InfoHub Logo

دۇيسەنبى، 5 قاڭتاردا قازاقستاننىڭ باسىم بولىگىنە شتورمدىق ەسكەرتۋلەر بەرىلدى: قار مەن جاڭبىر ارالاس جاۋىن، بۇرقاسىن، تۇمان جانە كوكتايعاق جول قوزعالىسىن قيىنداتۋى ىقتيمال، ال جەل ەكپىنى كەي اۋماقتاردا 15–23 م/س-قا دەيىن كۇشەيەدى.

بۇل تۋرالى Infohub.kz اقپارات اگەنتتىگى حابارلايدى.

قاي وڭىرلەردە قولايسىزدىق كۇتىلەدى

قازگيدرومەت مالىمەتىنشە، تۇندە جانە تاڭەرتەڭ اباي وبلىسىندا (سەمەي قوسا) قار، بۇرقاسىن، كوكتايعاق، كەي تۇستا تۇمان بولادى. جارما اۋدانىندا جەل ەكپىنى 23 م/س-قا دەيىن بارادى. اقمولا وبلىسىندا تۇندە جانە كۇندىز قار، جاياۋ بۇرقاسىن كۇتىلەدى، كوكشەتاۋدا تاڭەرتەڭ جانە كۇندىز وڭتۇستىك-باتىس جەلى 15–20 م/س-قا دەيىن كۇشەيمەك.

اقتوبە وبلىسىندا تۇندە قار مەن كوكتايعاق، كۇندىز باتىس جانە سولتۇستىك اۋدانداردا جاڭبىر-قار، بۇرقاسىن بولجاندى. اقتوبەدە جەلدىڭ ەكپىنى كۇندىز 15–18 م/س. اتىراۋ وبلىسىندا تۇمان مەن كوكتايعاق بايقالادى، كۇندىز سولتۇستىگى مەن شىعىسىندا جەل 15–20 م/س دەيىن جەتەدى.

شىعىس قازاقستان وبلىسىندا (وسكەمەن) قار، بۇرقاسىن جانە كوكتايعاق كۇتىلەدى؛ سولتۇستىك پەن شىعىستا جەل 15–20 م/س. باتىس قازاقستاندا (ورال) تۇننەن باستاپ جاڭبىر سوڭى قارعا ۇلاسىپ، بۇرقاسىن، كوكتايعاق جانە تۇمان بولادى؛ كۇندىز جەل 15–20 م/س دەيىن كۇشەيەدى.

ناقتى قالالار مەن مەرزىمدەر

پەتروپاۆلدا كۇندىز قار جانە بۇرقاسىن، جەل ەكپىنى 15–20 م/س. قوستانايدا تاڭەرتەڭ جانە كۇندىز قار، بۇرقاسىن، تۇمان كۇتىلەدى؛ جەل 15–20 م/س. پاۆلوداردا تۇندە قار، جاياۋ بۇرقاسىن بولجاندى. قىزىلوردا قالاسى مەن ءوڭىردىڭ شىعىسىندا تۇمان مەن كوكتايعاق كۇتىلەدى. ماڭعىستاۋدا تۇمان باسىم، باتىسىندا جەل 15–20 م/س.

الماتى قالاسىندا 5–7 قاڭتار ارالىعىندا تۇندە جانە تاڭەرتەڭ تۇمان جيىلەيدى. استانادا 5 قاڭتاردا ۋاقىتپەن ءالسىز قار مەن جاياۋ بۇرقاسىن بولىپ، تاڭەرتەڭ جانە كۇندىز وڭتۇستىك-باتىس جەلى 15–20 م/س دەيىن كۇشەيەدى. شىمكەنت پەن تۇركىستان وبلىسىندا تۇمان، تاۋلى اسۋلاردا جەل 15–20 م/س. جامبىل وبلىسىنىڭ تاۋلى اۋداندارىندا دا جەلدىڭ ەكپىنى 15–20 م/س دەيىن جەتەدى.

جولاۋشىلار مەن جۇرگىزۋشىلەرگە كەڭەس

كوكتايعاق پەن تۇمان كەزىندە جىلدامدىقتى تومەندەتىپ، اراقاشىقتىقتى ساقتاڭىز، جولاۋشىلار الىس جولعا شىعار بولسا، جول جاعدايىن جانە شەكارالاس ۋچاسكەلەردىڭ جابىلۋ ىقتيمالدىعىن الدىن الا تەكسەرگەنى ءجون. اۋەجايعا باراتىندار رەيس مارتەبەسىن ءجيى جاڭارتىپ قاراپ وتىرعانى دۇرىس.