InfoHub Logo

Táýelsiz el - eshkimge baǵynbaıtyn, óz zańy men ózine tán rámizderi bar memleket. Ol –jaratqannyń bergen baǵy. Al, bizdiń elge mundaı baq jıyrma toǵyz jyl buryn buıyrdy. Iaǵnı, 1991jyldyń 16 jeltoqsany «táýelsizdik» degen uly sózdi aınymas serik qylyp, bolashaqqa degen senimmen qaraǵan kún. Kók týy men eltańbaǵa qarap-aq Uly dala eliniń bolashaǵyna alańdaıtyn jóni joq sıaqty.

Táýelsizdigim – týymmen tuǵyrly. Týdy qurmetteý, qasterleý el azamattarynyń esten shyǵarýǵa bolmaıtyn paryzy. Qazaqstannyń memlekettik týy 1992 jyldyń 4 maýsymynda qabyldandy, avtory belgili sýretshi Sháken Nıazbekov. Al tarıhta týdyń róli erekshe bolǵan. Aıtalyq, eki el soǵysqanda sarbazdar týdy qulatýǵa tyrysqan. Sebebi, týdyń qulaýy jeńilisti, al qarsylastyń qamalyna tigilýi jeńisti bildirgen. «Jaý júrek myń bala» fılmin bilmeıtin qazaq joq shyǵar. Atalmysh kınotýyndynyń sońǵy mınýttarynda jaýynger myń balany basqarǵan Sartaı batyr denesin oq qushsa da, jaraly bolsa da qalmaqtardyń týyn qulatady emes pe?! Sonda, jalaýynyń jelbiremeı jerde jatqanyn kórgen jońǵarlar birden sheginip, tentireı qashpaýshy ma edi?! Taǵy bir qazaq tarıhynda, álem tarıhynda máńgi qalatyn oqıǵa bar.  Ol – Uly Otan soǵysynyń qaharmany Raqymjan Qoshqarbaevtyń Reıhstagqa tý tigýi. Jıyrma jastaǵy qazaq qyranynyń «Gıtler úıiniń» tóbesine óz Otanynyń týyn tigýi erliktiń eń bedeldisi edi. «Reıhstagqa tý tikken - qazaq Raqymjan Qoshqarbaev» degen sózder tarıh sahnasynda máńgi qalary sózsiz. Mine, týdyń qadiri men qudyretin ata-babalarymyz salǵan sara joldan-aq kórýge bolady.

Táýelsizdigim – eltańbammen eńseli, ánuranymmen aıbatty. Egemendi el bolǵannan soń eltańbamyz ben ánuranymyz da jaryq kórdi. 1992jyly qazaqstandyqtar arasynda memlekettik rámizderdiń jobasyn jasaý týraly baıqaý ótedi. Sol baıqaýda týdyń 1200 túrli nusqasy, eltańbanyń 245 jobasy, ánurannyń 750 túri usynylǵan eken. Shota Ýálıhanov pen Jandarbek Málibekovtyń týyndysy búgingi kúni Qazaqstannyń sımvolyna aınalǵan Memlekettik Eltańbamyz atandy. Eltańbamyzdyń mán maǵynasyn ashyp aıtpasaq ta, bárimiz bilemiz. Qanattarynda bıdaıdyń sabaǵy beınelengen qos pyraq – molshylyqtyń, dáýlettiliktiń, jan-jaǵyn aınala qorshaǵan ýyqtar dál ortada turǵan shańyraqqa jıylyp – birliktiń, tóbesindegi juldyz ben kógildir aspan – máńgilik táýelsizdiktiń belgisi. Bir ǵana eltańbamyzda tutas bir ultty, tarıhy taǵylymǵa toly halyqty beıneleıtin kórinis jatyr. Eltańbaǵa qarap-aq jigerlenip, eńseni tiktep alýǵa ábden bolady. Al Memlekettik Ánurannyń jóni bólek. Batyrlan urandy jaýǵa shapqanda rýhyn kóterý úshin aıtqanyn ádebıet aıqyndap bergen. Ánin aty ańyzǵa aınalǵan kompozıto Shámshi Qaldaıaqov jazsa, óleńiniń avttorlary aqıyq aqyn Jumeken Nájimedenov pen Nursultan Nazarbaev. Eshkimge tanys emes ándi alǵash shyrqaǵandar, 1986 jyly alańǵa shyqqan qazaqtyń jalyndy jastary edi. Oń qoldy keýdeniń sol jaǵyna júrek tusyna qoıyp ánurandy shyrqaǵanda, kimniń de bolsyn boıy shymyrlap, erekshe sezimge bólenetini anyq. Otanymyzdyń atyn shyǵaryp júrgen sportshylarymyz da uranymyzdy álemge áıgili etip júr. Mine, Qazaqstan Respýblıkasynyń Memlekettik Ánuranyna 28 jyl.

Búgingi tańda Qazaq eliniń táýelsiz el atanǵanyna 29 jyl tolǵanymen,  kóptegen qazaq otbasylary táýelsizdigimizden buryn jańa jylǵa belsene daıyndalyp, 16 jeltoqsannan  attap ketýde. Qazirgi zamanda jasóspirim balalar tálim- tárbıeni otbasydan ǵana emes qoǵamnan da alyp júr. Qolymyzǵa qonǵan táýelsizdiktiń  baq qusyn ushyryp almaı berik ustaýymyz úshin,ósip kele jatqan jas urpaqqa táýelsizdik úshin ata babalarymyz qalaı kúreskendegigi jaıly tereń túsindirý qajet. 

Egemendikke qol jetkizip, urpaqqa qazyna etip qaldyrǵan babalardyń eńbegi eren. Táýelsizdiktiń kók aspanynda týymyzdy jelbiretip, eltańbamyzdy qasterlep, ánuranymyzdy shyrqap ótý bizdiń paryzymyz dep túsinemin. Bul – babalar amanaty, al amanatqa qıanat jasaǵan halyq ońbaıdy.

Ál-Farabı atyndaǵy QazUÝ, aǵa oqytýshysy Týngatova Ý.A,                  

Dintaný mamandyǵynyń stýdenti Razbekova M.K

---