InfoHub Logo

Eljas taǵy qyrǵa barmaq edi. Ákesi jumys kıimin kıip jatyp: «Men túnde júrem, sýyq bolady, tońasyń!» — dep aqyl aıtty. Sóıtti de jap-jańa traktordy otalǵyzyp, júrip ketti. Ol uzaryńqyraǵan kezde balasy sońynan júgirdi. Osy ótkende ony bir ret amalsyzdan mingizip áketken. Eljas jerdi qalaı jyrtqanyn kórip qaıtqan. Búgin de solaı joly bolar dep oılady. Biraq ákesi traktordyń júrisin shapshańdatyp, kóldi jaǵalaı qyrdan asyp, kórinbeı ketti.

Bala otyra qalyp, doldana jylaı berdi. Kóktem kúni tas tóbede tur. Jap-jasyl qyrdyń ústinde saǵym oınaıdy. Balanyń jasqa toly kózi de buldyraıdy. Eljasty tabalaǵandaı ala qanat qyzǵyshtar túıilip ótedi. «Tú-ýıt» degen shińkildek daýystarymen kóldegi bar qustarǵa jar salady. «Myna tyńdaýsyz tentek balany qarańdar!» — dep mazaqtaǵandaı bolady.

Bala qyzǵyshtyń ketik-ketik qara qanattaryn taldap julyp tastaǵysy keledi. Taqıasyn laqtyrdy, tımeı ketti. Oǵan toqtalǵan qyzǵyshtar joq, úsheý-tórteý bolyp kóbeıip aldy. Olar kól basyn shýǵa toltyryp, aldy-artyn orady. Balanyń aıaq astyndaǵy sarǵylt seleý qybyr ete qaldy. Shekesinde aıdary bar qońyr qus shópteı jińishke aıaqtarymen qazdańdap júgire jóneldi. Eljas bas salyp ustap aldy, qýandy, úıine aparmaqshy boldy. Balapan Eljastyń qolyn tyrnady, bizdeı tumsyǵymen shuqylady, janushyra shıqyldady. Júregi tars-turs urdy, qalsh-qalsh etti.

Osy kezde ana qyzǵysh Eljastyń basyn tyrnap ótti, basqalary da túıildi. Eljas qyzǵyshty da, onyń shı aıaq balapanyn da aıap ketti. Bosatyp qoıa berdi. Balapan súrine-qabyna júgirip barady. Bala kúlip jiberdi. «Qustyń balapanyna tıme» degen ájesiniń aqyly esine túsip, «osylaı etkenim durys bolar» dedi ol qýanyp.

---