InfoHub Logo

شىمكەنتتە كاسىپكەرلەر مەن جەرگىلىكتى بيلىك اراسىندا داۋلى جاعداي تۋىندادى. ArtSportEdu جەتكىزۋشىلەر قاۋىمداستىعى ءبىرىڭعاي مەملەكەتتىك تاپسىرىستىڭ پيلوتتىق جوباسى اياسىندا ەنگىزىلگەن جاڭا شارتتارعا كەلىسپەي، قالالىق اكىمدىكتى سوتقا بەرگەنىن مالىمدەدى.

قاۋىمداستىق وكىلدەرىنىڭ ايتۋىنشا، جوباعا ەنگىزىلگەن وزگەرىستەر جەتكىزۋشىلەرمەن الدىن الا تالقىلانباعان، ال جاڭا ەرەجەلەر باسقا ۇيىمداردىڭ قاتىسۋ مۇمكىندىگىن شەكتەيدى. تەك تاريفتەردىڭ تومەندەۋى عانا ەمەس، ۇيىرمە مەن سەكسيالاردى ۇيىمداستىرۋشىلارعا قويىلاتىن تالاپتاردىڭ قاتايۋى دا كاسىپكەرلەردىڭ نارازىلىعىن تۋعىزعان.

ArtSportEdu قۇرىلتايشىسى جانار تۇرعىنبايەۆا بۇل ماسەلەدە اكىمدىك تاراپىنان جەتكىزۋشىلەردىڭ پىكىرىنە قۇلاق اسۋ بايقالماعانىن ايتادى:
— ءبىز شىمكەنت اكىمدىگىنىڭ پوزيسياسىمەن كەلىسپەيمىز. قالاداعى قاۋلى بالالاردىڭ دا، كاسىپكەرلەردىڭ دە قۇقىقتارىن شەكتەيدى، جاعدايىن اۋىرلاتادى. جاڭا تاريفتەر ءادىل ەمەس، ال تالاپتار تىم قاتاڭ، — دەدى ول.

سونىمەن قاتار، كاسىپكەرلەر ءۇي-جايلاردىڭ كولەمى مەن پارامەترلەرىنە قاتىستى تالاپتاردىڭ، بالالاردىڭ ءبىر سەكسيادان ەكىنشىسىنە اۋىسۋ ءتارتىبىنىڭ، سونداي-اق ۆاۋچەرلەردى پايدالانۋ تەتىكتەرىنىڭ تۇسىنىكسىز ەكەنىن العا تارتادى. ءقازىر بۇل ماسەلە سوت قاراۋىندا.