InfoHub Logo

رەسەي ازاماتى دەنيس سمىچەك قاتاردا جۇرگەندە، ءوز ەلىنىڭ ازاماتتارىن شەت ەلدەن ەۆاكۋاسيالاۋ جۇمىستارىنىڭ سالعىرت جۇرگىزىلىپ جاتقانىنا قىنجىلىس ءبىلدىردى. ول ءوزىنىڭ Instagram پاراقشاسىندا قازاقستاندىقتاردى ەۆاكۋاسيالاۋدىڭ جولعا قويىلعانىن كورىپ، قىزىعۋشىلىق تانىتتى.

بۇل تۋرالى Infohub.kz اقپارات اگەنتتىگى حابارلايدى.

دەنيس سمىچەكتىڭ ايتۋىنشا، قازاقستاننىڭ شەت ەلدەگى ەلشىلىگى ءوز ازاماتتارىنا ساۋد ارابياسىنا ۆيزا راسىمدەپ، اۆتوبۋستارمەن تاسىمالداپ، ودان ءارى الماتىعا تەگىن ۇشاقپەن جەتكىزۋدى ۇيىمداستىرعان. ءتىپتى، ءار ازاماتقا 35 دوللاردان كومەك بەرىلگەنى تۋرالى ايتىلادى.

رەسەيلىكتەردىڭ ەۆاكۋاسياسىنىڭ جاي-كۇيى

«سوڭعى جاڭالىقتار: قازاقستان ازاماتتارىنا ساۋد ارابياسىنان ۆيزا جاساپ، ەرتەڭ اۆتوبۋستارمەن الىپ كەتەدى (بۇل شامامەن 22 ساعاتتىق جول). ودان ءارى الماتىعا تەگىن ۇشاقپەن جىبەرەدى. ولاردىڭ كارتاسىنا 35 دوللاردان دا اۋدارادى. ال بىزدە ەشتەڭە جوق. ءبىراق ءبىز مۇڭايمايمىز. جاقسى ناتيجەگە سەنەمىز»، – دەپ جازدى ول.

ۆيدەودا قازاقستاندىقتاردى ەۆاكۋاسيالاۋعا دايىندىق ءجۇرىپ جاتقانى تۋرالى حابارلاما ءۇنپاراقتارى ەستىلىپ تۇرادى. ديسپەچەر: «قازاقستان ەلشىلىگىنىڭ وكىلىنىڭ اقپاراتى بويىنشا: بارلىق قازاقستان ازاماتتارى ساۋد ارابياسىندا ۆيزاعا ءوتىنىشتى شۇعىل تۇردە رەسىمدەۋى قاجەت، سىزدەرگە جىبەرىلگەن WhatsApp سىلتەمەسى ارقىلى وتىڭىزدەر. سەبەبى سىزدەردىڭ اۆتوبۋستارىڭىز ساۋد ارابياسى اۋماعىنا كىرەدى. دجيددادان ق ر ەلشىلىگى ۇيىمداستىرعان تەگىن ۇشاق سىزدەردى تىكەلەي الماتىعا الىپ كەتەدى»، – دەپ حابارلايدى.

«ماما، نەگە مەن قازاق ەمەسپىن؟»

بۇل جاعدايدى كورگەن رەسەي ازاماتى بەينەجازبادا كۇلكىلى تۇردە: «ماما، نەگە مەن قازاق ەمەسپىن؟» دەپ سۇرايدى.

كوممەنتارييلەردە قازاقستاندىقتار وزدەرىنىڭ شەت ەلدەن جەدەل شىعارىلعانىن راستادى. ءبىر قولدانۋشى: «ءقازىر تۇندە ءشول دالادا كەلە جاتىرمىز، ەر-ريادقا جاقىنداپ قالدىق، سودان كەيىن دجيدداعا اۆتوبۋسپەن بارامىز (10 ساعاتتاي جول) – سول جەردەن قازاقستانعا ۇشامىز»، – دەپ جازدى.

تاعى ءبىر ازامات گەرمانيادا تۇراتىنىن ايتىپ، ەلشىلىكتىڭ كونسۋلدىق ەسەپكە تۇرۋ قاجەتتىلىگى تۋرالى ايتقانىن ەسكە الدى. «ەگەر ەلدە توتەنشە جاعداي ورىن السا، ولار ءوز ازاماتتارىنىڭ قايدا ەكەنىن ءبىلىپ، قۇتقارۋعا دايىن بولادى ەكەن. بۇل مەنىڭ جانىما تىنىشتىق پەن جايلىلىق سىيلادى»، – دەيدى ول.

باسقا ءبىر پىكىردە: «وتكەن جىلى جارىلىستار مەن زىمىراندار استىندا ءبىزدىڭ ۇشاق مۇمكىن ەمەستى جاساپ، قازاقستاندىقتاردى ۇرىس الاڭىنان الىپ شىققانىن ءبارىڭىز بىلەسىزدەر»، – دەپ جازىلعان.

2011 جىلى جاپونيادا بولعان جاعدايدى ەسكە العان قولدانۋشى: «قازاقستان ەلشىلىگى تەز ارەكەت ەتىپ، باسقا ەلدەردىڭ ازاماتتارىن دا الىپ كەتكەن ەدى. مەن قىرعىزستان پاسپورتىمەن ەش قيىندىقسىز ۇشاققا ءمىندىم، جانىمدا ءبىر جاسار ءسابيىم بولدى. ولار پاسپورتتىڭ تۇسىنە قاراماي، بالالى ايەلدەردى الدى. قازاقستانعا ۇلكەن العىسىمدى بىلدىرەمىن»، – دەپ جازدى.

ەستەرىڭىزگە سالا كەتەيىك، قازاقستاندىقتاردى تاياۋ شىعىس ەلدەرىنەن اكەتۋ باستالعان بولاتىن. FlyDubai اۋە كومپانياسى دۋباي – استانا جانە دۋباي – الماتى باعىتتارى بويىنشا 2 رەيس ۇيىمداستىرىپ، 306 جولاۋشىنى تاسىمالدادى. جاقىندا كولىك كوميتەتى جاڭا رەيستەر مەن كەستەلەردى جاريالادى.