InfoHub Logo

6 شىلدە – تاۋەلسىز قازاقستان ءۇشىن ەرەكشە كۇن. بۇل – ەلىمىزدىڭ باس قالاسى استانانىڭ تۋعان كۇنى. ەلوردا – تاۋەلسىزدىكتىڭ تىرەگى، جاڭا قازاقستاننىڭ نىشانى، حالقىمىزدىڭ ەرىك-جىگەرى مەن تاريحي تاعدىرىن توعىستىرعان ايرىقشا شاھار. بيىل استاناعا 27 جىل تولىپ وتىر. وسى ارالىقتا بۇرىنعى شاعىن قالا – زاماناۋي مەگاپوليسكە اينالىپ، ەلدىڭ ساياسي، ەكونوميكالىق جانە مادەني ورتالىعىنا اينالدى.

استانا مارتەبەسى 1997 جىلى 10 جەلتوقساندا بەرىلدى. ەلباسى نۇرسۇلتان نازاربايەۆتىڭ باستاماسىمەن ەل استاناسى الماتىدان اقمولاعا كوشىرىلدى. 1998 جىلى قالا اتاۋى رەسمي تۇردە استانا بولىپ وزگەرتىلدى. بۇل شەشىم سول كەزدەگى مەملەكەتتىڭ ستراتەگيالىق باعىتىن تۇبەگەيلى وزگەرتىپ، جاڭا ءداۋىردىڭ باستاۋى بولدى. ەلوردا ەسىلدىڭ جاعاسىندا بوي كوتەرىپ، از عانا ۋاقىتتىڭ ىشىندە حالىقارالىق دەڭگەيدە تانىلدى.

قالا قۇرىلىسىنا الەمنىڭ اتاقتى ساۋلەتشىلەرى تارتىلدى. بۇگىندە استانانىڭ سىمباتتى سۇلباسى – شەتەلدىك تۋريستەر مەن حالىقارالىق ساراپشىلاردىڭ نازارىن اۋدارىپ كەلەدى. حان شاتىر، بايتەرەك، بەيبىتشىلىك جانە كەلىسىم سارايى، «استانا وپەرا» تەاترى – قالانىڭ بەتكەۇستار عيماراتتارىنا اينالدى.

بۇگىندە استانا – ساياسي شەشىمدەر قابىلداناتىن ورتالىق. پرەزيدەنت اكىمشىلىگى، پارلامەنت، ۇكىمەت پەن مينيسترلىكتەر، شەتەلدىك ەلشىلىكتەر وسىندا ورنالاسقان. ەلوردادا حالىقارالىق سامميتتەر، الەمدىك دەڭگەيدەگى فورۋمدار مەن مادەني ءىس-شارالار تۇراقتى تۇردە ءوتىپ تۇرادى. اتاپ ايتقاندا، ەقىۇ ءسامميتى، ەكسپو-2017 كورمەسى، الەمدىك جانە ءداستۇرلى دىندەر ليدەرلەرىنىڭ سەزى – استانانىڭ بەدەلىن بيىكتەتكەن ءىرى وقيعالار.

سونداي-اق ەلوردا – ىشكى كوشى-قوننىڭ نەگىزگى ورتالىعىنا اينالدى. مىڭداعان جاستار وسىندا كەلىپ، ءبىلىم الىپ، ەڭبەككە ارالاسۋدا. بۇل قالا – ارماندار ورىندالاتىن، مۇمكىندىكتەر قالاسى.

استانا جىل وتكەن سايىن جاڭارىپ كەلەدى. سوڭعى جىلدارى قالادا ەكولوگيالىق، كولىك، ينفراقۇرىلىمدىق جوبالار قارقىندى جۇرگىزىلۋدە. Smart City جۇيەسى ەنگىزىلىپ، ەلەكتروندى قىزمەتتەر مەن سيفرلىق تەحنولوگيالار كەڭىنەن دامىپ جاتىر. جاسىل ايماقتار كوبەيىپ، قوعامدىق كولىك جەلىسى ۇلعايۋدا.

قالادا جاستارعا، كاسىپكەرلەرگە، ستارتاپ جوبالارعا ارنالعان كەڭىستىكتەر اشىلىپ جاتىر. «استانا حاب» تەحنوپاركى، سيفرلاندىرۋ جوبالارى – استانانى بولاشاق قالاسىنا اينالدىرۋدىڭ ناقتى قادامدارى.

استانا – ەلىمىزدىڭ رۋحاني سيمۆولىنا اينالدى. بۇل قالا تەك اكىمشىلىك ورتالىق ەمەس، ول – ۇلتتىق بىرلىكتىڭ، تاۋەلسىزدىكتىڭ جانە وركەندەۋدىڭ كورىنىسى. قالانىڭ ءار عيماراتى، ءار كوشەسى – ەگەمەن ەلدىڭ جاڭا بەتبۇرىسىنىڭ ايعاعى.

استانا كۇنى – ءاربىر قازاقستاندىقتىڭ جۇرەگىنە جاقىن مەرەكە. بۇل كۇن – وتكەنگە تاعزىم، بۇگىنگە شۇكىر، بولاشاققا سەنىم بىلدىرەتىن كۇن. ەلوردا تويى – قازاقستاننىڭ دامۋعا، بەيبىتشىلىككە، جاڭاشىلدىققا ۇمتىلعان ۇلت ەكەنىن تاعى ءبىر مارتە دالەلدەيتىن مەرەكە.