InfoHub Logo

بۇگىن شىمكەنت قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قالا اكىمىنىڭ ورىنباسارى رۋسلان بەردەنوۆكە قارسى قارۋلى شابۋىل ءىسى بويىنشا تىڭدالىم جالعاستى. سوتتا اكىمدىك عيماراتى الدىنداعى وقيعاعا قاتىستى بەينەباقىلاۋ جازبالارى ۇسىنىلدى.

تەرگەۋ دەرەگىنشە، شابۋىل 21 ءساۋىر كۇنى كەشكى ساعات 21:00 شاماسىندا ورىن العان. كامەرا جازبالارىندا رۋسلان بەردەنوۆتىڭ اكىمدىك عيماراتىنان شىعىپ، تەلەفونىنا ۇڭىلگەن كۇيى قىزمەتتىك كولىككە بەت العانى كورىنەدى. ءدال وسى ساتتە «تۇرعىن ءۇي شىمكەنت» ءجشس-نىڭ بۇرىنعى ديرەكتورى، 31 جاستاعى ەرنار جيەمباي كولىكتىڭ جانىنان جۇگىرىپ شىعىپ، بىرنەشە رەت وق اتقان. ايىپتالۋشى بارلىعى بەس رەت قارۋ قولدانعان، الايدا كادرلاردان وقتىڭ ناقتى تيگەنى نەمەسە تيمەگەنى انىق بايقالمايدى.

ۆيدەودا بەردەنوۆتىڭ كولىكتى اينالىپ قاشقانى، ال جيەمبايدىڭ سوڭىنان قۋىپ وق اتقانى كورىنەدى. بىرنەشە سەكۋندتان كەيىن اكىم ورىنباسارىنىڭ جۇرگىزۋشىسى كولىكپەن كەلىپ، ايىپتالۋشىنى قاعىپ وتكەن. سول ساتتە بەردەنوۆ تە جەرگە قۇلاعان. جۇرگىزۋشى جيەمبايدى عيمارات جاققا يتەرگەندە ونىڭ قولىندا قارۋ بولماعانى بايقالادى. كەيىن تاعى ءبىر ادام كەلىپ، ايىپتالۋشىنى جەرگە قۇلاتىپ، قولىن قايىرادى.

وقيعا ورنىنا اكىمدىك قىزمەتكەرلەرى جۇگىرىپ شىققان سوڭ، جيەمبايدى پوليسيا ۇستاپ اكەتكەن. ول قىلمىستىق كودەكستىڭ «ادام ءولتىرۋ» جانە «قىلمىسقا دايىندالۋ مەن قىلمىسقا وقتالۋ» باپتارى بويىنشا ايىپتالۋدا.

بۇل ءىس سوت وندىرىسىنە 22 شىلدەدە قابىلدانىپ، باستى تىڭدالىم 6 تامىزدا باستالعان. بۇگىنگى — ەكىنشى سوت وتىرىسىندا كۋاگەرلەردەن جاۋاپ الىنىپ، بەينەجازبالار زەردەلەندى.