depositphotos.com
قازاقستاندا اەس قۇرىلىسى: ءتورت ستانسيا جوسپارلانىپ وتىر
قازاقستان 2050 جىلعا دەيىن كەمىندە ءۇش اتوم ەلەكتر ستانسياسىن (اەس) ىسكە قوسۋدى جوسپارلاپ وتىر. سونىمەن قاتار، ءتورتىنشى ستانسيانىڭ قۇرىلىسى دا قاراستىرىلۋدا. بۇل تۋرالى اتوم ەنەرگياسى اگەنتتىگىنە سىلتەمە جاساپ Infohub.kz اقپارات اگەنتتىگى حابارلايدى.
مەملەكەت باسشىسى بەكىتكەن اتوم سالاسىن دامىتۋ ستراتەگياسىنا سايكەس، 2050 جىلعا قاراي ەلىمىزدە كەمىندە ءۇش اەس جۇمىس ىستەيتىن بولادى. بۇعان قوسا، ەلەكتر ەنەرگياسىنا دەگەن سۇرانىستىڭ وسۋىنە بايلانىستى ءتورتىنشى ستانسيانىڭ قۇرىلىسى دا جوسپارلانعان. اگەنتتىك بۇل قادامنىڭ ەكونوميكا مەن حالىقتىڭ سەنىمدى ءارى ەكولوگيالىق تازا ەنەرگياعا دەگەن قاجەتتىلىگىن تولىق قامتاماسىز ەتەتىنىنە سەنەدى.
شاعىن ءمودۋلدى رەاكتورلار
قازاقستاندا شاعىن ءمودۋلدى رەاكتورلار نەگىزىندە اەس سالۋ نۇسقالارى دا قاراستىرىلماق. تەحنولوگيالىق جانە ەكونوميكالىق تيىمدىلىگى ەسكەرىلە وتىرىپ، بۇل جوبالار ەسكىرگەن كومىر ستانسيالارىن الماستىرۋعا دا مۇمكىندىك بەرەدى. بۇل جوسپارلار ەنەرگەتيكا سەكتورىن ءارتاراپتاندىرىپ، ەلدىڭ ەنەرگەتيكالىق قاۋىپسىزدىگى مەن تاۋەلسىزدىگىن ارتتىرۋعا باعىتتالعان.
بۇرىنعى جوسپارلار
بۇعان دەيىن، 2025 جىلدىڭ ناۋرىز ايىندا پرەزيدەنت قاسىم-جومارت توقايەۆ اەس سالۋدىڭ ستراتەگيالىق ماڭىزدىلىعىن اتاپ وتكەن بولاتىن. ول ەلدىڭ ونداعان جىلدار بويى ەكونوميكالىق دامۋىنا نەگىز بولاتىن جاڭا ەنەرگەتيكا سالاسىن قۇرۋ قاجەتتىگىن ايتتى. ال 2025 جىلدىڭ شىلدەسىندە ءبىرىنشى ۆيسە-پرەمەر رومان سكليار ەكىنشى جانە ءۇشىنشى اەس-تى جۇڭگو كومپانيالارى سالاتىنىن حابارلاعان ەدى.
-
استانالىق جانابەك سادىق SAT ەمتيحانىنان 1600 مۇمكىن باللدىڭ ءبارىن جيناپ، قازاقستان رەكوردىن جاڭارتتى. بۇل جەتىستىك وعان الەمنىڭ ۇزدىك جوعارى وقۋ ورىندارىنا جولداما الۋعا مۇمكىندىك بەردى.
-
پەتروپاۆل قالاسىنىڭ ورتالىعىنداعى كونستيتۋسيا كوشەسىندە جۇرگىزىلىپ جاتقان رەكونسترۋكسيا جۇمىستارى كەزىندە كوپجىلدىق اعاشتاردىڭ كەسىلۋى جەرگىلىكتى تۇرعىنداردىڭ نارازىلىعىن تۋدىردى.
