InfoHub Logo

بەلگىلى جۋرناليست جانار بايسەمىز ءوزىنىڭ جەكە ومىرىنە قاتىستى تىڭ دەرەكتەردى جاسىرماي ايتىپ بەردى. ول 38 جاسىندا شەتەلدىك ازاماتقا تۇرمىسقا شىعۋ تۋرالى شەشىمىن جانە ونىڭ سەبەپتەرىن امان تاسىعانعا بەرگەن سۇحباتىندا اشىپ كورسەتتى.

بۇل تۋرالى Infohub.kz اقپارات اگەنتتىگى حابارلايدى.

«مەن ادەيىلەپ شەتەلدىك ازاماتقا تۇرمىسقا شىعۋدى جوسپارلاعان جوقپىن. تاعدىر سولاي جازدى. بۇل مەنىڭ تاڭداۋىم بولدى. ايتپەسە، مەن دە قازاقتىڭ جىگىتىنە تۇرمىسقا شىعۋدى ارماندايتىنمىن»، - دەيدى جانار بايسەمىز.

اتا-انانىڭ قولداۋى

جۋرناليست اتا-اناسىنىڭ بۇل شەشىمگە قالاي قاراعانى تۋرالى سۇراققا: «ەشكىم قارسى بولعان جوق. اناما حابارلاسقانىمدا، ول كىسى العاشقىدا ءسال ابدىراپ قالدى. ءبىراق اكەم بىردەن قولداپ، باتاسىن بەردى. مەن ءۇيدىڭ تۇڭعىشى بولسام دا، ءوزىمدى ءوزىم باعالايتىن، جەكە ءومىرىمدى ءوزىم شەشەتىن جاستا ەدىم. 38 جاستا بولسام دا، ءالى جاس كورىنەتىنمىن»، - دەپ جاۋاپ بەردى.

جولداسى تۋرالى

جانار بايسەمىزدىڭ جولداسى – يتاليان ۇلتىنىڭ وكىلى. ونىڭ تەگىندە مولداۆان، پولياك جانە ۋكراين قاندارى دا بار ەكەنى ايتىلادى. كۇيەۋىنىڭ ودەسسادا وسكەندىكتەن، ۇيدە كوبىنە ورىس تىلىندە سويلەسەتىندەرىن، الايدا ول قازاق ءتىلىن ۇيرەنۋگە ۋادە بەرگەنىن جەتكىزدى.

اكەسىنىڭ «ۇلتى ماڭىزدى ەمەس، ادامگەرشىلىگى بولسا بولدى» دەگەن ءسوزى جاناردىڭ شەشىمىن ودان ءارى نىعايتقان. سونىمەن قاتار، كۇيەۋىنىڭ يسلام ءدىنىن قابىلداۋى جۋرناليست ءۇشىن ۇلكەن قۋانىش بولعانى ايتىلادى.

ەرلى-زايىپتىلار اتىراۋدا تانىسقان. جاناردىڭ ايتۋىنشا، ولار الەمنىڭ كوپتەگەن ەلىن ارالاسا دا، تاعدىردىڭ جازۋىمەن ءدال وسى قالادا كەزدەسكەن. كۇيەۋى قازاق ءداستۇرىن قۇرمەتتەپ، قالىڭ مال تولەپ، بارلىق جورالعىلاردى ورىنداعان. ەنەسى دە جاناردى جىلى قابىلداپ، جاقسى قارىم-قاتىناس ورناعان.