InfoHub Logo

اقتاۋ قالاسىندا ناۋرىز ايىنىڭ 23-29 كۇندەرى ارالىعىندا قوعامدىق-گۋمانيتارلىق باعىتتاعى جالپى ءبىلىم بەرەتىن پاندەردەن رەسپۋبليكالىق وليمپيادا ءوتىپ جاتىر. كەشە، 24 ناۋرىز كۇنى ماڭعىستاۋ وبلىسىنىڭ اكىمى ەرالى توعجانوۆ وليمپيادانىڭ سالتاناتتى اشىلۋ راسىمىنە قاتىستى، دەپ حابارلايدى ماڭعىستاۋ وبلىسى اكىمىنىڭ باسپا ءسوز قىزمەتى.

- بۇل سىنعا قاتىسۋ ۇلكەن ابىروي عانا ەمەس، ءار ءوڭىر مەن مەكتەپ اتىنان كەلىپ وتىرعان قاتىسۋشىلار ءۇشىن ۇلكەن جاۋاپكەرشىلىك. ءسىزدىڭ جەڭىسىڭىز قازاقستاندىق ءبىلىمنىڭ باسەكە قابىلەتتىلىگىن ارتتىرۋعا كومەكتەسەتىن بولادى. ويتكەنى سىزدەر ەلىمىزدىڭ زياتكەرلىك الەۋەتىن قۇرايسىزدار. ءسىزدىڭ ءبىلىمىڭىز، شىعارماشىلىعىڭىز بەن تالانتىڭىز قازاقستاننىڭ بولاشاعىن وركەندەتۋ جولىندا وتە قاجەت، - دەپ اتاي وتىرىپ، ەرالى توعجانوۆ وليمپيادا قاتىسۋشىلارىنا ساتتىلىك تىلەدى.

ن. ءجانتورين اتىنداعى مۋزىكالىق-دراما تەاترىنىڭ حولىندا وليمپيادا قاتىسۋشىلارى مەن ءادىلقازىلار القاسىنا ارناپ ماڭعىستاۋ وبلىسىنىڭ ۇلتتىق تاعامدارى مەن قولدانبالى ونەر بۇيىمدارىنان كورمە قويىلىپ، «كيەلى مەكەن - ماڭعىستاۋ!» اتتى ادەبي-مۋزىكالىق كومپوزيسيا وينالدى.

سونداي-اق، ماڭعىستاۋ وڭىرىندە ەلىمىزدىڭ تۇكپىر-تۇكپىرىنەن شىققان وليمپيادا  ۇزدىكتەرى قاۋىشتى. استانا جانە الماتى قالاسى، اقمولا، اقتوبە، الماتى، اتىراۋ، باتىس قازاقستان، جامبىل، قاراعاندى، قوستاناي، قىزىلوردا، سولتۇستىك-قازاقستان، وڭتۇستىك-قازاقستان، پاۆلودار، شىعىس قازاقستان وبلىستارى، الماتى قالاسىنداعى ورىنبەك جاۋتىكوۆ اتىنداعى  رەسپۋبليكالىق مامانداندىرىلعان فيزيكا-ماتەماتيكالىق ورتا مەكتەپ-ينتەرناتى، الماتى، ورال، اتىراۋ، وسكەمەن قالالارىنداعى نازاربايەۆ زياتكەرلىك مەكتەبى، الماتى قالاسىنداعى «بوبەك» ۇلتتىق عىلىمي-پراكتيكالىق ءبىلىم بەرۋ جانە ساۋىقتىرۋ ورتالىعىنىڭ «ءوزىن-وزى تانۋ» گيمنازياسى، الماتى قالاسىنىڭ اباي اتىنداعى دارىندى وقشۋلارعا ارنالعان  رەسپۋبليكالىق مەكتەپ-ينتەرناتى اتىنان شىعاتىن 21 كوماندادان بارلىعى 586 وقۋشى ب ا ق سىناساتىن بولادى. ماڭعىستاۋ وبلىسىنىڭ نامىسىن 41 وقۋشى قورعايدى.

وتكەن جىلعى وليمپيادا جەڭىمپازدارى ونلاين-ترانسلياسيا ارقىلى الداعى زياتكەرلىك سايىس قاتىۋشىلارىنا ساتتىلىك تىلەدى.

وليمپيادا قوعامدىق-گۋمانيتارلىق باعىتتاعى پاندەردى قامتيدى. وقۋشىلار قازاق ءتىلى مەن ادەبيەتى، ورىس ءتىلى مەن ادەبيەتى، قازاق مەكتەپتەرىندە وقيتىن وقۋشىلار ورىس ءتىلى پانىنەن، ورىس ءتىلى مەكتەبىندە وقيتىن وقۋشىلار قازاق ءتىلى پانىنەن، فرانسۋز ءتىلى، نەمىس ءتىلى جانە اعىلشىن ءتىلى، قازاقستان تاريحى جانە قۇقىقتانۋ نەگىزدەرى پاندەرىنەن سايىسقا تۇسەتىن بولادى.

وليمپيادانىڭ ءى، ءىى تۋرى 25 جانە 26 ناۋرىز كۇندەرى «ءبىلىم - يننوۆاسيا» وبلىستىق ليسەيىنىڭ بازاسىندا وتەدى.

27 ناۋرىز كۇنى ۇيلەستىرۋ جۇمىستارىن جۇرگىزۋ جوسپارلانۋدا.

28 ناۋرىز كۇنى وليمپيادا قورىتىندىسى شىعىپ، جەڭىمپازداردى ماراپاتتاۋ ءراسىمى بولادى.

بوس ۋاقىتتا وليمپيادا قاتىسۋشىلارىنا ارناپ مادەني-تانىمدىق، سپورتتىق، ويىن-ساۋىق شارالارى ۇيىمداستىرىلادى.

---