InfoHub Logo

اقتاۋداعى «اقبوتا» ساياباعىن جاڭارتۋ جۇمىستارى باستالماستان بۇرىن، ونداعى كاسىپكەرلەر نارازىلىق ءبىلدىرىپ، جۇمىستىڭ الدىن الدى. كاسىپكەرلەر الداعى رەكونسترۋكسياعا بايلانىستى تابىس كوزدەرىنەن ايىرىلىپ قالۋدان قورقاتىنىن ايتىپ، ولارعا بيزنەس جۇرگىزۋ ءۇشىن بالاما ورىندار ۇسىنىلماعانىن مالىمدەدى. قالا اكىمى ءابىلقايىر بايپاقوۆ كاسىپكەرلەرمەن كەزدەستى.

بۇل تۋرالى Infohub.kz اقپارات اگەنتتىگى حابارلايدى.

ساياباق اۋماعىنداعى كاسىپكەرلەردىڭ نارازىلىعى

كەشە، ماۋسىمنىڭ 3ء-ى كۇنى، جوندەۋ جۇمىستارىن باستاۋ ءۇشىن ساياباقتى قورشاۋ جوسپارلانعان ەدى. الايدا، ونداعان كاسىپكەر جينالىپ، وزدەرىنىڭ نارازىلىقتارىن ءبىلدىردى. كاسىپكەرلەردىڭ كوبى ساياباقتا ماۋسىمدىق ساۋدامەن جانە ويىن-ساۋىق قىزمەتتەرىن كورسەتۋمەن اينالىسادى. ولار جەرگىلىكتى بيلىكتەن رەكونسترۋكسيانى كۇز ايىنا، ياعني كانيكۋل جانە تۋريستىك ماۋسىم اياقتالعان كەزدە كەيىنگە قالدىرۋدى سۇرادى.

كاسىپكەرلەردىڭ ايتۋىنشا، 2019 جىلى قالا بيلىگى ولاردى ساياباق اۋماعىنا ورنالاسۋعا شاقىرعان. ەندى ولاردان ەشقانداي ناقتى ۇسىنىسسىز كەتۋدى تالاپ ەتىپ وتىر. «قايدا بارارىمىزدى بىلمەيمىز. مۇندا 50-گە جۋىق كاسىپكەر جۇمىس ىستەيدى. كوبى ءۇشىن بۇل جالعىز تابىس كوزى. ءبىز مۇمكىن ەمەس نارسەنى سۇراپ وتىرعان جوقپىز – تەك جۇمىس ىستەۋگە باسقا ورىن بەرسەڭىزدەر بولدى. ءبىز سالىق تولەيمىز، ءار جارتى جىلدا 700-800 مىڭ تەڭگە تولەيمىز»، – دەيدى كەزدەسۋگە قاتىسۋشىلار.

اكىمدىكتىڭ جاۋابى

اقتاۋ قالالىق اكىمدىگى ساياباقتا اۋقىمدى اباتتاندىرۋ جوباسى باستالاتىنىن راستادى. جوبا اياقتالعاننان كەيىن كاسىپكەرلەر قازىرگى ۋاقىتتا يەلەنىپ وتىرعان اۋماقتارىندا جۇمىسىن جالعاستىرا المايدى. كاسىپكەرلەر مەن بيزنەس وكىلدەرىنىڭ قالا اكىمى ءابىلقايىر بايپاقوۆپەن كەزدەسۋى ۇيىمداستىرىلدى. اكىم كاسىپكەرلەرگە ءوز بيزنەسىن قايدا كوشىرۋگە بولاتىنىن تالقىلاۋدى ۇسىندى. «ءبىز ءبارىمىز قازاقستان ازاماتتارىمىز، سوندىقتان سىزدەردەن ءوتىنىپ سۇرايمىن: ماسەلەنى شەشۋ ءۇشىن، سىزدەردىڭ بيزنەستەرىڭىزدى قاي نۇكتەگە كوشىرۋگە بولاتىنىن تالقىلايىق – ءىرى ساۋدا ورتالىقتارى، ءىرى بازارلار بار، مۇمكىندىكتەردى تالقىلايىق»، – دەدى كەزدەسۋدە ءابىلقايىر بايپاقوۆ.

كەلىسسوزدەر قورىتىندىسى بويىنشا، اكىمنىڭ ورىنباسارىنىڭ باسشىلىعىمەن ارنايى جۇمىس توبىن قۇرۋ تۋرالى شەشىم قابىلداندى. ونىڭ نەگىزگى مىندەتى – بيزنەستى ورنالاستىرۋ ءۇشىن بالاما الاڭداردى ىزدەۋ جانە كوشىرۋ پروسەسىن سۇيەمەلدەۋ.

قالا اكىمدىگى «اقبوتا» ساياباعىنىڭ رەكونسترۋكسياسى اقتاۋداعى سوڭعى جىلدارداعى ەڭ ءىرى ينفراقۇرىلىمدىق جوبالاردىڭ ءبىرى ەكەنىن اتاپ ءوتتى. جۇمىستارعا NCOC كومپانياسىنىڭ دەمەۋشىلىك قاراجاتى ەسەبىنەن قارجىلاندىرىلادى.

اكىمدىك ساياباق اۋماعىندا كاسىپكەرلىك قىزمەتتىڭ زاڭنامادا قاراستىرىلعان ساۋدا نىساندارىن ورنالاستىرۋعا رۇقسات بەرۋ قۇجاتتارىنسىز جۇرگىزىلگەنىن اتاپ ءوتتى. سوعان قاراماستان، بيلىك اۋماقتى بوساتۋمەن شەكتەلمەي، كاسىپكەرلەرگە جۇمىس ىستەۋگە جاڭا الاڭدار تابۋعا كومەكتەسۋگە نيەتتى ەكەنىن مالىمدەدى.

كاسىپكەرلەر رەكونسترۋكسياعا قارسى ەمەس ەكەنىن، ءبىراق جازعى ماۋسىم مەن تابىس كوزىن جوعالتپاۋ ءۇشىن ناقتى كوشۋ نۇسقالارىن ۇسىنۋدى سۇراپ وتىر.