InfoHub Logo

استانادا ون جىلدان استام كۇتكەن LRT ىسكە قوسىلۋعا دايىن. الايدا، بۇل جوبا قالا قازىناسىنا قوماقتى شىعىن اكەلەتىنى بەلگىلى بولدى. ءبىر جولعا 200 تەڭگە تاريف بەلگىلەنگەنىمەن، جۇيەنى ۇستاۋعا كەتەتىن شىعىننىڭ باسىم بولىگىن قالا بيلىگى جابادى.

بۇل تۋرالى Infohub.kz اقپارات اگەنتتىگى حابارلايدى.

LRT جۇمىسىن كىم اتقارادى؟

City Transportation Systems (CTS) كومپانياسىنىڭ باسقارما ءتوراعاسى اسىلبەك دۇيسەبايەۆتىڭ ايتۋىنشا، LRTء-نى جۇمىس ىستەتۋ ءۇشىن 1000-نان استام ادام جۇمىلدىرىلادى. قىزمەتكەرلەردىڭ ورتاشا جالاقىسى 500 مىڭ تەڭگە بولسا، جاۋاپكەرشىلىگى جوعارى ديسپەچەرلەر ايىنا 700 مىڭ تەڭگەگە جۋىق تابىس تابادى. ال ءوزىنىڭ جالاقىسى 1،1 ميلليون تەڭگە ەكەنىن دۇيسەبايەۆ راستادى.

شتات تولىق ەمەس، شەتەلدىك ماماندار تارتىلۋدا

قازىرگى ۋاقىتتا شتات تولىق جاساقتالماعان. ماشينيستەردى دايارلاۋدان باستاپ، ءارتۇرلى ماماندىقتار بويىنشا ماماندار قابىلدانۋدا. قىزىعى، LRT جۇيەسىندە شامامەن 300 قىتايلىق مامان جۇمىس ىستەيدى. كومپانيا مۇنى ورتالىق ازيادا بۇعان دەيىن مۇنداي كولىك جۇيەسى بولماعاندىقتان، جەرگىلىكتى ينجەنەرلەردىڭ تاجىريبەسىنىڭ جوقتىعىمەن تۇسىندىرەدى. قىتايلىق ماماندارمەن 10 جىلدىق كەلىسىمشارت جاسالعان، ءبىراق ولاردىڭ سانىن بىرتىندەپ ازايتىپ، 10 جىلدىڭ سوڭىنا قاراي قازاقستاندىق ماماندارمەن الماستىرۋ جوسپارلانۋدا.

قارجىلاندىرۋ قالاي جۇزەگە اسادى؟

شەتەلدىك جانە وتاندىق مامانداردىڭ ەڭبەكاقى شارتتارى بىردەي، تەك شەتەلدىكتەرگە جالاقى يۋانمەن تولەنەدى. جوبانىڭ نەگىزگى قارجىلاندىرۋ كوزى – جولاۋشىلار تولەيتىن 200 تەڭگە جانە استانا قالاسى بيۋدجەتىنەن بولىنەتىن سۋبسيديا. CTS باسشىسى LRT جوباسىنىڭ تەك جولاۋشىلار ەسەبىنەن ءوزىن-وزى اقتاي المايتىنىن ناقتى ايتتى. ستانسيالاردا دۇكەندەر مەن كافەلەر اشۋ جوسپاردا جوق. كومپانيا تاۋلىگىنە 35-45 مىڭ جولاۋشى كۇتەدى، ءبىراق قىزمەت كورسەتۋگە كەتەتىن ناقتى ايلىق شىعىنداردى ءالى ەسەپتەپ شىعارا الماعان.

جولاۋشىلار باگاج ءۇشىن قوسىمشا اقى تولەمەيدى. ۆەلوسيپەدتەردى تەك بۇكتەلگەن كۇيدە عانا الىپ جۇرۋگە بولادى. استانا تۇرعىندارى ءۇشىن ءبىر جولعى جول ءجۇرۋ قۇنى 200 تەڭگە بولعانىمەن، ءىس جۇزىندەگى وزىندىك قۇن الدەقايدا جوعارى بولادى. بۇل ايىرمانى قالا بيۋدجەتى جابادى.