InfoHub Logo

Shymkent metalýrgıa zaýytynyń basshylyǵy polısıanyń áreketine qatysty jańa málimdeme jasap, zaýytqa jasalǵan zańsyz reıdtiń uıymdastyrýshylary áli jazalanbaǵanyn aıtty. Bul týraly kompanıanyń baspasóz qyzmeti habarlady.

Buǵan deıin Sin YuanSteel kompanıasy Shymkent polısıasynyń uıymdasqan qylmysqa qarsy kúres basqarmasynyń qyzmetkerleri sot sanksıasynsyz zaýyt aýmaǵyna kirgenin málimdegen bolatyn. Quqyq qorǵaý organdary Ózbekstannan belgisiz bireýdiń habarlap, kásiporyn aýmaǵynda Qytaıdan kelgen eńbek mıgranttaryn kúshpen ustap otyrǵany týraly aqparat bergenin alǵa tartqan. Alaıda, TOO kompanıasy Qazaqstanda zańdy túrde turýǵa barlyq ruqsaty bar ondaǵan qyzmetkeriniń zańsyz ustalǵanyn aıtqan edi.

Bul málimdemege Bas prokýratýra reaksıa bildirip, ınvestısıalyq prokýrorlar sotqa deıingi tergeýdi bastady.

Sin YuanSteel kompanıasynyń basshylyǵy jańa málimdemesinde ustalǵan qyzmetkerlerdiń bosatylǵanyn, biraq zańsyz reıdti uıymdastyrǵandardyń jaýapsyz qalǵanyn atap ótti.

«Bas prokýratýranyń ýaqtyly úılestirýiniń arqasynda zańsyz ustalǵan qyzmetkerlerimiz bosatylyp, tárkilengen tólqujattarymyz qaıtaryldy. Bul bizdiń qyzmetkerlerimizdiń quqyqtaryn tolyq qorǵady, osy úshin alǵysymyzdy bildiremiz. Alaıda, oqıǵanyń negizgi sebepteri áli de ashylmaǵan jáne kináli tulǵalar jaýapqa tartylmaǵan», - dedi Sin YuanSteel kompanıasynyń teń quryltaıshysy Ke Súún.

Onyń aıtýynsha, polısıanyń áreketi saldarynan óndiristik úderis toqtap, kompanıaǵa aıtarlyqtaı shyǵyn kelgen. Ustalǵandardyń arasynda 30 mıllıon dollarǵa jýyq ınvestısıa salýdy josparlaǵan eki áleýetti seriktes bolǵan.

«Polısıanyń áreketinen tikeleı ekonomıkalyq shyǵynymyz 200 myń dollardy qurady, janama shyǵyn 500 myń dollarǵa jetti. Sonymen qatar, memleket 200 myń dollar kóleminde salyq kirisinen qaǵyldy. Bul kásiporynnyń damýyna jáne jergilikti ekonomıkaǵa eleýli zıan keltirdi», - dedi Ke Súún.

Zaýyt basshylyǵy Bas prokýrordyń nazaryn bul jaǵdaıǵa aýdarýdy surap, zańsyz reıdtiń bastamashylary men uıymdastyrýshylaryn anyqtap, qyzmet babyn teris paıdalanǵan tulǵalardy jaýapqa tartýdy talap etti.

«QR Qylmystyq kodeksiniń 362-baby, ıaǵnı «Qatygezdik nemese qyzmettik ókilettikti asyra paıdalaný» boıynsha qylmystyq is tirkeldi. Bul jaı ǵana qatelik emes, kásiporyndy reıderlik jolmen basyp alýǵa baǵyttalǵan áreket nemese odan da tereń maqsattar kózdelgen bolýy múmkin dep sanaımyz. Zańnamada qarastyrylǵandaı, tolyqqandy tergeý júrgizilýin talap etemiz», - dedi advokat Marat Baızaqov.

Ol kompanıanyń qyzmetiniń ashyqtyǵyn jáne barlyq salyq tekserýlerinen ótip jatqanyn atap ótti.

Sin YuanSteel – qazaqstandyq-qytaılyq bolat quıý zaýyty. Kompanıa 2016 jyly ashylǵan. Óndiristik keshen «Amır-A» JSHS bazasynda «Ońtústik» ındýstrıaldy aımaǵynda qurylǵan.