InfoHub Logo

شىعىس قازاقستان وبلىسىندا 13 جاستاعى كامەلەتكە تولماعان قىزبەن جىنىستىق قاتىناس جاساعان ەر ادامعا قاتىستى سوت ۇكىمى شىقتى. قىزدىڭ تۋىستارى بۇل جازانىڭ تىم جەڭىل ەكەنىن ايتىپ، نارازىلىق بىلدىرۋدە.

بۇل تۋرالى Infohub.kz اقپارات اگەنتتىگى حابارلايدى.

وقيعا 2025 جىلى 20 قازاندا قاتونقاراعاي اۋدانىندا بولعان. 1995 جىلى تۋعان ەر ادام Lada Granta اۆتوكولىگىمەن ءبىر اۋىلدان ەكىنشى اۋىلعا كەلگەن. ول كامەلەتكە تولماعان قىزبەن كەزدەسۋدى الدىن الا جوسپارلاپ، ونى كولىككە وتىرعىزىپ، اڭگىمەلەسكەن. كەيىن قىزدىڭ كەلىسىمىمەن جىنىستىق قاتىناسقا تۇسكەندىگى ايتىلادى.

تۋىستارىنىڭ نۇسقاسى

الايدا، جابىرلەنۋشىنىڭ تۋىستارى مۇنى جوققا شىعارادى. قىزدىڭ اناسى ينديرانىڭ ايتۋىنشا، ەر ادام قىزىنا شىرىن مەن كرۋاسسان ساتىپ الىپ بەرگەن سوڭ، ونى ۇيىنە اپارۋعا ۋادە بەرگەن. ءبىراق جولدا، ەكى اۋىلدىڭ اراسىنداعى دالادا كولىكتى توقتاتىپ، قىزىنىڭ تەلەفونىن تارتىپ الىپ، ءوشىرىپ تاستاعان. سودان كەيىن ونى زورلاعان.

«قىزىم العاشىندا قورقىپ، ەشتەڭە ايتپادى. كەيىن مەن بىلگەن سوڭ، ۋچاسكەلىك پوليسياعا باردىم. بىرگە گينەكولوگقا تەكسەرۋگە باردىق، سوندا ءبارى راستالدى»، دەيدى اناسى.

ونىڭ سوزىنشە، سوت پروسەسى كەزىندە قىزى قورقىتىلىپ، كورسەتىمدەرىن وزگەرتكەن. قىز ءبارىنىڭ ءوزارا كەلىسىم بويىنشا بولعانىن ايتقان. ءبىراق ۇيدە باسقاشا بايانداعان.

سوت ۇكىمى جانە ونىڭ سەبەپتەرى

30 جاستاعى ەر ادامعا قاتىستى قىلمىستىق ءىس قازاقستان رەسپۋبليكاسى قىلمىستىق كودەكسىنىڭ 120-بابى 4-بولىگى بويىنشا سوتقا تۇسكەن. بۇل – زورلىق-زومبىلىق قولدانىپ، جابىرلەنۋشىنىڭ دارمەنسىز جاعدايىن پايدالانىپ، كامەلەتكە تولماعانمەن جىنىستىق قاتىناس جاساۋ.

الايدا، سوت ءىستى 120-باپتان 122-باپ 1-بولىگىنە اۋىستىردى. ياعني، ون التى جاسقا تولماعان اداممەن جىنىستىق قاتىناس جاساۋ. ەر ادامعا ەكى جىل باس بوستاندىعىنان ايىرۋ جازاسى تاعايىندالدى. ول ءبىر جىلدى تەرگەۋ يزولياتورىندا وتكىزگەن، سوندىقتان جاقىن ارادا بوستاندىققا شىعۋى مۇمكىن.

سوتتىڭ بۇل شەشىمىنە ەر ادامنىڭ كىناسىن مويىنداپ، وكىنگەندىگى جۇمسارتۋشى جاعداي رەتىندە اسەر ەتكەن. سوت ءتوراعاسى ەرىك قويانبايەۆتىڭ ايتۋىنشا، زاڭ بويىنشا ودان ارتىق جازا بەرۋ مۇمكىن بولماعان.

قۇقىق قورعاۋشىلاردىڭ پىكىرى

شىعىس قازاقستان وبلىسى بويىنشا بالا قۇقىقتارى جونىندەگى ۋاكىلى اقسانا كالەنوۆانىڭ ايتۋىنشا، قىلمىستىق زاڭنامادا كەمشىلىكتەر بار. ونىڭ پىكىرىنشە، 16 جاستاعى ءجاسوسپىرىم مەن 15 جاستاعى قىزدىڭ قارىم-قاتىناسى مەن 30 جاستاعى ەر ادامنىڭ 13 جاستاعى قىزبەن قاتىناسى بىردەي قاراستىرىلادى. بۇل ەكى ءتۇرلى جاعداي بولعانىمەن، جازا بىردەي.

«قىلمىستىق زاڭنامانى وزگەرتۋ قاجەت. جاسى ۇلكەن ادامدارعا قاتىستى جازانى قاتايتۋ كەرەك. جاسوسپىرىمدەر مۇنداي ارەكەتتەردىڭ ءمان-ماعىناسىن تولىق تۇسىنبەۋى مۇمكىن»، دەيدى ول.

ول سونداي-اق، كامەلەتكە تولماعانداردى ازعىرۋ قىلمىسى 7 جىلدان 12 جىلعا دەيىن باس بوستاندىعىنان ايىرۋدى كوزدەيتىنىن، ال وندا تەك ازعىرۋ ارەكەتتەرى عانا قاراستىرىلاتىنىن اتاپ ءوتتى. ال جىنىستىق قاتىناس جاسالعان جاعدايدا جازا 5 جىلعا دەيىن عانا بەرىلەدى. بۇل ارادا سايكەسسىزدىك بار.

جابىرلەنۋشىنىڭ تۋىستارىنىڭ تالابى

قىزدىڭ تۋىستارى سوت ۇكىمىمەن كەلىسپەي، جازانى قاتايتۋدى تالاپ ەتەدى. «ەكى جىل – بۇل وتە از مەرزىم. ول تەك ءبىر جىل ءتورت اي وتىرىپ شىعادى. قىزىمىزعا نەبارى 13 جاس. ءبىز ادىلدىك ىزدەيمىز!» دەيدى جابىرلەنۋشىنىڭ اپكەسى ازيزا.

قازىرگى تاڭدا سوت ۇكىمى زاڭدى كۇشىنە ەنگەن جوق جانە اپەللياسيالىق ساتىدا قارالۋدا.