الماتىلىق ۇستازدار ۇلتتىق ويىنداردى ۇيرەتەدى
«رۋحاني جاڭعىرۋ» باعدارلاماسى اياسىندا قازاق ۇلتتىق قىزدار پەداگوگيكالىق ۋنيۆەرسيتەتىندە «اۋلاعا اسىعىڭىز!» اتتى الەۋمەتتىك جوبا باستاۋ الدى.
وقۋ ورنىنىڭ رەكتورى گاۋحار الدامبەرگەنوۆانىڭ باستاماسىمەن قولعا الىنعان جوبانىڭ ماقساتى – ۇرپاقتار ساباقتاستىعىن دارىپتەۋ، ۇلتتىق ويىنداردى ۇلىقتاۋ. الماتى قالاسىنىڭ اۋلالارى مەن ويىن الاڭدارىندا جۇزەگە اسىرىلاتىن ءىس-شارا جەتكىنشەكتەردىڭ زاماناۋي گادجەتتەر مەن كومپيۋتەرلەرگە دەگەن تاۋەلدىلىگىنەن ارىلتۋعا ۇلەس قوسۋدى دا كوزدەيدى.
ءبىر بۇل عانا ەمەس. جوبا «رۋحاني جاڭعىرۋ» باعدارلاماسى شەڭبەرىندە پايدالانۋعا بەرىلگەن وڭتۇستىك استاناداعى سپورت پەن اۋلا الاڭدارىن ءتيىمدى پايدالانۋعا ءوز سەپتىگىن تيگىزبەك.
المالى اۋدانىنىڭ اكىمدىگىنىڭ قولداۋىمەن ۇيىمداستىرىلعان شارانىڭ العاشقى كۇنى بەلگىلى ونەر مايتالمانى ساكەن مايعازييەۆ جەتەكشىلىك جاسايتىن «Smart» ونەر مەكتەبىنىڭ وقۋشىلارى، تانىمال بلوگەرلەر مەن قىزدار ۋنيۆەرسيتەتىنىڭ ۇجىمى مەكتەپ جاسىنداعى جەتكىنشەكتەرگە اسىق اتۋدى، لاڭگى تەبۋدى ۇيرەتتى. وزگە دە ۇمىت بولا باستاعان ويىندارمەن تانىستىردى.
ۇيىمداستىرۋشىلار ۇلتتىق ويىنداردى ۇلىقتاۋ – قازاقتى الەمگە تانىتۋدىڭ ءبىر ۇلگىسى دەپ پايىمدايدى.
– قازىرگى كۇندە اسىق ويناعان، لاڭگى تەپكەن نەمەسە وسى تاقىلەتتەس دەنەنىڭ شىنىعۋىنا پايداسى مول ويىنداردى ويناپ جۇرگەن بالالاردى ۇنەمى كورەمىز دەپ ايتا الامىز با؟ الدە عالامتوردان باس الماي، تەلەفونعا تەلمىرگەندەرگە كوپ كوزىڭىز تۇسە مە؟ ارينە سوڭعىسىنىڭ ءباسى باسىم بولىپ تۇر. وكىنىشتى جايت. وسى ورايدا ايتا كەتكەن ءلازىم، ءار ۇلتتىڭ وزىندىك ءتول تاريحى، ءدىلى مەن ءدىنى، ءتىلى مەن سالت-داستۇرىمەن قاتار ۇلتتىق ويىندارى دا بولادى. كيىز تۋىرلىقتى قازاق حالقىنىڭ دا ءبىرقاتار ۇلتتىق ويىندارى بار. بابادان بالاعا مۇرا بولىپ جەتكەن ويىنداردىڭ باسىم بولىگى بالانىڭ دەنساۋلىعى ءۇشىن تيگىزەتىن پايداسى ايتارلىقتاي زور. سونىمەن قاتار ونىڭ ۇرپاق تاربيەسىندە اتقاراتىن ءرولى دە ۇلكەن. ءبىزدىڭ بۇل الەۋمەتتىك جوبانى قولعا العانداعى ماقساتىمىز دا وسى. ۇمىت بولا باستاعان ۇلتتىق قۇندىلىقتارىمىزدى قايتا جاڭعىرتۋ ارقىلى وسكەلەڭ ۇرپاقتىڭ پاراسات-پايىمىن ارتتىرۋ، ولاردىڭ سالاۋاتتى ءومىر سالتىن ۇستانۋعا شاقىرۋ، – دەيدى قازاق ۇلتتىق قىزدار پەداگوگيكالىق ۋنيۆەرسيتەتىنىڭ الەۋمەتتىك دامۋ جونىندەگى پرورەكتورى جاڭاگۇل سۇلتانوۆا.
ونىڭ ايتۋىنشا، الەۋمەتتىك جوبا ءبىر رەتتىك عانا شارا ەمەس. ول الداعى ۋاقىتتا دا الماتى قالاسىنىڭ ءار ايماعىندا جالعاسىن تاپپاق.
You Might Also Like
-
«ۇلتتىق رۋح پەن وي-سانانىڭ كەمەلدىگى توعىسقاندا...» اتتى شىعارما وسى اپتانىڭ ۇزدىك تۋىندىسى رەتىندە تانىلىپ وتىر. ەسسە اۆتورى – ماقپال جارىلقاپبەرگەن.
-
كەز كەلگەن مەملەكەتتىڭ بولاشاعى ءبىلىمدى جاستار. بۇگiنگى جاس – بولاشاق قازاقستاننىڭ جاندى بەينەسى. بۇگىنگى جاس – ەرتەڭگى ەل تىزگىنىن ۇستايتىن تۇلعا.
