InfoHub Logo

ەرتەدە ءبىر كەيۋانا بولىپتى. ول اياعى اۋىر ايەلدەردىڭ بوسانۋىنا جاردەمدەسەدى ەكەن. ايەلدەر «قولى جەڭىل» دەپ، ونىڭ الدىنا ءجيى كەلىپتى.

ءبىر كۇنى ءتۇن ورتاسىندا ەسىگىن بىرەۋ قاعادى. كەيۋانا ەسىكتى اشسا، ەشكىم جوق. كەمپىر «قاعىس ەستىگەن شىعارمىن» دەپ، قايتا جاتادى. وسى جاعداي ەكى رەت قايتالانادى. ءۇشىنشى رەت ەسىكتى اشقاندا اقبوز اتتى كىسىنى كورەدى. رەڭى بولەك، جەرگىلىكتى تۇرعىندارعا ۇقسامايتىن ادام ەكەن.

— ءبىر كەلىنىمىز بوسانا الماي جاتىر، سوعان جاردەم بەرسەڭىز، — دەيدى ول.

كەمپىر كەلىسىپ جولعا شىعادى.

— اپا، كوزىڭىزدى تارس جۇمىڭىز، ءبىز ايتقانشا اشپاڭىز، ايتپەسە مايىپ بولاسىز، — دەيدى. كەمپىر كوزىن جۇمىپ وتىرادى. جولدا گۇرسىلدەگەن، سالدىرلاعان وقىس دىبىستاردان قورقىپ، زارەسى ۇشىپ وتىرادى. ءبىر جەرگە جەتكەندە:

— اپا، كوزىڭىزدى اشىڭىز، — دەيدى الگى ادام. قاراسا ءبىر ۇيگە كەلىپتى. توردە ءبىر جاس كەلىنشەك بوسانا الماي قينالىپ جاتىر ەكەن. كەمپىر بىردەن ىسكە كىرىسىپ امان-ەسەن بوساندىرىپ الادى. نارەستەنىڭ كىندىگىن كەسىپ:

— بالانى شومىلدىراتىن سۋ اكەلىڭدەر، — دەيدى. ءوزىن ەرتىپ اكەلگەن كىسى: «ءقازىر»، — دەيدى دە ءبىراز ۋاقىتتان سوڭ سۋ ەمەس ءسۇت اكەلەدى. بالانى شومىلدىرىپ قاراسا، شارا كورشىسىنىڭ ءسۇت قۇياتىن ىدىسىنا ۇقسايدى ەكەن. كەمپىر سەكەم الىپ قالادى. باسقالارعا بىلدىرمەي، ساقيناسىن سۇتكە سالىپ جىبەرەدى. ءبارى بىتكەن سوڭ ولار بالانى شومىلدىرعان ءسۇت پەن ىدىستى قايتادان الىپ كەتەدى. ءۇي يەلەرى كەمپىرگە مول سىيلىق بەرىپ، ۇيىنە اكەلىپ تاستايدى.

كەمپىر تاڭ اتا سالىسىمەن شارانى تەكسەرۋ ءۇشىن كورشىسىنىڭ ۇيىنە بارادى. الگى ىدىس كوزىنە وتتاي باسىلادى. ىشىندە ءسۇت تۇر ەكەن. ءسۇتتى ءسۇزىپ ساقيناسىن تاۋىپ الادى. سول كەزدە تۇندەگى بەيتانىس ادامداردىڭ جىن ەكەنىن تۇسىنەدى.

كورشىسىنە بولعان جاعدايدى بايانداپ، سۇتكە جىن بالاسىنىڭ شومىلعانىن ايتادى دا، ءسۇتتى ادام اياعى باسپايتىن جەرگە توكتىرىپ تاستايدى.

كورشىنىڭ كەلىنى بۇرىننان سالاق ەدى. ىرىم-تىيىم تالاپتارعا جەڭىل قارايتىن. مايلىقتارى، جاۋلىقتارى ايلاپ-اپتالاپ جۋىلمايتىن ەدى. كەشكى استان سوڭ ىدىستارىن جۋۋعا ەرىنىپ جاتا سالاتىن. ۇيدەگى اس-اۋقاتتىڭ بەتىن بۇركەپ جابۋعا دا ەرىنەتىن. سول كۇنى ءسۇتتىڭ دە بەتىن جاپپاستان جاتىپ قالىپتى. ونىڭ اشىق-شاشىق ىدىستارىن جىن-جىپىرلار جالاپ كەتەدى ەكەن. سونىڭ كەسىرىنەن ءۇيىنىڭ بەرەكەسى قاشىپ، وتاعاسى ەسەلەپ مال تاپسا دا، باقۋاتتى ءومىر سۇرمەيتىن. وسىعان بايلانىستى ەل ىشىندە تۇنگە قاراي ءسۇت پەن سۋدى، اس-اۋقاتتى اشىق تاستاماۋ، ىدىس-اياقتى جۋىپ جاتۋ تۋرالى ىرىم-تالاپتار كوبەيگەن ەكەن.

---