InfoHub Logo

اتىراۋ وبلىسىنىڭ قۇرمانعازى اۋدانىندا ءىرى قارا مال اراسىندا جۇقپالى ينفەكسيالىق رينوتراحەيت اۋرۋى انىقتالدى. وسىعان بايلانىستى بىرنەشە اۋىلدىق وكرۋگتە كارانتين جاريالانىپ، ۆەتەرينارلىق باقىلاۋ كۇشەيتىلدى.

بۇل تۋرالى Infohub.kz اقپارات اگەنتتىگى حابارلايدى.

مامانداردىڭ ايتۋىنشا، ىندەت دىڭعىزىل، بوكەيحان، ەڭبەكشى جانە قۇرمانعازى اۋىلدىق وكرۋگتەرىندە تىركەلگەن. اتالعان اۋماقتاردان مال شىعارۋعا ۋاقىتشا تىيىم سالىندى.

اۋرۋدىڭ تارالۋى جانە ەمدەۋ شارالارى

قازىرگى تاڭدا 1407 ءىرى قارا اۋرۋ جۇقتىرعان. ونىڭ مىڭنان استامى ەمدەلىپ، ساۋىعىپ شىققان. قالعان مالعا ەم-دوم شارالارى جۇرگىزىلىپ، ساۋ مالدارعا پروفيلاكتيكالىق ەكپەلەر ەگىلۋدە.

قابىلدانعان شەكتەۋلەر

وبلىستىق اۋىل شارۋاشىلىعى باسقارماسىنىڭ ءبولىم باسشىسى سايران عۇدناننىڭ مالىمەتىنشە، كارانتين جاريالانعان اۋىلداردا مال ەتىن ساتۋعا جانە ۆەتەرينارلىق انىقتاما بەرۋگە شەكتەۋلەر قويىلدى. ماماننىڭ ايتۋىنشا، رەسەي فەدەراسياسىنان مال تاسىمالىنىڭ جيىلەۋى اۋرۋدىڭ تارالۋ ءقاۋپىن ارتتىرعان.

ادامعا جۇعۋ ءقاۋپى

ۆەتەرينار دارىگەرلەر ينفەكسيالىق رينوتراحەيتتىڭ نەگىزىنەن جانۋارلار اراسىندا تارالاتىنىن، ادامعا جۇعۋ جاعدايلارى وتە سيرەك ەكەنىن اتاپ ءوتتى. قازىرگى ۋاقىتتا ادام اراسىندا اۋرۋ تىركەلمەگەن.

قوسىمشا جاعدايلار

قۇرمانعازى اۋدانىمەن شەكتەسەتىن يساتاي اۋدانىنداعى زينەدەن اۋىلىندا دا 70-كە جۋىق سيىردىڭ اۋىرعانى انىقتالدى. بارلىق ۆەتەريناريالىق شارالار اياقتالىپ، مال تولىق ساۋىققاننان كەيىن 30 كۇن وتكەن سوڭ كارانتيندىك شەكتەۋلەر الىنادى.