InfoHub Logo

"Táýelsizdiktiń tarıhı jylnamasy"
Maqsaty: Qazaqstan Respýblıkasynyń táýelsizdikke jetý jolyndaǵy aıshyqty isine sholý jasap, túsinik berý. Oqýshylardyń oılaý qabileti men sóıleý mádenıetin jetildirý. Eline, jerine degen súıispenshiligin arttyrý. Tarıhty baǵalaı bilýge úırete otyryp, ultjandy azamat etip tárbıeleý.

Kórnekiligi: Qazaqstan Respýblıkasynyń rámizderi, el jaqsylarynyń sýretteri, jyldar hronologıasy, slaıdtar.

Barysy:
1.«Táýelsizdik – bizge ońaı kelgen joq» (táýelsizdik shejiresi)
2. «Meniń Otanym – Qazaqstan» (búgingi Qazaqstannyń kelbeti)
3. «Men elimniń – bolashaǵymyn» (keleshekke boljam)
İ júrgizýshi: Ánuranym - januranym,
Sóıler sózim, shyrqar ánim.
Máńgi baqı shyrqalady,
Respýblıka ánurany!
(Qazaqstan Respýblıkasynyń memlekettik gımni)

İİ júrgizýshi: Qazaqstannyń jańa dáýirde qol jetkizgen barlyq tabysynyń qaınar kózi - Táýelsizdik. Táýelsiz el bolǵanymyzdyń arqasynda ǵana Qazaqstannyń sózi men isin búkil álem tanydy. D tyndyra alatynyn, óresi myqty, órisi keń halyq ekenin álem bildi. Qazaqstannyń bıik tabysyna qol jetkizgen prezıdenttik bılik jáne onyń basynda úzdiksiz bolǵan Elbasy Nursultan Nazarbaevtyń jeke faktory ekendigine eshkim kúmándana almaıdy.
İ júrgizýshi: Bizdiń Otanymyz - Táýelsiz Qazaqstan. Qazaq halqy Reseı ımperıasyna bodan bolyp, 1731 - 1917 jyldar arasynda Otanymyz patshaly Reseı boldy. 1917 - 1991 jyldary Otanymyz KSRO edi. Osy bir táýelsizdik bizdiń halyqqa tegin kelgen joq. Talaı urpaq zar jylap, japa shekti, ómirleri óksikpen ótti. Tarıhty zerdelep qarasaq, qazaq halqy - uly halyq. Biz qazaq bolǵanymyzdy maqtan ete alatyn baqytty jandarmyz.
Endi sol táýelsizdik jolyndaǵy tarıh betterine úńilip, oı zerdesinen ótkizeıik.

(Slaıd kórsetiledi)

İİ júrgizýshi: Araǵa alasapyrandy ǵasyrlar men almaǵaıyp kezeńderdiń tezin salyp, azamattyq tańymen qaıtyp oralǵan aqjoltaı ǵuryp boıynsha memleket basshysy ant berip, el bıligi tizginin qolǵa alǵan kúni, ıaǵnı, 1991 jyldyń 10 jeltoqsanynda Joǵary Keńes sesıasy respýblıkanyń ashshy ishekteı shubatylǵan resmı ataýynan "keńestik", "sosıalısik" degen sózderdi alyp tastap, "Qazaqstan Respýblıkasy" dep ózgertti. Sodan kóp uzamaı, bir aptanyń bederinde respýblıka Joǵary keńesiniń jetinshi sesıasy "Qazaqstan Respýblıkasynyń Memlekettik táýelsizdigi týraly" zań qabyldady. Dál osy kúni, 1991 jyldyń 16 jeltoqsanynda ulttyq ataýynyń ózi "bostan", "azat" sózderiniń sınonımindeı Qazaq mıllaty aspan asty, jer ústinde óziniń eshkimge kiriptar emes, derbes damý jolyn tańdaǵan, baıtaǵy tutas, shekarasy bólinbeıtin biregeı, halyqaralyq qatynasta teń quqylyq qaǵıdatyn ustanatyn demokratıalyq - quqyqtyq, zaıyrly, ýnıtarlyq memleket qurǵanyn saltanatpen jarıa etti. Dál osy kúni... Iá, osy kúni ısi qazaqtyń ólgeni tirilip, óshkeni oıandy. Kóksegeni kelip, kókeıdegisi oryndaldy. Mereıi ósip, mártebesi bıiktedi.

İ júrgizýshi: Rasynda da ulys muńy, urpaq qamy úshin "kúndiz kúlki, túnde uıqy kórmegen" baıyrǵy babalar - Bilge qaǵan men Tonykók abyzdardan beri tartyp, kúni keshe 1986 jylǵy jeltoqsannyń yzǵarynda tóbeden tas domalatqandaı Ortalyqtyń óktemdigine, saıası ozbyrlyǵyna tózbeı azamattyqtyń ánin shyrqaı alańǵa atoılap shyqqan órimdeı jastardy - qara kóz, aq júrek, namysqoı ul - qyzdardy jaryq dúnıege ákelgen qazaq ultynyń besmyńjyldyqta bastan keshkenderiniń bári - búgingi Táýelsizdigimizdiń tutas tarıhy, shynjyr lekti shejiresi edi.

İİ júrgizýshi: Jalpaq dala tóbesinde shańyraq kóterip, ýyǵyn shanshyǵan, ulttyq memlekettiliktiń bastaýyna balaǵan Qazaq Ordasynyń eki jarym ǵasyrlyq tarıhy eldik múdde úshin aıanbaı aıqasqan jaýbasar erliktiń, dushpan qarasyn bastap asyrmaǵan azamattyq órliktiń ónegeli baıany ispetti.

"Biz myńǵyrtyp mal baqqan elmiz,
Júırik jaratyp, jelige bıe baılatqan elmiz.
Dám - tuzdy aqtaı bilgen,
Syılastyqty saqtaı bilgen,
Eshkimge soqtyqpaı jaı jatqan elmiz!
Tórimizden qut - bereke qashpasyn dep,
Jerimizdiń shetin jaý baspasyn dep,
Týyrlyqqa tý ilip,
Qynnan qylysh sýyryp,
Kók naızanyń ushyna kúlteli úki taqqan elmiz!
Dushpanǵa bas urmaǵan elmiz,
Basymyzdan sóz asyrmaǵan elmiz!
Astamsyǵan jaý bolsa,
Sóz uqpaıtyn pań bolsa,
Qanǵa qan, janǵa jan
Alatynymyzdy jasyrmaǵan elmiz!
Atadan ul qul bolamyn dep týmaıdy,
Anadan qyz kúń bolamyn dep týmaıdy.
Jerdi naqaq talatyp,
Eldi jerge qaratyp ótkennen, ólgendi artyq sanap,
Erliktiń qutyn qashyrmaǵan elmiz!"-, degen Qazybek bı sózinen Altaıdan Atyraýǵa deıingi kósilgen alyp keńistiktegi ejelden erkin jaılaǵan ulttyń asqaq rýhy men adamshylyq parqy, asaý bolmysy men adal paıymy aıqyn ańǵarylyp tur.