InfoHub Logo

Jazǵy tań erte atsa da kún áli kóterilgen joq. Aspan ashyq. Aınala tym-tyrys. Álemge nuryn shashar Kún sulýdy asyǵa, saltanatpen kútip tur. Kóp uzamaı rahman nuryn tógip Kún shyǵa bastady.

— Alaqaı, Kún shyǵyp keledi, Kún! — dedi bar dúnıe shattanyp. Kúndi maqtap bulbuldar saırady, boztorǵaılar shyryldady. «Altyn Kún-aı, qýatyńmen býsandyrdyń-aý!» — dep jumyr jer jatyr. Shóp basyna tizilgen móldir shyq maıdaı erip, býǵa aınalyp barady. Jer ústi munartyp tur.

«Biz Kúnniń syryn bilgimiz keledi. Kerek deseń, qalaı shyǵyp, qaı tusqa baryp batatynyna deıin baqylaıyq» desip, egiz bult Kúnniń sońynan ilese jyljydy. Sóıtip Kúnge erip, uzaq  sapar shekti. Bıik taýlar men jazyq dala, shalqar kól men muhıttardyń ústimen jyljydy. Kenet ózderi býǵa aınalǵan egis dalasynyń tusynan ótip bara jatyp:

— Alaqaı, týǵan jerdiń ústinen ótip baramyz.

— Beker bolar.

— Qarashy óziń, keshe bultqa aınalǵan jerimiz.

— Kún birazdan keıin batady, — dedi bireýi.

Sóıtip áńgime-dúken quryp kele jatqanda ózderi sıaqty usaq bulttar jınalyp kelip, qalyń bultqa aınalyp, bir-birine soqtyǵysyp, najaǵaı oınady, jel turyp, jańbyr nóserletti. Egindi dala rahattana tynystap jatyr.

Bul kezde Kún kózi sonaý batysqa qaraı jyljyp bara jatqan.

— Birden qutylyp kete almaısyń, qonaqtaǵanyńdy kóremiz, — desti bulttar.

Egiz bult Kúnniń sońynan ilese berdi. Sóıtse, Kún jerdi aınalyp júre beredi eken de, bir jerde tún bolǵanda ekinshi jerde tań atyp, dúnıe almasyp turady eken.

Kúnmen birge aınalǵan egiz bult Alataýdyń shyńyna kelip, az-kem dem aldy. Altyn Kún meıirlene nuryn tógip tur. Sóıtse, Kún eshqashan da qonaqtamaıdy eken, únemi aınalysta eken-aý…

---