InfoHub Logo

اقىن جەرگىلىكتى جەردەگى باستىقتىڭ ۇيىندە وتىردى. باستىقتىڭ ايەلى اقىنعا شاي قۇيعالى جاتىر ەدى، باستىق ايەلىنە: "شايىڭدى قويا تۇر"، - دەدى دە، اقىنعا قاراپ:

- مىنا بالالارعا ءبىر-بىر شۋماقتان ولەڭ لاقتىرىپ-لاقتىرىپ جىبەرشى، - دەدى.

باستىقتىڭ بالالارى كوپ ەدى. اقىن سۇيكەكتەتىپ جازىپ وتىرىپ: "ەسىل ەرىم-اي! ازاماتىم-اي! بالانى دا تاپتىرعان ەكەن"، - دەپ باستىققا ىشتەي رازى بولىپ وتىردى.

- اعاڭنىڭ بولمەسىنە بارشى، - دەدى باستىق تۇلىمشاعى سەلتيىپ تۇرعان كىشكەنتاي قىزىنا. - اعاڭنىڭ بولمەسىندەگى سۋرەتتەردىڭ ءبارىن وسىندا الىپ كەل.

- مىناۋ الماتىدا وقىپ جاتقان ۇلىمىز ەدى، - دەدى باستىق سۋرەتتەردى اقىننىڭ الدىنا توسا بەرىپ. - وسىعان قاراپ وتىرىپ تا بىر-ەكى شۋماق ولەڭدى لاقتىرىپ-لاقتىرىپ جىبەرشى.

- وسى يت قايدا؟ - دەدى باستىق ايەلىنە. سوسىن اقىندى جەڭىنەن تارتتى: - ءجۇرشى!

- ءاي، يت قايدا؟ - دەدى باستىق اۋلاعا شىعىپ الىپ. - ا، مۇندا ساكىنىڭ استىندا جاتىر ەكەن عوي. ءوزىڭ ەڭكەيىپ قاراشى ساكىنىڭ استىنا. بايقا، قاۋىپ الىپ جۇرمەسىن.

- مىسىقتارىڭىز جوق پا ەدى؟ - دەدى اقىن.

- مىسىق دەيسىڭ بە؟ ءاي، ءبىزدىڭ ءۇيدىڭ مىسىعى قايدا؟! ا، مۇندا شاتىردىڭ ۇستىندە ءجۇر ەكەن عوي. ءوزىڭ شىقشى شاتىردىڭ ۇستىنە. ابايلا! مىنا مىسىق اقىندى كورە سالىپ تۇرا قاشتى عوي! ءاي، قايدا كەتتىڭ؟! سەكىرمە دەيمىن، ويباي! ءوي، مىنا اقىن دەگەن حالىق ولەرمەن حالىق بولادى ەكەن عوي؟! مىسىقتىڭ سەكىرگەن جەرىنەن سەكىرگەنى نەسى؟!

باستىق تومپاڭداپ ءۇيدى اينالىپ كەلگەن كەزدە، مىسىقتى قۇشاقتاي قۇلاپ جاتقان اقىندى كوردى.

- اۋ، نە ىستەپ جاتىرسىڭ مىسىقتى قۇشاقتاپ؟! - دەدى باستىق اقىنعا.

- ەندى قايتەيىن-اي! - دەدى اقىن ەنتىگە سويلەپ. - ءوزىم جولسوقتى بولىپ كەلىپ ەدىم. باسىمدى شاي دا قىسىپ بارا جاتىر. "ۇل" ەكەنىن نەمەسە "قىز" ەكەنىن كورىپ الىپ جاتقانىم عوي، ولەڭگە ءبىر كەرەگى بولا ما دەپ.

اقىن سول كۇنى باستىقتىڭ ۇيىنەن شاي ءىشىپ اتتاندى.

---