InfoHub Logo

الماتى قالاسىنداعى شاعىن قاباتتى ۇيلەردىڭ تۇرعىندارى جەرگىلىكتى بيلىكتىڭ دامۋ دەگەن جەلەۋمەن قۇرىلىس كومپانيالارىنىڭ مۇددەسىن كوزدەپ وتىرعانىن ايتىپ، نارازىلىق بىلدىرۋدە. ولار ءوز اۋداندارىن جوسپارلى تۇردە بۇزىپ، تۇرعىنداردى كوشىرۋگە جول بەرمەيتىندەرىن مالىمدەدى.

بۇل تۋرالى Infohub.kz اقپارات اگەنتتىگى حابارلايدى.

قالانىڭ «ورگانيكالىق ءتىنى» جويىلۋدا

سوڭعى كەزدەرى الماتىدا قالانىڭ جاڭارتىلعان باس جوسپارىنا بايلانىستى تۇرعىندار اراسىندا نارازىلىق كۇشەيىپ وتىر. جوسپار بويىنشا، ءبىرقاتار شاعىن قاباتتى اۋداندار (جەكە سەكتور، جەكە تۇرعىن ءۇي قۇرىلىسى ايماعى) كوپقاباتتى ۇيلەر سالۋعا ارنالعان ايماققا اينالدىرىلۋدا. سونىمەن قاتار، جەكە سەكتورداعى كەيبىر جەر ۋچاسكەلەرى مەملەكەتتىك قاجەتتىلىكتەر ءۇشىن (جول ايرىقتارىن سالۋ نەمەسە جولداردى كەڭەيتۋ، الەۋمەتتىك نىساندار مەن ينفراقۇرىلىمداردى سالۋ) ماجبۇرلەپ الىنۋى ءتيىس.

بۇل وزگەرىستەرگە بايلانىستى تاستاق، قايرات، ماياك، الماس، تەرەكتى، وجەت، مادەنيەت سياقتى ءبىرقاتار شاعىن اۋداندار مەن ناۋرىزباي اۋدانىنداعى قالقامان، مەيرام، جايلى سياقتى اۋداندارداعى ۇيلەر نەمەسە ولاردىڭ ءبىر بولىگى كوپقاباتتى قۇرىلىس ايماعىنا ەنگىزىلدى نەمەسە مەملەكەتتىك قاجەتتىلىككە الىنۋى مۇمكىن.

تۇرعىنداردىڭ تالابى – باس جوسپاردى قايتا قاراۋ

ناۋرىزباي اۋدانىنىڭ قالقامان تۇرعىندارى جينالىپ، قالا اكىمىنە، ۇكىمەتكە جانە پرەزيدەنتكە باس جوسپاردى قايتا قاراپ، ءوز اۋداندارىن كوپقاباتتى قۇرىلىس ايماعىنان شىعارىپ، جەكە تۇرعىن ءۇي قۇرىلىسى ايماعى رەتىندە قالدىرۋ تۋرالى تالاپ قويدى.

شامامەن 150 ادام قاتىسقان كەزدەسۋ وتە ەموسيونالدى ءوتتى. تۇرعىندار قالا بيلىگىنىڭ كەلىسىمىنسىز اۋداندارىن كوپقاباتتى قۇرىلىس ايماعىنا اينالدىرعانىنا اشۋلى بولدى.

بيلىك وكىلدەرىنىڭ جاۋابى

ساۋلەت باسقارماسى مەن باس جوسپاردى ازىرلەۋشىلەر قالانىڭ دامىپ، ءوسىپ جاتقانىن، باسقا وڭىرلەردەن كەلەتىن تۇرعىنداردى ورنالاستىرۋ قاجەتتىگىن العا تارتتى. ولار ءىرى، قارقىندى دامىپ جاتقان مەگاپوليستە جەكە تۇرعىن ءۇي قۇرىلىسىن ساقتاپ قالۋ ءتيىمسىز ەكەنىن، بۇل قازىرگى زامانعى قالا قۇرىلىسىنىڭ تالاپتارىنا ساي كەلمەيتىنىن ايتتى. سونداي-اق، باس جوسپار مەن اۋداننىڭ ەگجەي-تەگجەيلى جوسپارلاۋ جوباسى (ججج) ازىرلەنىپ، قوعامدىق تىڭداۋلاردان ءوتىپ، بەكىتىلگەنىن، ونى تەك سوت ارقىلى عانا وزگەرتۋگە بولاتىنىن جەتكىزدى.

اكىمدىك وكىلدەرى كوپقاباتتى قۇرىلىسقا اۋىستىرۋ مىندەتتى تۇردە ۇيلەردى بۇزۋ دەگەندى بىلدىرمەيتىنىن، ينۆەستور نەمەسە قۇرىلىس سالۋشى تابىلىپ، مەنشىك يەلەرىمەن كەلىسىمگە كەلگەن جاعدايدا عانا بۇل جۇزەگە اساتىنىن ايتىپ، تۇرعىنداردى سابىرعا شاقىرۋعا تىرىستى.

تۇرعىنداردىڭ جاۋابى

الايدا، بۇل جاۋاپتار تۇرعىنداردى قاناعاتتاندىرمادى، كەرىسىنشە، ولاردىڭ اشۋىن ودان ءارى كۇشەيتتى. ولار ۋچاسكەلەردى ساتىپ العاندا، ۇيلەر سالىپ، اعاشتار وتىرعىزعاندا ەشكىم ولاردىڭ بۇزىلاتىنىن ايتپاعانىن، سوندىقتان ۇرپاقتارىنا قالاتىن مەكەن رەتىندە كاپيتالىمەن سالىنعانىن جەتكىزدى.

تۇرعىنداردىڭ پىكىرىنشە، بيلىك وكىلدەرى قالانىڭ وسۋىنە جاڭا جەر قاجەت دەگەن سىلتاۋمەن الدىن الا دايىندالعان فورمالدى جاۋاپتاردى عانا ايتتى. ولار اۋداننىڭ جاقىن ارادا مەترو جەلىسىنىڭ كەلۋىنە بايلانىستى ءىرى قۇرىلىس كومپانيالارىنىڭ نازارىنا ىلىككەنىن، بۇل جەردە كوپقاباتتى تۇرعىن ۇيلەر سالۋ جانە پاتەرلەردى ساتۋ وتە ءتيىمدى بولاتىنىن بولجاپ وتىر.

سونىمەن قاتار، ولاردىڭ اۋدانىنا جاپسارلاس كوتتەدج قالاشىعىنا ەشقانداي وزگەرىس ەنگىزىلمەگەنىن اتاپ ءوتتى. بۇدان ولار قالا قۇرىلىسى ساياساتىنىڭ قۇرىلىس ماگناتتارىنىڭ مۇددەسىنە ساي جۇرگىزىلىپ وتىرعانىنا كوزدەرى جەتكەنىن ايتتى.

تۇرعىنداردىڭ ايتۋىنشا، قالانىڭ دامۋى – بۇل شاعىن قاباتتى اۋدانداردى بۇزىپ، تۇرعىنداردى قۋىپ شىعىپ، جاڭا تۇرعىن ءۇي كەشەندەرىن سالۋ ەمەس، كەرىسىنشە، وندا تۇراتىن ادامداردىڭ مۇددەسىن قامتاماسىز ەتىپ، جايلى جاعداي جاساۋ. ولار قالاداعى ەكولوگيالىق جاعدايدىڭ ءوزى اۋىر ەكەنىن، كوپقاباتتى ۇيلەردىڭ قۇرىلىسى مەن حالىقتىڭ جانە كولىك اعىنىنىڭ كوبەيۋى بۇل جاعدايدى ودان ءارى ناشارلاتاتىنىن ايتتى. قالانى جۇكتەمەدەن بوساتىپ، جاڭا تۇرعىنداردىڭ كەلۋىن شەكتەپ، وبلىس ورتالىقتارىن دامىتۋ قاجەت دەپ سانايدى.

سوندىقتان ولاردىڭ باستى تالابى – ءوز اۋداندارىن باس جوسپاردا جەكە تۇرعىن ءۇي قۇرىلىسى ايماعى رەتىندە بەلگىلەۋ. ويتكەنى، مەملەكەت ماجبۇرلەپ كوشىرمەسە دە، بۇل جەردى العان قۇرىلىس كومپانياسى مەنشىك يەلەرىنە قىسىم جاساپ، اقىرى ءوز دەگەنىنە جەتەتىنىنە سەنىمدى.