InfoHub Logo

اقتاۋدا ارتىق مايدان ارىلۋ ءۇشىن وتا جاساتقان ماڭعىستاۋ وبلىسى ءماسليحاتىنىڭ دەپۋتاتى، KazPetroDrilling كومپانياسىنىڭ وڭىرلىك ۆيسە-پرەزيدەنتى ەربول ايتۋوۆ قايتىس بولدى. بۇل تۋرالى Infohub.kz اقپارات اگەنتتىگى حابارلايدى.

مارقۇم يەك استىنداعى مايدى ليپوساكسيا ادىسىمەن الدىرۋ ءۇشىن اقتاۋداعى جەكەمەنشىك «قاسيەت» كلينيكاسىنا بارعان. وپەراسيا 4 ساۋىردە جاسالعانمەن، كوپ ۇزاماي ناۋقاستىڭ جاعدايى كۇرت ناشارلاپ، كوماعا تۇسكەن. وكىنىشكە وراي، ءبىر ايدان كەيىن، 5 مامىردا ول كوز جۇمدى.

وتباسى دارىگەرلەردى كىنالايدى

مارقۇمنىڭ جۇبايى لاۋرا ايتۋوۆانىڭ ايتۋىنشا، وتا الدىنداعى تالداۋلار جەتكىلىكسىز زەرتتەلگەن. ول ەربول ايتۋوۆتىڭ قانىنداعى قانت مولشەرى جوعارى بولعانىنا قاراماستان، دارىگەرلەردىڭ وپەراسيا جاساعانىن العا تارتادى. «انەستەزيولوگ ينتۋباسيانى دۇرىس جاساي الماي، تاماعىنا زاقىم كەلتىردى. سونىڭ سالدارىنان كۇيەۋىمنىڭ قان قىسىمى مەن قانداعى قانت مولشەرى كۇرت كوتەرىلىپ، ينسۋلت الدى»، – دەيدى لاۋرا ايتۋوۆا.

ونىڭ سوزىنشە، كلينيكا قىزمەتكەرلەرى باستاپقىدا ناۋقاستىڭ اۋىر جاعدايىن وتباسىنا تولىق ايتپاعان. كەيىننەن عانا ناۋقاس وبلىستىق اۋرۋحاناعا جەتكىزىلگەنى بەلگىلى بولدى. ايتۋوۆا كلينيكانى سالعىرتتىقتا ايىپتاپ، كىنالىلەردىڭ جاۋاپقا تارتىلۋىن تالاپ ەتىپ وتىر.

كلينيكادا زاڭبۇزۋشىلىقتار انىقتالدى

مەديسينالىق جانە فارماسيەۆتيكالىق باقىلاۋ كوميتەتىنىڭ ماڭعىستاۋ وبلىسى بويىنشا دەپارتامەنتى جۇرگىزگەن تەكسەرىس بارىسىندا كلينيكادا ءبىرقاتار زاڭبۇزۋشىلىق انىقتالدى. وتا جاسالاتىن ءبولىم قاجەتتى قۇرالدارمەن تولىق جابدىقتالماعانى، كەيبىر اسپاپتاردىڭ مەرزىمى ءوتىپ كەتكەنى جانە شۇعىل كومەككە ارنالعان ارنايى قۇرىلعىلاردىڭ جوق ەكەنى بەلگىلى بولدى. سونداي-اق، انەستەزيولوگيا جانە رەانيماتولوگيا قىزمەتىنە قاتىستى ليسەنزيالىق قۇجاتتاردىڭ دا تولىق ەمەستىگى انىقتالدى.

كوميتەت ماماندارى ناۋقاستىڭ وپەراسيا الدىندا تولىق تەكسەرۋدەن وتپەگەنىن راستادى. ءساتسىز ينتۋباسيا انەستەزيا كەزىندە ميعا وتتەگىنىڭ جەتىسپەۋىنە اكەلۋى مۇمكىن دەگەن بولجام جوققا شىعارىلمايدى. بۇل دەرەك بويىنشا اكىمشىلىك قۇقىقبۇزۋشىلىق تۋرالى كودەكستىڭ 464-بابىمەن حاتتاما تولتىرىلىپ، تەكسەرۋ ماتەريالدارى پروكۋراتۋراعا جولدانباق.