sizben keıingi isterdi aqyldasyp qoıaıyn dep otyrmyn. Keıingi janaza, Qurandy qaıtseń bolady, kimder oqysa bolady? — depti aqyl sala. Ol biraz oılanyp jatqannan keıin moldadan taǵy da:

— Dáýirdi kim júrgizse bolady? — dep surapty. Molda:

— Pálen molda júrgizsin.

— Oǵan ne bersek bolady?

— Qurandy kim oqysa bolady?

— Túgen molda oqysyn.

— Oǵan ne berse bolady?

— Bir qoı bersek bolady.

— Janazany kim oqysa bolady? Oǵan ne bersek eken? — depti shal. Molda:

— Men turmyn ǵoı, ózińiz qalaǵanyńyzdy berińiz, — depti.

Sonda shal:

— Álgi jalǵyz atty berem be? Joq buzaýly sıyrdy berem be? — dep surapty. Molda otyryp:

— Buzaýly sıyryńmen balalaryń jan baqsyn, atyńdy berseń boldy ǵoı, — depti. Sonda shal ornynan ushyp turyp:

— Oı, albasty basqyr zalym, men ólsem astymdaǵy jalǵyz atymdy ysqatqa almaqshy ekensiń ǵoı, — dep shap ete túsken eken. Shoshyp ketken molda jaǵasyn ustap:

— Astapyralla, astapyralla, — dep shegine beripti.

---