InfoHub Logo

حالىق ىشىندە مىناداي ءبىر اڭىز بار ەكەن: ەرتەدە اتاقتى ءبىر دومبىراشى جىگىت جولداستارىمەن جولاۋشىلاپ كەلە جاتىپ، سۋسىنداپ الۋ ءۇشىن جول-جونەكەي ءبىر ۇيگە تۇسەدى. بۇلاردىڭ الدىنان ءبىر قاباعان يت شىعىپ ۇيگە كىرگىزبەيدى. سوندا ۇيدەن ءبىر بويجەتكەن قىز شىعادى. جىگىت قاسىنداعى جولداسىنا: «مىناۋ نەتكەن كورگەنسىز ەدى، كەلگەن قوناقتىڭ اتىن بايلاماق تۇگىل، ءيتتى دە قورىمادى-اۋ!» دەيدى. جىگىتتەر ۇيگە كىرسە، قىز ولارعا كوز سالماي، توسەك ۇستىندە كەستە تىگىپ وتىرادى. دومبىراشى جىگىت توسەكتىڭ باس جاعىندا تۇرعان كۇمىستەۋلى دومبىرانى الىپ، شەرتپەكشى بولا بەرگەندە قىز:

— دومبىرانى بەرى اكەلىڭىز، بۇزىپ قوياسىز، — دەيدى. جىگىت اشۋمەن دومبىرانى قىزعا لاقتىرادى. قىز دومبىرانىڭ قۇلاق كۇيىن بۇزىپ تاستاپ:

— شەرتكىش بولساڭىز، ەندى شەرتىڭىز، — دەپ جىگىتكە قايتا بەرەدى. جىگىت قۇلاق كۇيى بۇزىلعان دومبىرامەن ۇزاق ءبىر كۇي شەرتە باستايدى. جىگىت كۇيى قىزدىڭ كوڭىل-كۇيىن تەبىرەنتىپ جىبەرەدى.

قىز كەرگىشتى سۇيەپ قويىپ، جىگىتكە قاراي جىلجي تۇسەدى. جىگىت:

— اۋىلىمىزعا ايتا بارايىق، سىزدە ءبىر كۇي شەرتىپ بەرىڭىز، — دەپ دومبىرانى قىزعا بەرەدى. قىز دا ءبىر كۇي شەرتىپ، دومبىرانى جىگىتكە قايتا ۇسىنادى. جىگىت تاعى اعىتىلىپ ءبىر كۇي شەرتە جونەلەدى. جىگىتتىڭ ونەرىنە ريزا بولعان قىز قىمىز قۇيۋعا ىڭعايلانا بەرگەندە، قولىندا ساۋمال قۇيعان كونەگى بار شەشەسى ۇيگە كىرىپ:

— بۇلارىڭ كىم، يەن ۇيدە دۇرىلدەگەن؟ — دەپ اشۋلانادى. قىز:

— اپا، جولاۋشى ەكەن، سۋسىن ىشكەلى كەلىپتى، — دەپ انا اشۋىنا باسۋ ايتىپ، قىمىز قۇيا باستايدى. قىز دومبىراشى جىگىتكە ءبىر كەسە قىمىز ۇسىنىپ: «كۇيىڭىزدىڭ اتى نە؟» — دەپ سۇرايدى. سوندا جىگىت: بۇل — «اق ەركە» دەگەن كۇي، ال مىناۋ «اق تولقىن»، مىناۋ «جاي تولقىن»، — دەپ وعان قوسا تاعى ەكى كۇي شەرتكەن ەكەن.

ءاشىم وسى اڭگىمەنى ەستىگەننەن كەيىن، بۇل كۇيدىڭ دەرەگىن كوپ ىزدەپ تابا المايدى، اقىرى سول اڭگىمە جەلىسى بويىنشا ءوز الدىنا قىزعا ارناپ، «اق ەركە»، «اق تولقىن» دەگەن ەكى كۇي، كەشىگىپ ويلاناتىن شەشەسىنە ارناپ، «جاي تولقىن» دەپ ءبىر كۇي شەرتەدى.

---