InfoHub Logo

الماتى قالاسىندا ەكى كۇنگە سوزىلعان «توقتا-بۇزۋشىلىق» جەدەل-الدىن الۋ ءىس-شاراسى بارىسىندا 4828 جول ەرەجەسىنىڭ بۇزىلعانى انىقتالدى. بۇل تۋرالى Polisia.kz سايتىنا سىلتەمە جاساعان Tengri Auto حابارلادى.

بۇل وپەراسيا كەزىندە جول قاۋىپسىزدىگىنە تىكەلەي ءقاۋىپ توندىرەتىن اۋىر بۇزۋشىلىقتارعا ەرەكشە نازار اۋدارىلدى. اتاپ ايتقاندا، كولىك جۇرگىزۋ قۇقىعى جوق 44 ادامنىڭ كولىك باسقارعانى، بۇرىن جۇرگىزۋشى كۋالىگىنەن ايىرىلعان 8 ادامنىڭ كولىك تىزگىندەگەنى انىقتالدى.

سونىمەن قاتار، جالعان مەملەكەتتىك نومىرلىك بەلگىلەردى پايدالانعان 8 دەرەك جانە قارسى جولاققا شىققان 15 جاعداي اشكەرەلەندى. بۇل جۇمىستار اياسىندا 2 مىڭنان استام كولىك، ونىڭ ىشىندە شەتەلدىك تىركەلگەن كولىكتەر ارنايى تۇراقتارعا قويىلدى.

جول قاۋىپسىزدىگىنە باسىمدىق

«ءبىز جول قوزعالىسى قاۋىپسىزدىگىنە تىكەلەي اسەر ەتەتىن اۋىر بۇزۋشىلىقتاردى توقتاتۋعا باسا نازار اۋدارامىز. بۇل – جۇرگىزۋشى كۋالىگىنسىز نەمەسە ودان ايىرىلعاننان كەيىن كولىك باسقارۋ، قارسى جولاققا شىعۋ، جالعان نومىرلەردى پايدالانۋ. مۇنداي جاعدايلار ادامداردىڭ ءومىرى مەن دەنساۋلىعىنا ناقتى ءقاۋىپ توندىرەدى، سوندىقتان ءبىزدىڭ ۇستانىمىمىز قاعيداتتى جانە قاتاڭ بولىپ قالا بەرەدى»، - دەدى الماتى قالالىق پوليسيا دەپارتامەنتى اكىمشىلىك پوليسيا باسقارماسىنىڭ باستىعى ءابدىنۇر تاسىبايەۆ.

ەستەرىڭىزگە سالا كەتەيىك، 1 ساۋىردە الماتىدا «توقتا-بۇزۋشىلىق» اتتى اۋقىمدى وپەراسيا باستالدى. بۇل وپەراسياعا قازاقستاننىڭ ءارتۇرلى وڭىرلەرىنەن پوليسيا ەكيپاجدارى تارتىلدى. العاشقى تاۋلىكتە الماتىدا پوليسيا قىزمەتكەرلەرى 2200-دەن استام بۇزۋشىلىقتى انىقتادى.

قالاعا استانا، اقمولا، قاراعاندى جانە جامبىل وبلىستارىنان ەكيپاجداردىڭ تارتىلعانىن ايتا كەتكەن ءجون. ىشكى ىستەر مينيسترلىگىنىڭ حابارلاۋىنشا، قوسىمشا كۇشتەر جولدارداعى ءتارتىپ پەن قاۋىپسىزدىكتى باقىلاۋ ءۇشىن جۇمىلدىرىلعان.

ايتا كەتەيىك، 21 ناۋرىزدا الماتىدا رەزونانستى جول-كولىك وقيعاسى بولعان ەدى. ءال-فارابي جانە مەندىقۇلوۆ كوشەلەرىنىڭ قيىلىسىندا Mercedes پەن Zeekr كولىكتەرى سوقتىعىستى. اپات سالدارىنان ءۇش ادام قازا تاپتى. Mercedes كولىگىنىڭ 29 جاستاعى جۇرگىزۋشىسى مەن 20 جانە 22 جاستاعى ەكى جولاۋشىسى وقيعا ورنىندا كوز جۇمدى. Zeekr كولىگىنىڭ جۇرگىزۋشىسى امان قالىپ، جاراقاتپەن اۋرۋحاناعا جەتكىزىلدى. اپات كەزىندە ول ماس بولعان.

بۇدان بولەك، مەملەكەتتىك نومىرلىك بەلگىلەردى زاڭسىز بەرۋ مۇمكىندىگى تۋرالى مالىمەتتەر بويىنشا، ىشكى قاۋىپسىزدىك دەپارتامەنتى قىلمىستىق ءىس قوزعاپ، ءبىرقاتار لاۋازىمدى تۇلعا قىزمەتىنەن بوساتىلدى.