InfoHub Logo

Baıaǵyda bir kishkentaı qyz bolypty. Onyń jalǵyz sheshesi bar eken. Sheshesi ekeýiniń turmystary nashar bolady. Keıde, tipti úılerinde isherge as tabylmaı qalady.

Birde qyz ormanda serýendep júredi. Ol sonda qart ájeıdi jolyqtyrady. Ájeı qyzdyń basyndaǵy aýyr jaǵdaıdy estigen soń, oǵan túbi jalpaq, aýyzy keń qumyra beredi.

Mine, qyzyq! Qumyranyń sıqyry bar eken. Oǵan tek «Qumyra, as pisir!» deseń bolǵany, sol sátinde búlk-búlk qaınap, dámi til úıirer bıdaı botqasyn daıyndaı bastaıdy. Al «Qumyra, oqtaı ǵoı!» deseń, qaınaǵanyn toqtata qoıady.

Qyz qýanyp, sıqyrly qumyrany úıine alyp keledi. Sol kúnnen bastap sheshesi ekeýi ashtyq pen kedeıshiliktiń ne ekenin umytady. Olar qaryndary asha bastasa bolǵany, qumyra daıyndaǵan tátti botqaǵa toıyp alady.

Kúnderdiń kúninde qyz ormanǵa serýendeýge shyǵyp ketedi. Sheshesi ony aryberi kútedi. Qyzy keshikken soń, botqa jegisi kelip:

— Qumyra, as pisir! — deıdi.

Sıqyrly qumyra búlkildep qaınap, bıdaı botqasyn pisire bastaıdy. Áıel ony maqtaı-maqtaı, dámine tamsana otyryp, ábden jeıdi. Endi toqtataıyn dese, qandaı sóz aıtý kerek ekenin umytyp qalypty. Qumyra pisirip jatyr, pisirip jatyr. Tipti, bir kezde kópirip, erneýinen asyp, tógile bastaıdy.

Sálden soń as úıdiń ishi botqaǵa tolady. Odan ábden kópirshigen botqa búkil bólmelerge jaıylady. Qumyra sharshaıtyn emes. Birazdan soń botqa kórshi úıdi, odan ári búkil kósheni basyp qalady. Muny toqtatýdyń jolyn eshkim taba almaıdy.

Bir ýaqytta, botqa eń sońǵy úıge jetken kezde, qyz da oralady. Ol:

— Qumyra, toqtaı ǵoı! — dep aıǵaı salady, qumyra basyla qalady.

Osy oqıǵadan soń qalaǵa kirgisi kelgen árbir adam botqa jep, ózine jol ashatyn bolypty.

---