InfoHub Logo

2026 جىلى قازاقستاننىڭ ءبىرقاتار ايماقتارىندا سۋ تاسقىنى ءقاۋپى ارتۋى مۇمكىن. «قازگيدرومەت» ماماندارى الدىن الا بولجام جاساپ، ەلىمىزدىڭ قاي وڭىرلەرىنە قاتەر ءتونىپ تۇرعانىن انىقتادى.

بيىلعى گيدرولوگيالىق بولجام بويىنشا، ەڭ جوعارى ءقاۋىپتى ايماقتار قاتارىنا اقمولا، قاراعاندى، سولتۇستىك قازاقستان، شىعىس قازاقستان جانە اباي وبلىستارى كىرەدى. قوستاناي، پاۆلودار، الماتى جانە اقتوبە وبلىستارىندا سۋ تاسقىنىنىڭ ورتاشا دەڭگەيدەگى ءقاۋپى كۇتىلۋدە.

بۇل بولجام كوپ جىلدىق گيدرومەتەورولوگيالىق باقىلاۋلار نەگىزىندە جاسالعان. ول ءۇشىن كۇزگى توپىراق ىلعالدىلىعى، توڭدانۋ تەرەڭدىگى، قاردىڭ قالىڭدىعى جانە كوكتەمگى قار ەرۋ كەزىندەگى اۋا رايى جاعدايلارى ەسكەرىلدى. مامانداردىڭ ايتۋىنشا، قولايسىز اۋا رايى جاعدايىندا وزەندەردەگى سۋ دەڭگەيى كوتەرىلىپ، ەرىگەن قار سۋىنان ەلدى مەكەندەر، اۋىل شارۋاشىلىعى القاپتارى مەن ينفراقۇرىلىم نىساندارى سۋ استىندا قالۋى ىقتيمال.

بۇل تۋرالى Infohub.kz اقپارات اگەنتتىگى حابارلايدى.

اقمولا وبلىسى

مۇندا ەسىل، قالقۇتان، جاباي جانە س ۇلى وزەندەرىندە سۋ دەڭگەيىنىڭ نورمادان اسۋ ءقاۋپى بار. اسىرەسە، استراحان، بۇلاندى، ارشالى، سەلينوگراد، اتباسار اۋداندارى مەن قوسشى قالاسى وسال بولىپ سانالادى.

قاراعاندى وبلىسى

بۇل وڭىردە نۇرا جانە شەرۋباي-نۇرا وزەندەرى باسسەيندەرىنە ەرەكشە نازار اۋدارىلادى. بۇقار جىراۋ، نۇرا جانە اقتوعاي اۋداندارىندا سۋ تاسقىنىنىڭ جوعارى ءقاۋپى ساقتالادى.

سولتۇستىك قازاقستان وبلىسى

سەرگەيەۆ سۋ قويماسىنان تومەنگى اعىستاعى اۋماقتارعا باقىلاۋ كۇشەيتىلدى. گ. مۇسىرەپوۆ اتىنداعى، شال اقىن، ەسىل، قىزىلجار اۋداندارى مەن پەتروپاۆلوۆسك قالاسى جوعارى ءقاۋىپتى ايماقتارعا جاتقىزىلدى.

شىعىس قازاقستان وبلىسى جانە اباي وبلىسى

كۇزدە توپىراقتىڭ ىلعالدىلىعى جوعارى بولۋى، توڭدانۋدىڭ تەرەڭدىگى جانە قاردىڭ مول جينالۋى ءقاۋىپتى ارتتىرادى.

شىعىس قازاقستان وبلىسىندا التاي، گلۋبوكوە، زايسان، تارباعاتاي، سامار، ۇلان جانە ۇلكەن نارىن اۋداندارى، ال اباي وبلىسىندا اقسۋات، اياگوز، بەسقاراعاي، بورودۋليحا، جارما جانە كوكپەكتى اۋداندارى ءقاۋىپتى ايماققا ەندى.

ورتاشا ءقاۋىپتى ايماقتار

قوستاناي وبلىسى

ايماقتىڭ كوپ بولىگىندە كۇزگى توپىراق ىلعالدىلىعى نورمادان تومەن. توڭدانۋ 140 سانتيمەترگە دەيىن جەتەدى، كەيبىر اۋدانداردا بۇل وتكەن جىلعى كورسەتكىشتەن اسىپ تۇسەدى. سولتۇستىك جانە ورتالىق اۋدانداردا قاردىڭ قالىڭدىعى نورمادان جوعارى.

توبىل وزەنى باسسەينىندە قار ەرىگەن كەزدە جوعارعى توبىل جانە قاراتومار سۋ قويمالارىنا ەرىگەن سۋدىڭ كەلۋى ىقتيمال. جالپى، جەرگىلىكتى سۋ باسۋ قاۋپىمەن ورتاشا ءقاۋىپ دەڭگەيى بولجانادى.

پاۆلودار وبلىسى

توپىراق ىلعالدىلىعى نورمادان جوعارى. توڭدانۋ كەي جەرلەردە 200 سانتيمەتردەن اسادى. قاردىڭ قالىڭدىعى نورمادان 27-106 پايىزعا ارتىق.

سۋ تاسقىنى كەزىندە ەرىگەن سۋدىڭ مول بولۋى، ءشۇلبى جانە سولەتى سۋ قويمالارىنىڭ جۇمىس رەجيمى، سونداي-اق ەرتىس وزەنىندە مۇز كەپتەلىستەرىنىڭ پايدا بولۋى مۇمكىن. ءبىرقاتار اۋدان مەن اقسۋ قالاسى ءۇشىن ورتاشا ءقاۋىپ بولجانادى.

الماتى وبلىسى

كۇزگى توپىراق ىلعالدىلىعى نەگىزىنەن نورمادان تومەن. وڭتۇستىك اۋدانداردا توپىراق تولىق ەرىگەن، قالعان اۋماقتا توڭدانۋ 1-76 سانتيمەتردى قۇرايدى.

ناۋرىزدا كۇرت جىلىنىپ، قاتتى جاۋىن جاۋسا، تاۋ وزەندەرىندە ەرىگەن جانە جاڭبىر سۋىنان بولاتىن تاسقىندار بولۋى مۇمكىن. الماتى قالاسى مەن وعان جاپسارلاس اۋداندار ورتاشا ءقاۋىپ ايماعىنا جاتقىزىلدى.

اقتوبە وبلىسى

توپىراق ىلعالدىلىعى نورمادان تومەن، توڭدانۋ 24-150 سانتيمەتردى قۇرايدى. قاردىڭ جينالۋى كليماتتىق ماندەردەن تومەن.

قار ەرۋ كەزىندە بەتكى اعىن قالىپتاسىپ، ويپاڭ جەرلەردە جەرگىلىكتى سۋ باسۋى مۇمكىن. كوپتەگەن اۋدان مەن اقتوبە قالاسى ءۇشىن ورتاشا ءقاۋىپ دەڭگەيى بولجانادى.

جاعداي ناقتىلاناتىن بولادى

«قازگيدرومەت» ءناۋرىز-ساۋىر ايلارىنداعى تەمپەراتۋرا رەجيمى مەن جاۋىن-شاشىن مولشەرىنە بايلانىستى سۋ تاسقىنى جاعدايىنىڭ وزگەرەتىنىن اتاپ ءوتتى. وزەندەردەگى مۇز ەرۋى باستالعاننان كەيىن ماماندار مەملەكەتتىك ورگاندار مەن حالىقتى حاباردار ەتۋ ءۇشىن اپتا سايىن قىسقا مەرزىمدى گيدرولوگيالىق بولجامداردى جاريالايتىن بولادى.

ەستەرىڭىزگە سالا كەتەيىك، بۇعان دەيىن پرەزيدەنت قاسىم-جومارت توقايەۆ سۋ تاسقىنىنا قارسى ءىس-شارالار جوسپارىنىڭ ناقتى بولۋى كەرەكتىگىن ايتقان بولاتىن. مەملەكەت باسشىسى ۇكىمەتكە جانە اكىمدىكتەرگە كوكتەم باستالعانشا بارلىق سۋ تاسقىنىنا قارسى شارالاردى ساپالى جۇزەگە اسىرۋدى تاپسىردى.