InfoHub Logo

استانادا مۇگەدەكتىگى بار بالانى توپ بولىپ زورلادى دەگەن كۇدىككە التى ادام ءىلىندى

استانادا 2-توپ مۇگەدەكتىگى بار جاسوسپىرىمگە قاتىستى جانتۇرشىگەرلىك وقيعا قوعامنىڭ نازارىن اۋدارتتى. اناسىنىڭ ايتۋىنشا، بالاسىن بىرنەشە ادام بىرنەشە رەت زورلاعان. قىلمىستىق ءىس قوزعالعانىمەن، كۇدىكتىلەر ءالى بوستاندىقتا ءجۇر.

رەداكسياعا جولدانعان بەينەجازبادا جابىرلەنۋشىنىڭ اناسى ۇلىنىڭ ينتەرنەت ارقىلى تانىسقان بىرنەشە ادام تاراپىنان قورلىق كورگەنىن ايتىپ، تەرگەۋدىڭ باياۋ ءجۇرىپ جاتقانىن العا تارتتى.

«ءىستى باستاپقىدا نۇرا اۋدانىندا تىركەدى، ءبىراق ول جەردە ءىستى جابۋعا تىرىستى. ءبىز استانا قالالىق پوليسيا دەپارتامەنتىنە بەرۋگە قول جەتكىزدىك. تەرگەۋ ءتورت ايدان بەرى ءجۇرىپ جاتىر. التى كۇدىكتىنىڭ ءبارى بوستاندىقتا. سوت-مەديسينالىق ساراپتاما زورلىقتىڭ بولعانىن راستاپ تۇر. ۇلىم اۋىر پسيحولوگيالىق جاعدايدا. بالا كەزىنەن مۇگەدەكتىگى بار، ەندى وعان قوسىمشا «ەپيلەپسيا» دياگنوزى قويىلدى. بۇل بولاشاقتا قالاي اسەر ەتەتىنىن ەلەستەتۋ دە قورقىنىشتى. وسىنداي اۋىر سوققىدان كەيىن مەن ينسۋلت الدىم»، — دەدى جابىرلەنۋشى بالانىڭ اناسى.

ونىڭ ايتۋىنشا، بالاسى كۇدىكتىلەردىڭ بىرىمەن ونلاين ويىن ارقىلى تانىسىپ، كەيىن ۇيىنە بارعان. سول جەردە زورلىق-زومبىلىق ورىن العان.

استانا قالالىق پوليسيا دەپارتامەنتى بۇل جايتقا قاتىستى تۇسىنىكتەمە بەردى:

«اتالعان دەرەك بويىنشا قىلمىستىق ءىس تىركەلىپ، سوتقا دەيىنگى تەرگەۋ جۇرگىزىلۋدە. ءبىرقاتار سوت ساراپتامالارى تاعايىندالدى. قورىتىندىلارعا سايكەس پروسەسسۋالدىق شەشىم قابىلدانادى. بارلىق تەرگەۋ ارەكەتتەرى زاڭ اياسىندا جانە قىلمىستىق پروسەسكە قاتىسۋشىلاردىڭ قۇقىقتارىن ساقتاي وتىرىپ جۇرگىزىلىپ جاتىر»، — دەلىنگەن رەسمي جاۋاپتا.

بۇل جاعداي قوعامدا ۇلكەن رەزونانس تۋدىردى. بۇعان دەيىن دە تۇركىستان وبلىسىندا مۇگەدەكتىگى بار ءجاسوسپىرىمدى اۋىلداستارى بىرنەشە جىل بويى زورلاپ كەلگەنى تۋرالى اۋىر وقيعا حابارلانعان ەدى.

قوعام بەلسەندىلەرى مەن قۇقىق قورعاۋشىلار وسىنداي وقيعالاردا تەرگەۋ ورگاندارىنىڭ نەمقۇرايلى ارەكەتىن سىنعا الىپ، ادىلدىك ورناتۋدى تالاپ ەتۋدە.