InfoHub Logo

ءبىر كىشكەنتاي قالانىڭ جالعىز عانا اقىنى بولىپتى. ءبىر كۇنى سول اقىن 60-قا تولعان كەزدە، سول قالانىڭ اكىمى اقىنىنا سىي-سياپات كورسەتەدى. جىلى سوزدەرىن ارنايدى. "ءسىز ءبىزدىڭ قالامىزدىڭ جالعىز اقىنىسىز، - دەيدى اكىم اقىنعا. - 60 جاسىڭىز قۇتتى بولسىن! سىزگە ءالى دە تولاعاي شىعارماشىلىق شابىتتار تىلەيمىن!"

سودان كەيىن ءبىرشاما ۋاقىت ءوتتى. ءبىر كۇنى وسى قالادان شىعاتىن گازەتكە اقىننىڭ ولەڭى باسىلىپ شىعادى. اكىم الگى ولەڭدى وقىپ وتىرىپ، كوڭىلى نىلدەي بۇزىلدى. وعان اقىننىڭ شابىتى قايتىپ قالعان سياقتى كورىندى. دەرەۋ اقىندى وزىنە الدىرتتى.

- ءسىز ءبىزدىڭ قالامىزدىڭ جالعىز اقىنىسىز، - دەدى اكىم اقىنعا.  - مەن قالانىڭ حالقى ءبىر نارسەدەن تارشىلىق كورىپ قالماۋ ءۇشىن ۇنەمى جىگىتتەرگە تاپسىرما بەرىپ وتىرامىن. ءبىراق ءبىزدىڭ قالانىڭ حالقىنا ولەڭ دە كەرەك. ەندەشە، مەن جۇمىستى جىگىتتەرمەن بىردەي سىزدەن دە تالاپ ەتەم. نەگە ءسىزدىڭ شابىتىڭىز كەمىپ ءجۇر؟ ءبىز سىزگە بارلىق جاعدايدى جاساپ قويعان جوقپىز با؟

- بارلىق جاعدايدى جاساپ قويعانىڭىز راس، - دەدى اقىن اكىمگە. - ءبىراق ءسىز ايتىپ وتىرعان نارسەلەر اقىننىڭ شابىتىن تۋدىرمايدى.

- اقىننىڭ شابىتىن ەندى نە تۋدىرادى؟

- اقىننىڭ شابىتىن قىز، قىزدار تۋدىرادى. وسى كۇنى قىزدار دەگەن شابىت بەرۋدى قويدى. كەي قىزدارىمىز شەتەلدىكتەردىڭ بەتىنە قاراپ جىمياتىن ادەت شىعاردى. شەتەلدىكتەردىڭ بەتىنە قاراپ جىميعاننان نە شىعادى؟ بىلدىر-بىلدىر، ءشۇلدىر-شۇلدىر دەگەن ءسوز شىعادى. شابىتىمنىڭ كەمىپ كەتۋىنە وسى قىزدار كىنالى، - دەدى اقىن.

- مەن - اكىممىن! - دەدى اكىم. - اكىم ارالاسسا، شەشىمىن تاپپايتىن ماسەلە دەگەن بولمايدى. ءبىز بۇل ماسەلەنى دە قولعا الامىز.

سول كۇنى اكىم جىگىتتەرىن جيناپ الدى.

- قالامىزدا جالعىز عانا اقىن بار، - دەدى اكىم جىگىتتەرىنە. - ءبىز ول كىسىنىڭ شابىتىنىڭ نە جاعدايدا جۇرگەنىنە نازار اۋدارمايدى ەكەنبىز.

جىگىتتەر كۇڭكىلدەي باستادى:

- ول كىسىگە تاعى نە كەرەك بوپ قالدى ەكەن؟ بار جاعدايدى جاساپ قويعان جوقپىز با؟
ەندى نە دەيدى ول كىسى بىزگە؟

- سىزدەر ايتىپ وتىرعان نارسەلەردىڭ ەشقايسىسى اقىننىڭ شابىتىن تۋدىرمايدى ەكەن، - دەدى اكىم. - اقىننىڭ شابىتىن تەك قىز، قىزدار تۋدىرادى ەكەن. سوندىقتان مەكەمە-مەكەمەدەگى قىزدارعا ايتىڭىزدار. ەڭ سۇلۋ، ەڭ ادەمى، جان-دۇنيەسى باي، تالعام تارازىسى بيىك قىرىق قىز ىرىكتەلىپ الىنسىن. سول قىرىق قىز ەرتەڭنەن باستاپ اقىندى قورشالاپ جۇرەتىن بولسىن. قىزمەتىنە بارعانشا، قىزمەتىنەن قايتقانشا. بارعانشا، قايتقانشا. قورشالاپ. قاۋمالاپ. جەلپىپ. سىڭعىر-سىڭعىر كۇلكى. ادەمى جىميىس. ەرتەڭنەن باستاپ سول قىرىق قىزدىڭ ورتاسىندا بالپاڭ-بالپاڭ باسىپ كەلە جاتقان اقىندى كورەتىن بولايىن. اقىن ءوزىن بەينە ءبىر گۇل جاپقان دالامەن كەلە جاتقانداي سەزىنەتىن بولسىن.

سول ءتۇنى قالاداعى بارلىق مەكەمەنىڭ شامى سونبەي تۇرىپتى دەسەدى. مەكەمەنىڭ ءبىرىنشى باسشى جىگىتتەرى: "كۇن سايىن قىزمەتكە بارىپ، كەلەمىن دەگەنشە، قىرىق قىزدىڭ قورشاۋىندا جۇرەتىن بولساڭ، مىناۋ ءبىر راقات دۇنيە عوي. وزگە دۇنيەنىڭ ءبارىن تارك ەتتىم. ەندىگى عۇمىرىمدى
تەك اقىندىققا ارنايمىن"، - دەپ وزدەرى بىر-بىرىنەن جاسىرىپ ولەڭ جازىپ وتىرىپتى.

---