InfoHub Logo

الماتى قالاسىندا جول ەرەجەسىن بۇزۋشىلىقتار، اسىرەسە، ماس كۇيدە كولىك جۇرگىزۋ جانە اسا ءقاۋىپتى جىلدامدىقپەن ءجۇرۋ دەرەكتەرى كوبەيىپ كەتتى. وسىعان بايلانىستى پوليسيا جولدارداعى باقىلاۋدى كۇشەيتىپ، ارنايى رەيدتەر ۇيىمداستىردى.

بۇل تۋرالى Infohub.kz اقپارات اگەنتتىگى حابارلايدى.

سوڭعى ءۇش كۇندە 5 مىڭنان استام بۇزۋشىلىق

پوليسيا مالىمەتىنشە، سوڭعى ءۇش كۇندە قالادا 5 مىڭنان استام جول ەرەجەسىن بۇزۋ فاكتىسى تىركەلگەن. ونىڭ ىشىندە 43 جۇرگىزۋشى ماس نەمەسە ەسىرتكىنىڭ اسەرىنەن كولىك باسقارعان. ولاردىڭ بارلىعى كولىك جۇرگىزۋ قۇقىعىنان ايىرىلدى. سونداي-اق، 369 ادام قاجەتتى قۇجاتسىز كولىك تىزگىندەگەنى انىقتالدى. 94 كولىك ارنايى ايىپپۇل تۇراعىنا قويىلدى. جىلدامدىقتى اسىرۋدىڭ 2 مىڭنان استام جاعدايى تىركەلدى.

الەۋمەتتىك جەلىدەگى "تۇنگى جارىستار"

پوليسيا كەيبىر جۇرگىزۋشىلەردىڭ الەۋمەتتىك جەلىلەردە ەرەجە بۇزۋشىلىقتارىن كورسەتىپ، ۆيدەوعا ءتۇسىرىپ جاريالايتىنىن اتاپ ءوتتى. ۆەدومستۆو مۇنداي ءاربىر جاعداي تەكسەرىلىپ، كىنالىلەر جاۋاپقا تارتىلاتىنىن باسا ايتتى.

ساعاتىنا 250 شاقىرىم جىلدامدىق

ايتا كەتەيىك، ال-فارابي داڭعىلىندا ءبىر جۇرگىزۋشى كولىگىن ساعاتىنا 250 شاقىرىمعا دەيىن ۇدەتكەن. ونىڭ تۇلعاسى انىقتالىپ، بىرنەشە فاكتى بويىنشا اكىمشىلىك ءىس قوزعالدى. سوت شەشىمىمەن ول 10 تاۋلىككە قاماۋعا الىندى.

پوليسيا ۇندەۋى

پوليسيا دەپارتامەنتى ءقاۋىپتى جۇرگىزۋ ادامداردىڭ ءومىرى مەن دەنساۋلىعىنا قاتەر توندىرەتىنىن ەسكە سالدى. جۇرگىزۋشىلەردى جول ەرەجەلەرىن قاتاڭ ساقتاۋعا جانە وزدەرى مەن اينالاسىنداعىلاردى قاۋىپكە دۋشار ەتپەۋگە شاقىردى.

ال-فارابيدەگى ولىممەن اياقتالعان جول اپاتى

جەلى قولدانۋشىلارى 21 ناۋرىزعا قاراعان ءتۇنى ال-فارابي داڭعىلىندا بولعان ولىممەن اياقتالعان جول اپاتىن قىزۋ تالقىلاۋدا. وندا Zeekr ەلەكتروموبيلى جولدىڭ قارسى باعىتىنا شىعىپ، Mercedes كولىگىمەن سوقتىعىسقان. Mercedes كولىگىنىڭ جۇرگىزۋشىسى مەن ەكى جولاۋشىسى (22 جانە 20 جاستاعى قىزدار) وقيعا ورنىندا كوز جۇمدى. Zeekr كولىگىنىڭ جۇرگىزۋشىسى امان قالدى.

قازىرگى ۋاقىتتا پوليسيا بۇل ءىستى ق ر قىلمىستىق كودەكسىنىڭ 345-بابى 4-بولىگى بويىنشا تەرگەپ جاتىر. بۇل باپ بويىنشا 10 جىلعا دەيىن باس بوستاندىعىنان ايىرۋ جازاسى قاراستىرىلعان.