InfoHub Logo

اتىراۋداعى سوت پروسەسىندە مارقۇم ناۋرىز مۇقانعالييەۆتىڭ كورشىسى شەرحان ەڭسەگەنۇلىمەن جازىسقان حاتتارى جۇرتشىلىق نازارىنا ۇسىنىلدى. تەرگەۋ ورگاندارىنىڭ بولجامىنا سايكەس، بۇل حاتتاردى ناۋرىزدىڭ اتىنان ونى ءولتىردى دەگەن كۇدىككە ىلىنگەن سۇلتان سارسەمالييەۆ جازعان.

بۇل تۋرالى Infohub.kz اقپارات اگەنتتىگى حابارلايدى.

سوتتا انىقتالعانداي، شەرحان ەڭسەگەن ۇلى مەن ناۋرىز مۇقانعالييەۆ جاقىن دوس بولعان. ولار ۇنەمى بىر-بىرىنە داۋىستىق حابارلامالار ارقىلى حابارلاسىپ تۇرعان. الايدا، 2025 جىلدىڭ 5 قاراشاسىنان باستاپ شەرحانعا ناۋرىزدىڭ اتىنان ماتىندىك حابارلامالار كەلە باستاعان. تەرگەۋ نۇسقاسى بويىنشا، بۇل حابارلامالاردىڭ بارلىعىن ناۋرىز قايتىس بولعاننان كەيىن سۇلتان سارسەمالييەۆ جازعان.

مالعا قاراۋ تۋرالى العاشقى ءوتىنىش

سارسەمالييەۆتىڭ العاشقى حابارلامالارى مالعا قاتىستى بولعان. ول كەشكە مالدى اۋلاعا كىرگىزىپ قويۋدى ءوتىنىپ، ۇيدە ەشكىم جوق ەكەنىن ايتقان. كورشىسى بۇل ءوتىنىشتى ورىنداپ، ۋاقىتىن ناقتىلاعان سوڭ، كەشكە حابارلامانىڭ ورىندالعانى تۋرالى وڭ جاۋاپ العان.

قارىز جانە ۇيلەنۋ تويى

كەلەسى كۇنى «ناۋرىز» اتىنان تاعى ءبىر ءوتىنىش تۇسكەن. بۇل جولى تاڭەرتەڭ قوي مەن سيىردى ورىسكە جىبەرۋدى سۇراپ، اقىسىنا اقشا اۋداراتىنىن ايتقان. الايدا، كورشىسى اقشادان باس تارتىپ، جاعدايدىڭ انىق-قانىعىن سۇراعان. وعان ناۋرىزدىڭ اتا-اناسىنىڭ قالادا ەم قابىلداپ جاتقانى جانە قاشان كەلەتىنى بەلگىسىز ەكەنى تۋرالى جاۋاپ بەرىلگەن. مالعا سۋ بەرۋ قاجەتتىلىگى تۋرالى سۇراققا، اتا-اناسى كەلگەن سوڭ وزدەرى قارايتىنى ايتىلىپ، سۋدىڭ قاجەتى جوق ەكەنى حابارلانعان.

كەيىننەن حات الماسۋ جالعاسىپ، حابارلاما جازعان ادام اتا-اناسىنىڭ ءالى ورالماعانىن ايتىپ، كورشىسىنەن شارۋاشىلىققا قاراپ تۇرۋدى سۇراعان. سونىمەن قاتار، ءجيى ءوتىنىش ايتىپ جاتقانى ءۇشىن رەنجىمەۋىن وتىنگەن. ول اكەسىنىڭ بۇرىن مال قاراۋدى باسقا ادامعا تاپسىرعانىن، ءبىراق سول ادامنىڭ ىشىمدىككە سالىنىپ كەتكەنىن ايتىپ، كورشىسىنەن كومەك سۇراۋعا ءماجبۇر بولعانىن جەتكىزگەن.

كۇدىكتى مالشى

شەرحان ەڭسەگەن ۇلى بىرنەشە كۇن بويى مالعا قاراپ جۇرگەن. كەيىننەن دارحان باقىتوۆ ەسىمدى مالشى تابىلعان. سوت بارىسىندا انىقتالعانداي، سارسەمالييەۆ ناۋرىزدىڭ اتىنان ەكى جىلدان كەيىن ءدال وسى اداممەن بايلانىسقا شىققان.

كورشىنىڭ كۇدىگى

بۇل جاعدايدا ءبىر سىر بارىن العاش بولىپ كورشى شەرحان سەزگەن. مال ساتىلا باستاعاندا ول كۇدىكتەنە باستاپ، «ءبىر نارسەگە ۇرىنىپ قالدىڭ با؟»، «ماكەن قايدا؟»، «سەندە ءبىر ماسەلە بار سياقتى»، «ايتساڭ، كومەكتەسەمىن عوي، ءبىز كورشى ەمەسپىز بە؟» دەپ ناقتىلاپ سۇراعان.

بۇعان جاۋاپ رەتىندە سارسەمالييەۆ ناۋرىزدىڭ اتىنان ادامداردىڭ مازاق ەتكەنىن قالامايتىنىن، قارجىلىق قيىندىقتارعا بايلانىستى ماسەلەلەرى بار ەكەنىن جازعان. سونداي-اق، قازىرگى ۋاقىتتا شارۋاشىلىقپەن ءوزى اينالىسا الماي جۇرگەنىن، قارىزى كوبەيىپ كەتكەنىن، اناسىنىڭ ۋايىمداپ، قان قىسىمى كوتەرىلىپ توسەك تارتىپ قالعانىن ايتقان. بۇدان بولەك، ۇيلەنگەلى جۇرگەنىن، سوندىقتان اكەسىنىڭ مال ساتۋعا رۇقسات بەرگەنىن حابارلاعان.