اقتوبە وبلىسىندا اۋىل اكىمى وزىنە قول سالماق بولدى
اقتوبە وبلىسى العا اۋدانىنا قاراستى اۋىلداردىڭ ءبىرىنىڭ 47 جاستاعى اكىمى وز-وزىنە قول جۇمساماق بولدى. وقيعا 7 شىلدە كۇنى بولعان. اقپاراتتى اۋدان باسشىسى اسلانبەك شۇيىنشالييەۆ راستادى.
اكىمنىڭ ءومىرىن ونىڭ جۇبايى ساقتاپ قالدى. ايەلى دەر كەزىندە ارەكەت ەتىپ، وقيعانىڭ قايعىلى اياقتالۋىنا جول بەرمەگەن. شەنەۋنىك اۋىر حالدە اۋرۋحاناعا جەتكىزىلدى، قازىرگى تاڭدا جاعدايى تۇراقتالعان، ول پالاتاعا اۋىستىرىلدى.
اۋدان اكىمى وقيعانىڭ سەبەپتەرى جايلى اشىپ ايتپادى، تەك بۇل جەكە ماسەلە ەكەنىن اتاپ ءوتتى. ال پوليسيا وقيعا بويىنشا سوتقا دەيىنگى تەرگەۋ امالدارىن باستاعانىن حابارلادى. تەرگەۋ ناتيجەلەرى بويىنشا وقيعانىڭ ءمان-جايى انىقتالاتىن بولادى.
بۇل – اقتوبە وبلىسىندا تىركەلگەن العاشقى جاعداي ەمەس. 2022 جىلدىڭ جەلتوقسان ايىندا العا اۋدانىنىڭ قارابۇلاق اۋىلىندا اۋىل اكىمى ەرنار ماحامبەتوۆ جانجال كەزىندە پىشاق جاراقاتىنان كوز جۇمعان بولاتىن. قىلمىسقا كۇدىكتى ازامات كەيىن سەگىز جىلعا سوتتالعان.
ساراپشىلاردىڭ پىكىرىنشە، جەرگىلىكتى اكىمدەرگە تۇسەتىن الەۋمەتتىك، ساياسي جانە وتباسىلىق قىسىم ءجيى ەسكەرۋسىز قالادى. بۇل جاعداي تاعى ءبىر مارتە اۋىل اكىمدەرىنىڭ پسيحولوگيالىق قاۋىپسىزدىگى مەن قولداۋ جۇيەسىنىڭ السىزدىگىن كورسەتىپ وتىر.
ازىرگە اۋىل اكىمىنىڭ وزىنە قول سالۋعا نە ءۇشىن بارعانى بەلگىسىز. وقيعاعا قاتىستى تەرگەۋ ءجۇرىپ جاتىر. ماماندار بۇل جاعدايدى جەرگىلىكتى بيلىك وكىلدەرىنىڭ الەۋمەتتىك ءال-اۋقاتىن باعالاۋ مەن قولداۋ قاجەتتىگىنىڭ بەلگىسى دەپ وتىر.
You Might Also Like
-
Air Astana اۋە كومپانياسى 28 ماۋسىمنان باستاپ اتىراۋ–دۋباي باعىتى بويىنشا رەيستەردى ۋاقىتشا توقتاتتى. بۇعان ۇشۋ ۋاقىتىنىڭ ەداۋىر ۇزارۋى سەبەپ بولعان.
-
الماتىدا موپەد ايداپ قاشقان كۇدىكتى پوليسەيدى سۇيرەپ اكەتتى،ءبىراق الىسقا ۇزاي المادى— دەپ حابارلايدى Infohub ءتىلشىسى.
