InfoHub Logo

امەريكا قۇراما شتاتتارىنىڭ سەناتورى دجون وسوفف، ترامپ اۋلەتىنىڭ قازاقستانمەن بايلانىستى ۆولفرام جوباسىنا قاتىسى بار ەكەنىن مالىمدەپ، داۋ تۋدىردى. ونىڭ ايتۋىنشا، بۇل مامىلە جەمقورلىقتىڭ بەلگىسى جانە وعان 1،6 ميلليارد دوللار سالىق تولەۋشى اقشاسى جۇمسالۋى مۇمكىن.

بۇل تۋرالى Infohub.kz اقپارات اگەنتتىگى حابارلايدى.

ترامپتىڭ ۇلدارى مەن قازاقستان ۆولفرامى

سەناتور وسوففتىڭ ايتۋىنشا، قازاقستان پرەزيدەنتى قاسىم-جومارت توقايەۆ وتكەن قىركۇيەكتە ترامپقا قوڭىراۋ شالىپ، ۆولفرام ءوندىرۋ قۇقىعىن امەريكاندىق كومپانياعا بەرگىسى كەلەتىنىن جەتكىزگەن. وسىدان كەيىن ءبىر اي وتكەن سوڭ، دونالد ترامپتىڭ ۇلدارى، كىشى دونالد جانە ەريك، بۇل كەلىسىمگە ۇمتىلعان كومپانيادان ۇلەس العان.

وسوفف بۇل جاعدايدى سىنعا الىپ، «ەريك پەن دون سكايلاين كومپانياسىنان ۇلەس العاسىن قازاقتار الگى كومپانياعا الەمدەگى ەڭ ءىرى يگەرىلمەگەن ۆولفرام رەسۋرسىن بەرە سالدى» دەپ مالىمدەدى. ونىڭ سوزىنشە، بۇدان كەيىن ترامپ باسقاراتىن اق ءۇي قازاقستانداعى كەن جوباسىن قارجىلاندىرۋ ءۇشىن 1،6 ميلليارد دوللار ءبولۋ تۋرالى شەشىم قابىلداعان.

ۆولفرامنىڭ ماڭىزى جانە ترامپتاردىڭ ءرولى

سەناتور وسوفف بۇل جاعدايعا قىنجىلىس ءبىلدىرىپ، «امەريكالىقتار بەنزينگە، ازىق-تۇلىككە، مەديسينالىق قىزمەتكە اقشا تاپپاي وتىر. ال مىندا 1،6 ملرد دوللار سالىق تولەۋشىنىڭ اقشاسى قازاقستانعا باعىتتالماق» دەدى.

ترامپتىڭ ۇلدارى سكايلاين كومپانياسىنا كىرگەننەن كەيىن، ولار Cove Capital-مەن بىرىگىپ Kaz Resources كومپانياسىن قۇراتىنىن حابارلاعان. بۇل كومپانيا قاراعاندى وبلىسىنداعى سولتۇستىك قاتپار جانە جوعارعى قايراقتى ۆولفرام كەن ورىندارىنىڭ شامامەن 70 پايىزىنا يەلىك ەتەدى.

ۆولفرام – قورعانىس، اۆياسيا، ەلەكترونيكا جانە ءوندىرىس سالالارىندا كەڭىنەن قولدانىلاتىن ماڭىزدى مەتالل. اقش بەيجىڭگە تاۋەلدىلىكتى ازايتۋ ماقساتىندا قازاقستانداعى كەن جوبالارىنا قىزىعۋشىلىق تانىتۋدا. ترامپتىڭ ۇلدارى بۇل جوبادا ءوزىن پاسسيۆ ينۆەستور رەتىندە كورسەتۋگە تىرىسقانىمەن، سەناتور وسوفف ولاردىڭ ارەكەتىن سىنعا الدى. استانا بۇل ايىپتاۋلارعا ازىرگە رەسمي جاۋاپ بەرگەن جوق.