InfoHub Logo

قازاقستاندا 2026 جىلدىڭ 1 قاڭتارىنان كولىك سالىعىن ەسەپتەۋ ءتارتىبى جاڭارادى. بۇل وزگەرىستەر اۆتوكولىك يەلەرىنىڭ جىلدىق تولەمىنە جانە سالىق ەسەپتىلىگىنىڭ راسىمىنە تىكەلەي ىقپال ەتەدى.

بۇل تۋرالى Infohub.kz اقپارات اگەنتتىگى حابارلايدى.

ەسكى اۆتوموبيلدەرگە تومەندەتكىش كوەففيسيەنت

قارجى مينيسترلىگى مەملەكەتتىك كىرىستەر كوميتەتىنىڭ مالىمەتىنشە، جەڭىل اۆتوكولىكتەر ءۇشىن پايدالانىلعان مەرزىمىنە قاراي تومەندەتكىش كوەففيسيەنت ەنگىزىلەدى. ناقتىراق ايتقاندا، پايدالانۋ مەرزىمى 10–20 جىل ارالىعىنداعى كولىكتەرگە — 0،7، ال 20 جىلدان اسقاندارىنا — 0،5 كوەففيسيەنتى قولدانىلادى. سالىق جىل قورىتىندىسىمەن تولەنەتىندىكتەن، 2026 جىل ءۇشىن ەسەپتەلگەن سوما 2027 جىلى تولەنەدى.

3 000 سم³-تەن جوعارى قوزعالتقىشتارعا قاتىستى جەكە ستاۆكالار الىندى

3 000 تەكشە سانتيمەتردەن جوعارى قوزعالتقىش كولەمى بار جەڭىل كولىكتەرگە قاتىستى بۇرىن كوزدەلگەن جەكە ستاۆكالار الىپ تاستالدى. بۇل نورما قازاقستاندا 2013 جىلعى 31 جەلتوقساننان كەيىن وندىرىلگەن (جيناقتالعان) نەمەسە ءدال وسى كۇننەن كەيىن ەلگە اكەلىنگەن كولىكتەرگە قاتىستى وزگەرتىلدى.

فەرمەرلەرگە ءبىر پيكاپ بويىنشا بوساتۋ

قوسىمشا جەڭىلدىك رەتىندە ءاربىر شارۋا نەمەسە فەرمەر قوجالىعى ءبىر جەڭىل موتورلى كولىككە (جۇك پلاتفورماسى بار، جۇرگىزۋشى كابيناسى مەن جۇك بولىگىن قاتاڭ ستاسيونارلىق قالقا ءبولىپ تۇراتىن پيكاپ ءتۇرى) كولىك سالىعىنان بوساتىلادى. بۇل جەڭىلدىك وزگە قولدانىستاعى اۋىل شارۋاشىلىعى جەڭىلدىكتەرىنە قوسىمشا رەتىندە بەرىلەدى.

ساناتتاۋ مەن ەسەپتىلىك جەڭىلدەيدى

كولىك ءتۇرىن «پيكاپ، دجيپ، ليمۋزين، فۋرگون» دەپ ءبولۋ تاجىريبەسى توقتاتىلادى. ەندى كولىكتەردىڭ ساناتى كولىك قۇرالىنىڭ تىركەۋ كۋالىگىندەگى جۇرگىزۋ قۇقىعى ساناتىنا (A، B، C، D) سايكەس ايقىندالادى. سونداي-اق سالىق نىساندارى قىسقارادى: 2026 جىلدان باستاپ كولىك سالىعى بويىنشا اعىمداعى تولەمدەردىڭ ەسەبى تاپسىرۋ مىندەتتەمەسى الىنىپ تاستالادى. سالىق تولەۋشى تەك جىلدىق دەكلاراسيا تاپسىرىپ، تولەمدى جىل قورىتىندىسىمەن ءبىر رەت جاسايدى.