InfoHub Logo

اسقاباقتىڭ ادام ازعاسىنا پايداسى ەجەلدەن بەلگىلى. بۇل كوكونىستى تاماق رەتىندە جەۋ ارقىلى اعزانى قاجەتتى دارۋمەندەر مەن مينەرالدى زاتتارعا تولىقتىراسىز ءارى كوپتەگەن دەرتكە داۋا بولاتىن قاسيەتى بار. اسىرەسە، اسقاباقتىڭ ءدانى وتە پايدالى زاتتاردىڭ قاينار كوزى. ايتالىق، اسقاباق دانىمەن حالىق ەمىندە جۇرەك قان تامىر اۋرۋلارىن ەمدەيتىنىن بىلەسىز بە؟ ودان دا باسقا مىڭ ءتۇرلى دەرتكە شيپا بولادى. ناقتىراق ايتقاندا:

1. قانداعى حولەستەرين دەڭگەيىن تۇسىرەدى

جۇرەگى اۋىراتىن ناۋقاستارعا اسقاباق ءدانىن ۇزبەي جەۋگە كەڭەس بەرەمىز. ويتكەنى بۇل ءدان قانداعى حولەستەريندى تومەندەتىپ، ترومبتىڭ ءتۇزىلۋىن رەتتەيدى. قۇرامىنداعى فوسفور، مىس، تەمىر ەلەمەنتتەرىنىڭ ارقاسىندا قان ازدىق پەن اتەروسكلەروز اۋرۋىنان ايىقتىرادى.

2. كليماكس كەزىندەگى اۋىرلىقتى بولدىرمايدى

ەتەككىر ءۇزىلىسى – كەز كەلگەن ايەلدە اۋىر وتەتىن جاعداي. بۇل ۋاقىتتا قىرىق ءتۇرلى دەرت قوزىپ، جالپى جاعداي ناشارلايدى. گورمونالدىق وزگەرىستەر ورىن الادى. ال وسىنداي اۋىرلىقتى جەڭىل وتكەرگىڭىز كەلسە، وندا قۇرامى دارۋمەندەر مەن مينەرالدى زاتتارعا باي اسقاباق ءدانىن جەۋدى ادەتكە اينالدىرىڭىز. كليماكس كەزىندە ايەلدىڭ قىزۋى كوتەرىلەدى، توقتاۋسىز تەرلەيدى، كوڭىل-كۇيى ناشارلايدى، جۇرەك سوعىسى وزگەرىپ، قان قىسىمى وينايدى. بۇل جايسىزدىقتىڭ بىردەن ءبىر ەمى – اسقاباق ءدانى ەكەنىن ەسكەرىڭىز.

3. قاتەرلى ىسىكتىڭ الدىن الادى

اسقاباق ءدانى – كۋكۋربيتين دەپ اتالاتىن تەڭدەسسىز بايلىقتىڭ قاينار كوزى. ال بۇل زات ءوز كەزەگىندە قاتەرلى ىسىك اۋرۋىنىڭ الدىن الىپ، اعزانى ساقتايدى ءارى قورعايدى. ماماندار اسقاباق ءدانىن ۇزبەي جەيتىندەردىڭ باۋىر، ءسۇت بەزى، تىك ىشەك، ۇيقى بەزى، وكپە، اسقازان قاتەرلى ىسىك اۋرۋىنا ەشقاشان شالدىقپايتىنىن راستايدى.

4. قانداعى قانتتىڭ مولشەرىن رەتتەيدى

وزدەرىڭىز بىلەتىندەي، قانت ديابەتىنە شالدىققان ناۋقاستار بەلگىلى ءبىر مازىردە تاماقتانۋى ءتيىس. قانتتى، ءتاتتىنى، اششىنى، مايلىنى شەكتەسە، ال كوكونىس، جەمىس، بۋعا پىسكەن جانە قايناتىلعان تاعامدارعا رۇقسات ەتىلەدى. وعان قوسا، اسقاباق ءدانىنىڭ دە كەرەمەتتەي پايداسى بار ەكەنى ايتىلادى. بۇل باعالى ءدان اعزاداعى ۋلى زاتتى شىعارادى، جاسۋشالاردى جاڭارتادى، ۇيقى بەزىنىڭ جۇمىسىن جاقسارتادى، ءينسۋليننىڭ دۇرىس ءبولىنۋىن قاداعالايدى. ناتيجەسىندە قانداعى قانت مولشەرى ءوز قالپىنا كەلەدى.

5. ەرلەردىڭ دەنساۋلىعىن جاقسارتادى

پروستاتيت، قۋىق ءتۇبى بەزىنىڭ قابىنۋى ەر ازاماتتاردىڭ كوپشىلىگىندە كەزدەسەتىن اۋرۋ. اتالعان اۋرۋ دەنساۋلىعىڭىزعا عانا ەمەس، ءومىر ءسۇرۋ قالپىڭىزعا دا، توسەكتەگى تىرلىگىڭىزگە دە كەرى اسەرىن تيگىزەدى. ال ونىڭ الدىن الىپ نەمەسە ساقتانعىڭىز كەلسە، ءبىر ۋىس اسقاباق ءدانىن جەڭىز. ەمدى كۇنىنە 3-4 رەت قايتالاۋ ارقىلى ايىقپاس دەرتىڭىزدەن ارىلاسىز. اسقاباق ءدانىنىڭ قۇرامىنداعى L-ارگينين زاتى ەرلەردەگى تەستوستەرون گورمونىن جانداندىرىپ، قۋىقاستى بەزىنىڭ جۇمىسىن جاقسارتادى. سونىمەن قاتار، جامباستىڭ قان اينالىمىن تەزدەتىپ، سۋىقتى ەمدەيدى ءارى ىسىگىن قايتارادى.

6. ارتىق سالماقتان ارىلتادى

كەز كەلگەن ءدان، اسىرەسە اسقاباق ءدانى وسىمدىك اقۋىزى مەن جاسۇنىققا باي. ال بۇل زاتتار ءوز كەزەگىندە اعزاداعى مايدى ەرىتىپ، ارتىق سالماقتان ارىلتادى. ديەتولوگتار قارنىڭىزدىڭ اشقانىن سەزە باستاساڭىز، اسقاباق ءدانىن جەۋگە ادەتتەنىڭىز دەيدى. ونىڭ قۇرامىنداعى پايدالى زاتتار ىشەكتىڭ جۇمىسىن جاقسارتىپ، زات الماسۋدى رەتتەيدى.

7. كوڭىل كۇيدى كوتەرەدى

اسقاباق ءدانىن جەسەڭىز اعزادا سەروتونين اتتى قۋانىش گورمونى بولىنەدى. ءداننىڭ قۇرامىنداعى تريپتوفان امينقىشقىلى سىزگە سەرگەكتىك سىيلايدى. جۇيكەنى جاقسارتىپ، ميدى تىنىقتىرادى. ديەتولوگ ماماندار كۇنىنە جەتى دانا اسقاباق ءدانىن جەسەڭىز، كوڭىل-كۇيىڭىزدى كەرەمەت كوتەرەدى دەيدى. سوندىقتان دا دەپرەسسيا العان ادامعا، سترەستە جۇرەتىندەرگە جانە ۇنەمى مازاسىزداناتىندارعا اسقاباق ءدانىن قالتاڭىزدان تاستاماڭىز دەپ كەڭەس بەرەمىز.

8. ىشەكتى قۇرتتان تازالايدى

اسقاباق ءدانىنىڭ قۇرامىنداعى كۋكۋربيتين امينقىشقىلى – ىشەك قۇرتتارىنىڭ ناعىز جاۋى. اعزاداعى كەز كەلگەن قۇرتتان اسقاباق ءدانىن جەۋ ارقىلى وڭاي قۇتىلاسىز. ءداننىڭ دەنساۋلىققا تيگىزەتىن زيانى جوق.

9. بۋىن اۋرۋىنان قورعايدى

سۋىققا قارسى كۇرەسەتىن كۇشكە يە اسقاباق ءدانى بۋىن اۋرۋىن ەمدەپ، تۇز بايلانۋدى بولدىرمايدى. سونداي-اق، نەسەپ جۇرگىزىپ، ارتىق تۇزدى شىعارادى. كەرەمەت ەمدىك قاسيتكە يە ءدان بۋىندى ءتۇرلى دەرتتەن ساقتايدى.

10. وستەوپوروز اۋرۋىنىڭ الدىن الادى

قۇرامى كالسيي، ماگنيي جانە مىرىش ەلەمەنتىنە باي اسقاباق ءدانى سۇيەكتىڭ ساۋلىعىن جاقسارتادى. سوندىقتان دا وستەوپوروز اۋرۋىنىڭ الدىن العىڭىز كەلسە، قارتايعاندا سۇيەكتەن ايىرىلعىڭىز كەلمەسە نەمەسە سۇيەكتىڭ سىنۋىنان ساقتانعىڭىز كەلسە، وندا كۇندەلىكتى تاماقتىڭ الدىندا اسقاباق ءدانىن جەۋدى ۇمىتپاڭىز.

ل. احمەتوۆا

---