InfoHub Logo

استانالىق جانابەك سادىق امەريكا قۇراما شتاتتارىنداعى ۋنيۆەرسيتەتتەرگە ءتۇسۋ ءۇشىن تاپسىرىلاتىن SAT ەمتيحانىنان 1600 مۇمكىن باللدىڭ ءبارىن جيناپ، قازاقستان رەكوردىن جاڭارتتى. بۇل ناتيجە الەمدە جىلىنا شامامەن 300 وقۋشىعا عانا بۇيىرادى.

بۇل تۋرالى Infohub.kz اقپارات اگەنتتىگى حابارلايدى.

وليمپياداشى دا، دانىشپان دا ەمەس

جانابەك سادىق استاناداعى ا. بوكەيحان اتىنداعى Binom School مەكتەبىندە وقىعان. ول حالىقارالىق ەمتيحاندارعا ارنالعان ارنايى دايىندىقسىز، قاراپايىم مەكتەپتە ءبىلىم العان. ءوزىنىڭ ايتۋىنشا، ول مەكتەپتەگى ۇزدىك 300 وقۋشىنىڭ قاتارىندا بولعانىمەن، ءوزىن سىنىپتاستارىنان ەرەكشە اقىلدى ساناماعان. SAT-قا دايىندىق باستالعاندا، العاشقى سىناق تەستتەرىندە ناتيجەسى 60-65% شاماسىندا، ال بالى 1170-1230 بولعان. SmarTestPrep پلاتفورماسىنىڭ نەگىزىن قالاۋشىلار اتاپ وتكەندەي، بۇل كوپتەگەن وقۋشىلار ءۇشىن قالىپتى باستاپقى دەڭگەي.

سيستەمانىڭ كۇشى

جانابەك ەمتيحانعا سەگىز اي قالعاندا بەلسەندى دايىندىقتى باستاعان. كۇنىنە بىرنەشە ساعات بويى ەسەپتەر شىعارىپ، قاتەلەرىن تالداپ، ەكى-ۇش اپتادا ءبىر رەت ناقتى ۋاقىتپەن سىناق ەمتيحاندارىن تاپسىرعان. العاشقى سىناقتاردا 1170-1230 بالل جيناعان ول، ءۇش-تورت ايدان كەيىن 75-80% دەڭگەيىنە جەتكەن. ەمتيحانعا بىر-ەكى اي قالعاندا بۇل كورسەتكىش 90-95%-كە كوتەرىلىپ، سوڭعى سىناقتا 1570 بالل العان. ال ناقتى ەمتيحان ناتيجەسى – 1600 بالل.

«مەنى تالانت ەمەس، جۇيە – كۋرستار، اتا-انام، اينالامداعى ادامدار جەتىستىككە جەتكىزدى. بارلىعى بىرگە جۇمىس ىستەدى»، – دەيدى جانابەك.

ونىڭ ايتۋىنشا، ەڭ ۇلكەن وسىمگە ىقپال ەتكەن ءۇش نارسە بار: تۇسىنىكسىز جەرلەردى ءوزى ىزدەپ، انىقتاۋ، بۇرىنعى جىلدارداعى تاپسىرمالاردى ورىنداۋ جانە كوپ وقۋ. ءوزىنىڭ پروگرەسىن سەزىممەن ەمەس، ناقتى ساندارمەن باقىلاعان.

جانابەك ءوز تاريحىن فورمۋلا-1 جارىس جۇرگىزۋشىسى ماكس فەرستاپپەننىڭ جولىمەن سالىستىرادى: چەمپيون جارىس كۇنى پايدا بولمايدى، ول جىلدار بويى دايىندالادى. وتباسى ونىڭ ەسەپتەرىن شىعارىپ بەرمەگەنىمەن، ونىڭ زەيىن قويىپ جۇمىس ىستەۋىنە جاعداي جاساپ، رەجيمىن قولداپ، ناتيجەسى 60% بولعان كەزدە دە سەنىم بىلدىرگەن. ونىمەن بىرگە دايىندالعان، ماتەريالدارمەن بولىسكەن جانە جارىستان شىعىپ قالماۋعا كومەكتەسكەن دوستارى دا ۇلكەن ءرول اتقاردى.

1600 بالل قانداي مۇمكىندىكتەر اشادى؟

SAT – امەريكا قۇراما شتاتتارى مەن باسقا دا ءبىرقاتار ەلدەردىڭ ۋنيۆەرسيتەتتەرىنە باكالاۆرياتقا ءتۇسۋ ءۇشىن تاپسىرىلاتىن ستاندارتەلگەن تەست. ول ماتەماتيكا، وقۋ جانە جازۋ قابىلەتتەرىن باعالايدى جانە بەدەلدى جوعارى وقۋ ورىندارىنا ىرىكتەۋدىڭ نەگىزگى كريتەرييلەرىنىڭ ءبىرى بولىپ تابىلادى. SmarTestPrep وكىلدەرىنىڭ ايتۋىنشا، ماكسيمالدى بالل ءتۇسۋ گەوگرافياسىن ايتارلىقتاي كەڭەيتەدى: بۇل تەك ازيانىڭ ۇزدىك ۋنيۆەرسيتەتتەرى عانا ەمەس، سونىمەن قاتار ليگa پليۋششا (Ivy League) ۋنيۆەرسيتەتتەرىنە دە مۇمكىندىك بەرەدى.

جانابەكتىڭ ءقازىردىڭ وزىندە بىرنەشە قىتايلىق ۋنيۆەرسيتەتتەن شاقىرۋى بار، ءبىراق ءالى شەشىم قابىلداماعاندىقتان، ولاردىڭ اتاۋىن اشپاي وتىر. سونداي-اق، ول نازاربايەۆ ۋنيۆەرسيتەتىنەن گرانتقا قابىلداۋ 1530 باللدان باستالاتىن ەڭ ەرتە شاقىرۋلاردىڭ ءبىرىن العان. ونىڭ IELTS ناتيجەسى – 7.5، بۇل كورسەتكىشكە ءبىر جىلدا قول جەتكىزگەن. ءقازىر ول gap year-دا، ياعني 2025 جىلى مەكتەپتى بىتىرگەن سوڭ، وقۋعا تۇسۋگە قوسىمشا ءبىر جىل دايىندىققا ارناعان. بيىلعى جىلى ازيا ۋنيۆەرسيتەتتەرىنە باسىمدىق بەرسە، كەلەسى جىلى امەريكا ۋنيۆەرسيتەتتەرىنە تاپسىرۋى مۇمكىن. جانابەك مەحانيكالىق ينجەنەريا ماماندىعىن تاڭداۋدى جوسپارلاپ وتىر.