InfoHub Logo

Qazaqstanda dári-dármek baǵasynyń ósýine tosqaýyl qoıylyp, halyqtyń áleýmettik jaǵdaıy jaqsara túsýi múmkin. Sebebi, endigi ýaqytta áleýmettik mańyzy bar jáne sırek kezdesetin dári-dármekterge Qosymsha qun salyǵy (QQS) alynyp tastalady.

Bul týraly Infohub.kz aqparat agenttigi habarlaıdy.

Dári-dármekke jeńildik jasaldy

Farmasevtıka naryǵy úshin aptanyń basty jańalyǵy – dári-dármekter men medısınalyq buıymdarǵa salynatyn salyq júktemesine qatysty uzaqqa sozylǵan daýlarǵa núkte qoıǵan hattamaǵa qol qoıyldy. QR Premer-Mınıstriniń orynbasary – Ulttyq ekonomıka mınıstri Serik Jumanǵarın sırek kezdesetin jáne áleýmettik mańyzy bar dári-dármekterdi QQS-tan bosatýdy tapsyrdy. Bul jeńildik búkil jetkizý tizbegi boıynsha, ıaǵnı óndirýshiden bastap dárihanadaǵy satý núktesine deıin qoldanylady.

«Atameken» Ulttyq kásipkerler palatasy tóraǵasynyń orynbasary Tımýr Jarkenov bul sheshimdi eldiń dári-dármek qaýipsizdigin qamtamasyz etýdegi strategıalyq qadam dep atady. Onyń aıtýynsha, bul tek bızneske qoldaý kórsetý ǵana emes, naýqastardyń múddesin qorǵaý bolyp tabylady. Ár kezeńdegi salyqtyq aýyrtpalyqty alyp tastaý arqyly, mańyzdy dári-dármekterdiń quny fıskaldyq ózgeristerge baılanysty bolmaıtyndaı jaǵdaı jasalady.

Baǵany anyqtaıtyn jańa júıe

Baǵa belgileý júıesine qatysty taǵy bir mańyzdy ózgeris bar. Jańa hattamaǵa sáıkes, dári-dármekter men medısınalyq buıymdardyń eń joǵary baǵalary endi QQS-ty esepke almaı qalyptastyrylady. Bul salyqtyń ústine salyq qosylyp, áleýmettik jaǵdaıy nashar halyq úshin qoljetimsiz bolyp qalatyn jaǵdaıdy joıady.

Sondaı-aq, shıkizat ımporty máselesi de sheshimin tapty. Endi dári sýbstansıalary men balk-ónimderdiń (odan ári óndirýge arnalǵan daıyn komponentter) maqsatty qoldanylýyn rastaý, óndirýshilerge salyq jeńildikterin paıdalanýǵa múmkindik beredi. Bul sheteldik komponentterge táýeldi otandyq farmzavodtardyń damýyna serpin beredi.

Budan bólek, kedende kedergi bolatyn búrokratıalyq máselelerge de nazar aýdaryldy. Atap aıtqanda, dıagnostıkalyq reagentter men shyǵyn materıaldary úshin 4 tańbaly TN VED kody qoldanylatyn bolady. Buryn jeńildikter tizimindegi anyq emes formýlırovkalarǵa baılanysty salyq organdarymen daýlar týyndap, jetkizilimderdiń keshigýine sebep bolatyn.

Tımýr Jarkenovtiń aıtýynsha, bul jumystar memlekettik organdarmen tyǵyz dıalogta júrgizildi. Densaýlyq saqtaý mınıstrligine, Qarjy mınıstrligimen jáne Ulttyq ekonomıka mınıstrligimen birlesip, birqatar úkimet qaýlylaryna túzetýler engizýge úsh apta merzim berildi.

Kóktemniń basyna qaraı, baǵa men ústemeaqyny retteý erejelerin qamtıtyn normatıvtik baza tolyq jańartylýy tıis. Bul qarapaıym tutynýshy úshin ómirlik mańyzy bar dári-dármekterdiń qoljetimdiligin saqtaıtynyn bildiredi.