InfoHub Logo

قاتەرلى ىسىككە قارسى Sovetonko دەپ اتالاتىن جاڭا پرەپاراتتى قازاقستاندىق عالىم قۋانىشبەك سارسەنباي جاساپ شىعاردى. بۇل ءدارى حالىقارالىق London Rate باعالاۋ كومپانياسى تاراپىنان 160 ميلليون دوللارعا (شامامەن 83 ميلليارد تەڭگە) باعالانعان.

Sovetonko پرەپاراتى بەرن كونۆەنسياسىمەن قورعالعان 6 حالىقارالىق پاتەنتكە يە. عالىمنىڭ ايتۋىنشا، ءدارىنىڭ عىلىمي نەگىزىن 1975–1980 جىلدارى ونىڭ ناعاشى اتاسى — 2024 جىلى دۇنيەدەن وتكەن سوۆەت ءدىنوۆ قالاعان. سول كىسىنىڭ قۇرمەتىنە پرەپارات اتاۋى Sovetonko دەپ قويىلعان.

زەرتتەۋگە بەس جىلىن ارناعان سارسەنباي 2023 جىلى العاشقى زەرتحانالىق سىناقتاردىڭ ءساتتى وتكەنىن ايتادى. پرەپارات لەيكەميا، اسقازان قاتەرلى ىسىگى، جاتىر موينى وبىرى، بەركيتت ليمفوماسى سىندى اۋىر دەرتتەرگە قارسى جوعارى ناتيجە كورسەتكەن. كەيبىر سىناقتاردا تيىمدىلىگى 100 پايىزعا جەتكەن.

الايدا عالىم بۇل جوباعا قازاقستاندا مەملەكەتتىك قولداۋ بولماعانىن، باستاپقىدا تەك جەكە ينۆەستورلاردىڭ كومەگىمەن جۇمىس ىستەگەنىن ايتتى. ءقازىر ءدارىنى تولىق ساتىپ الۋعا بىرنەشە شەتەلدىك فارماسيەۆتيكالىق كومپانيا قىزىعۋشىلىق تانىتۋدا. ال وتاندىق تاراپتاردان ازىرگە ناقتى قولداۋ نە ۇسىنىس جوق.

قۋانىشبەك سارسەنباي بۇل عىلىمي جەتىستىك قازاقستان مەديسيناسىن جاڭا دەڭگەيگە كوتەرۋگە مۇمكىندىك بەرەتىنىن ايتىپ وتىر. الايدا عىلىم مەن يننوۆاسياعا سالقىن كوزقاراس مۇنداي جوبالاردىڭ شەتەلگە كەتۋ ءقاۋپىن كۇشەيتىپ تۇر.