InfoHub Logo

پاتەر الامىن دەپ سان سوعىپ قالماڭىز. الماتى اكىمدىگى مەن «قازاقستان تۇرعىن ءۇي كومپانياسى» (قجك) ۇلەسكەرلەردەن قاراجات تارتۋعا رەسمي رۇقساتى بار تۇرعىن ءۇي كەشەندەرىنىڭ جاڭارتىلعان ءتىزىمىن ۇسىندى. قازىرگى تاڭدا مەگاپوليستەگى 28 نىسان عانا زاڭدى تۇردە جۇمىس ىستەپ تۇر.

بۇل ءتىزىم اسىرەسە يپوتەكا نەمەسە ءبولىپ تولەۋ ارقىلى باسپانالى بولعىسى كەلەتىندەر ءۇشىن وتە ماڭىزدى. قۇجاتتارى تۇگەل 28 نىساننىڭ تولىق ءتىزىمىن مىنا سىلتەمە ارقىلى كورە الاسىزدار.

زاڭ قاتايدى: ەندى جارناماعا دا شەكتەۋ بار

ەستەرىڭىزدە بولسا، بيىلعى ماۋسىم ايىندا «تۇرعىن ءۇي قۇرىلىسىنا ۇلەستىك قاتىسۋ تۋرالى» زاڭعا ماڭىزدى وزگەرىستەر ەنگىزىلگەن ەدى. ەندى قۇرىلىس كومپانيالارىنا قاتىستى تالاپ كۇشەيدى. ەگەر زاڭسىز سالىنعان ءۇي بولسا، ونى جارنامالاۋدىڭ ءوزى قىلمىس بولىپ سانالۋى مۇمكىن.

زاڭ بويىنشا، تومەندەگىدەي جاعدايلاردا قۇرىلىس سالۋشىعا كوپقاباتتى نەمەسە جەكە ۇيلەردى جارنامالاۋعا تىيىم سالىنادى:

• ۇلەسكەرلەردەن اقشا تارتۋعا رۇقساتى بولماسا؛

• ءبىرىڭعاي وپەراتورمەن كەپىلدىك شارتى جاسالماسا؛

• ەكىنشى دەڭگەيلى بانك ارقىلى جوبالىق قارجىلاندىرۋ جوق بولسا.

بۇرىن تەك جوبالىق قۇجاتتاما بەكىتىلسە بولدى، جارناما بەرە بەرەتىن «تەسىك» زاڭنامادان الىنىپ تاستالدى. بۇل — «كوتلوۆان» كەزىندە حالىقتان اقشا جيناپ الىپ، ءىزىن سۋىتاتىن الاياق كومپانيالاردىڭ جولىن كەسۋ ءۇشىن جاسالعان قادام.

سونىمەن قاتار، زاڭعا «جەكە تۇرعىن ۇيلەر كەشەنى» دەگەن جاڭا ۇعىم ەنگىزىلدى. ەندى مۇنداي كوتتەدج قالاشىقتارى دا ۇلەستىك قاتىسۋ زاڭىنا تولىق باعىنۋى ءتيىس.

قۇرىلىس كومپانياسىن قالاي تەكسەرۋگە بولادى؟

ءۇي الماس بۇرىن، "جەتى رەت ولشەپ، ءبىر رەت كەسكەن" ءجون. اكىمدىك وكىلدەرى كەز كەلگەن تۇرعىن ءۇي كەشەنىنە اقشا قۇيماس بۇرىن، ونىڭ قۇجاتتارىن مۇقيات تەكسەرۋگە كەڭەس بەرەدى.

ول ءۇشىن ارنايى سەنىم تەلەفوندارى مەن رەسمي پورتالدار ىسكە قوسىلعان:

1. قۇرىلىسقا رۇقسات قاعازدارى بار-جوعىن ءبىلۋ ءۇشىن: قالا قۇرىلىسىن باقىلاۋ باسقارماسىنىڭ انىقتامالىق call-ورتالىعىنا حابارلاسىڭىز: +7 (705) 896-6000.

2. ۇلەسكەرلەردەن اقشا جيناۋعا رۇقساتى بار-جوعىن ءبىلۋ ءۇشىن: الماتى قالالىق جوسپارلاۋ جانە ۋربانيستيكا باسقارماسىنا قوڭىراۋ شالىڭىز: +7 (727) 240-80-00.

3. ونلاين تەكسەرۋ: «قجك» اق-نىڭ تۇرعىن ءۇي پورتالى — homeportal.kz سايتىندا بارلىق اقپارات اشىق كورسەتىلگەن.