30 جاستاعى ميلليونەر سەم التماننان كەڭەستەر
بىرنەشە اپتا بۇرىن ميلليونەر، كاسىپكەر جانە Y Combinator-دىڭ باسشىسى سەم التمان 30-عا تولدى. وسىعان وراي ول ومىرلىك تاجىريبەسىمەن ءبولىسىپ، وسىنداي دارەجەگە قالاي جەتكەنىن بايانداپ ماقالا جازدى.
سەم التمان كاسىپكەر، ينۆەستور. 2005 جىلى ستەنفورد ۋنيۆەرسيتەتىندەگى وقۋىن تاستاپ Loopt كومپانياسىنىڭ نەگىزىن قۇردى. قازىرگى ۋاقىتتا Y Combinator ستارتاپتارعا ارنالعان اكسەلەراتوردىڭ پرەزيدەنتى.
ءبىر اپتا بۇرىن مەن 30-عا تولدىم. ەسكى دوستارىمنىڭ ءبىرى تاجىريبەمدى ەسكەرە وتىرىپ، بىرنەشە ومىرلىك كەڭەستەر بەرۋىمدى ءوتىندى. ويلاپ وتىرسام ونداي كەڭەس كوپ ەكەن، سوندىقتان بۇل ءتىزىمدى جاريالاعانىم دۇرىس پا دەپ ءالى دە كۇماندانامىن، ويتكەنى ولاردىڭ كوبى ماعىناسىز.
ءبىراق جاۋاپتارىمدى ءبىراز قىسقارتىپ، ارتىق زاتتاردان تازارتىپ، سىزدەرگە ۇسىنۋدى ءجون دەپ شەشتىم.
وتباسىڭىز بەن دوستارىڭىزدى ءتىزىمنىڭ سوڭىنا قويماڭىز. ەسكى دوستارىڭىزبەن بايلانىستى ۇزبەڭىز. قىزىق بولسا تاڭعا دەيىن ولارمەن سويلەسىڭىز.
تابىستى بولۋدىڭ سىرى: ءبىر ءىستى الىڭىز، سوعان بار نازارىڭىزدى سالىڭىز، وزىڭىزگە سەنىڭىز (اسىرەسە ەگەر باسقالار سەنبەسە)، بايلانىس ورناتىڭىز جانە سويلەسىڭىز، دارىندى ادامدارمەن سويلەسىڭىز جانە تىنىمسىز جۇمىس ىستەڭىز.
قىزىقسىز جۇمىستى جاقسى جاساۋ مۇمكىن ەمەس. ىستەپ جاتقان جۇمىسىڭىزدا ەڭ وزىق بولامىن دەپ ماقسات قويىڭىز. بۇعان قولىڭىز جەتپەسە دە، ەرتە مە كەش پە، بيىكتەن كورىنەرىڭىز انىق. وزىڭىزگە جاۋاپكەرشىلىك الۋعا جانە تاۋەكەلگە بارۋعا قورىقپاڭىز.
اقشاعا باقىت ساتىپ الۋعا بولا ما، بىلمەيمىن، ءبىراق وعان ەركىندىكتى ساتىپ الۋعا بولادى. ال بۇل از ەمەس. اقشا جەتىسپەۋشىلىك تە كۇيزەلىسكە اكەلەدى. جانە كوبىنە اقشا تابۋ ولاردى جاراتۋعا قاراعاندا قىزىعىراق بولادى.
ادامدارمەن كوپ ارالاسىڭىز. قىسقا تۆيتتەرگە قاراعاندا، ۇزاق ماقالالار مەن كىتاپتار وقىڭىز. تەلەديداردى سيرەك قاراڭىز.
ءار كۇنگە، جىلعا، ونجىلدىققا ناقتى ماقساتتار قويىڭىز.
جوسپارلاۋ – بۇل وتە جاقسى. ءبىراق ەگەر كۇتپەگەن جەردەن مۇمكىندىك تۋىپ تۇرسا پايدالانىپ قالىڭىز. اقىلسىز بىردەڭە جاساۋدان تايانباڭىز.
اقىلدى، قىزىقتى جانە العا جەتەلەۋشى ادامدارمەن دوس بولۋعا تىرىسىڭىز. سولارعا جالدانىپ جۇمىس ىستەڭىز، سولاردى جۇمىسقا الىڭىز. كوپ ۋاقىتىمىزدى كىممەن وتكىزسەك، سولارعا ۇقساپ كەتەتىنىمىز – راس.
نازارىڭىزدى باسقاعا اۋداراتىن زاتتاردان اۋلاق بولىڭىز. بۇل وتە ماڭىزدى. زەيىنىڭىزدى ءبىر ارناعا بۇرىپ ۇيرەنىڭىز، ۋاقىت وتە كەلە بۇل ءوز جەمىسىن بەرەدى.
از ۋايىمداڭىز. الەمدە سونشالىقتى تاۋەكەلگە بەل بۋدىراتىن زاتتار از. كوپتەگەن ادام الدىندا نە بولارىن بىلمەي تاۋەكەلگە بارۋدان قورقادى. بۇلاي ءسىز ەشقاشان بيىككە جەتپەيسىز.
قالاعانىڭىزدى سۇراي ءبىلىڭىز.
ەگەر بىردەڭەنى ىستەمەسەڭىز وكىنەتىنىڭىزدى بىلسەڭىز، وندا ىستەگەنىڭىز دۇرىس.
جاتتىعىڭىز. دۇرىس تاماقتانىڭىز. دەمالىڭىز. مۇنىڭ ءبارىن جاقسى بىلەسىز.
جاستىق شاق – بۇل ۇلى زات. ونى بەكەر وتكىزبەڭىز. ونى ەشقانداي اقشا قايتارا المايدى.
اتا-اناڭىزعا ولاردى جاقسى كورەتىنىڭىزدى ءجيى ايتىڭىز. ولارعا بارىپ تۇرىڭىز.
قوماعايلىقپەن ءبىلىم الىڭىز.
ءجيى جاڭا بىردەڭە ىستەڭىز. جاڭا قىزىعۋشىلىق ۋاقىتتى قابىلداۋدى باياۋلاتىپ قانا قويمايدى، ءومىردى قىزىق ەتەدى، ءبىر ورىندا وتىرعىزباي، تانىم كوكجيەگىن كەڭەيتەدى.
ەشكىممەن ماڭگىلىككە قوشتاسپاڭىز.
ادامداردى كەشىرىڭىز.
مارتەبە قۋماڭىز. مارتەبەنىڭ استارىندا ماعىنا بولماسا ونىڭ تۇككە قاجەتى جوق.
كوپتەگەن زات ورتاشا مولشەردە ەشقانداي ءقاۋىپ توندىرمەيدى. مولشەرىنەن ارتىق پايدالانعان زاتتىڭ كوبى زيان اكەلەدى.
قورقىنىش – ءومىردىڭ اجىراماس بولشەگى. بۇل كوبىنە اقىلدى، دەگەنىنە جەتۋگە اسىعاتىن ادامدارعا ءتان ەكەنىن بايقايمىن. مەنىڭ ويىمشا، كوپتەگەن ادام قورقىنىش جايلى كوپ ويلاعاندىقتان ىنتامەن جۇمىس ىستەيتىن سياقتى.
شاعىم ايتۋدان اۋلاق بولىڭىز. ادامدار مۇندايدى جەك كورەدى.
وزگەنىڭ تابىستىلىعىن قىزعانباڭىز. ءبىراق كوبى سىزگە قىزعانىشپەن قارايتىنىن ۇمىتپاڭىز، مۇنى ەلەمەڭىز.
ەگەر ءسىزدىڭ جەتكىلىكتى ۋاقىتىڭىز بولسا، ءسىز كەز كەلگەن نارسەگە بەيىمدەلە الاسىز.
بىردەڭەنى جاساماس بۇرىن بىرنەشە سەكۋند ويلانىپ الىڭىز. اشۋلانىپ تۇرعاندا بىرنەشە مينۋت ويلانىڭىز.
كۇندەر ۇزاق، ءبىراق ونجىلدىقتار قىسقا.
You Might Also Like
-
كوپىرلەردىڭ نەگىزگى فۋنكسياسى كەدەرگىلەردەن وتۋگە كومەكتەسۋ بولىپ تابىلادى. الايدا كەي كەزدەرى ساۋلەتشىلەر جاي عانا كوپىر ەمەس، كەرەمەت ونەر تۋىندىلارىن جاسايدى. تومەندەگى كوپىرلەردى ساۋلەت ءو...
-
ۇلكەن ءارى بيىك مۇسىندەر ەجەلگى داۋىرلەردە سالىنا باستاعان. مىسالى، ەجەلگى مىسىرلىقتار تۇرعىزعان ۇلى سفينكستىڭ بيىكتىگى 20 مەتردى قۇرايدى. الايدا سوڭعى ءجۇزجىلدىقتا بيىكتىگى بويىنشا الەمنىڭ ەجەلگى كە...
