InfoHub Logo

الماتى وبلىسىنىڭ جولدارىندا تاعى دا قارالى جاعداي. 5 جەلتوقسان كۇنى بولعان ءىرى جول اپاتىنان ءبىر مەزەتتە ءتورت ادامنىڭ ءومىرى قيىلدى. قايعىلى وقيعا الماتى – كوكپەك – كوكتال – شونجى تاس جولىنىڭ 80ء-شى شاقىرىمىندا ورىن الدى.

الدىن الا مالىمەت بويىنشا، اپاتقا جىلدامدىقتى نەمەسە ءرولدى باسقارا الماۋ سەبەپ بولۋى مۇمكىن. Audi A6 ماركالى كولىگىنىڭ جۇرگىزۋشىسى كۇتپەگەن جەردەن قارسى قوزعالىس جولاعىنا شىعىپ كەتكەن.

سالدارىنان قارسى بەتتە كەلە جاتقان Nissan Cefiro كولىگىمەن بەتپە-بەت سوقتىعىسقان. سوققىنىڭ قاتتى بولعانى سونشا، ەكى كولىكتىڭ دە جۇرگىزۋشىلەرى مەن ەكى جولاۋشى وقيعا ورنىندا العان جاراقاتتارىنان كوز جۇمدى.

زارداپ شەككەندەر بار ما؟

وكىنىشكە قاراي، قازا تاپقانداردان بولەك، جارالانعاندار دا بار. ءتۇرلى دەنە جاراقاتىن العان تاعى ءۇش جولاۋشى شۇعىل تۇردە جاقىن ماڭداعى اۋرۋحاناعا جەتكىزىلدى. دارىگەرلەر ولاردىڭ ءومىرى ءۇشىن كۇرەسىپ جاتىر.

قازىرگى تاڭدا پوليسيا دەپارتامەنتى سوتقا دەيىنگى تەرگەۋ امالدارىنا كىرىستى. ءتارتىپ ساقشىلارى وقيعانىڭ ناقتى سەبەپتەرىن انىقتاپ جاتىر. تەرگەۋ بارىسى وبلىستىق پوليسيا باسشىلىعىنىڭ قاتاڭ باقىلاۋىنا الىندى.

قارالى اپتا: سپورتشىلاردىڭ قازاسى ەستەن كەتپەي تۇرىپ...

بۇل — سوڭعى اپتاداعى الماتى وڭىرىندە بولعان جالعىز قايعىلى وقيعا ەمەس. ەستەرىڭىزدە بولسا، 2 جەلتوقسانعا قاراعان ءتۇنى الماتى – بىشكەك تاس جولىندا دا (129-شى شاقىرىم) سۇمدىق اپات بولعان ەدى.

ول كەزدە Honda Odyssey كولىگى جۇك كولىگىنىڭ تىركەمەسىنە سوعىلىپ، سالونداعى 7 ادام تۇگەلدەي قازا تاپقان بولاتىن. كەيىن بەلگىلى بولعانداي، مارقۇمداردىڭ اراسىندا ەلىمىزگە بەلگىلى ارداگەر سپورتشىلار، سونىڭ ىشىندە شاحماتتان سۋردليمپيادا جانە ەۋروپا چەمپيونى دميتريي موچالسكيي دە بولعان.