InfoHub Logo

اتىراۋدا اتا-ەنەسىن ءولتىردى دەگەن كۇدىككە ىلىنگەن سۇلتان سارسەمالييەۆتىڭ يندونەزيادا ۇستالۋى تۋرالى جاڭالىق الەمدى دۇرلىكتىردى. حالىقارالىق ىزدەۋدە جۇرگەن كۇدىكتى تۋريستەر كوپ باراتىن لومبوك ارالىنداعى سەنارۋ اۋىلىنداعى قوناقۇيدە قولعا ءتۇستى.

بۇل تۋرالى Infohub.kz اقپارات اگەنتتىگى حابارلايدى.

ينتەرپولدىڭ "قىزىل بيۋللەتەنى" جانە سوت سانكسياسى

سولتۇستىك لومبوك پوليسياسىنىڭ باسشىسى اگۋس پۋرۆانتا وپەراسيانىڭ ينتەرپولدىڭ "قىزىل بيۋللەتەنى" جانە اتىراۋ قالالىق سوتىنىڭ 2026 جىلعى 8 قاڭتارداعى سانكسياسى نەگىزىندە جۇرگىزىلگەنىن ايتتى. ول جەرگىلىكتى باق-قا بەرگەن سۇحباتىندا: "ينتەرپولدان رەسمي حابارلاما تۇسكەن كەزدە ءىستىڭ مان-جايىمەن تانىسىپ، تاڭدانىسىمىزدى جاسىرمادىق. ءبىز ءۇشىن ەڭ باستىسى – يندونەزيانىڭ حالىقارالىق ىزدەۋدە جۇرگەن قىلمىسكەرلەرگە پانا بولاتىن ەلگە اينالماۋى"، – دەپ مالىمدەدى.

قاشۋعا تالپىنىس جاساعان كۇدىكتى

ارنايى وپەراسيا 24 اقپاندا ءوتتى. قىلمىستىق ىزدەستىرۋ ءبولىمىنىڭ باسشىسى ي.كومانگ ۆيلاندرانىڭ ايتۋىنشا، كۇدىكتىنىڭ سەنارۋ اۋىلىندا جۇرگەنى تۋرالى اقپارات تۇسكەن سوڭ، جەدەل توپ بىردەن ارەكەتكە كوشكەن. پوليسەيلەر قوناقۇيگە كىرگەن كەزدە سارسەمالييەۆ قاشۋعا تالپىنعانىمەن، كوپ ۇزاماي ۇستالىپ، ەشكىمگە زيان كەلتىرمەگەن.

قازاقستان ازاماتتارى دا ۇستالدى

وقيعا ورنىندا سارسەمالييەۆپەن بىرگە تاعى ءبىر قازاقستاندىق، 30 جاستاعى ايەل دە ۇستالدى. بۇعان دەيىن بۇل ايەلدىڭ قازا تاپقان ەرلى-زايىپتىنىڭ قىزى اقبايان مۇقانعالييەۆا ەكەنى حابارلانعان بولاتىن. تەرگەۋشىلەر ۇستالعانداردىڭ جەكە كۋالىكتەرىن، پاسپورتتارىن، حالىقارالىق بانك كارتالارىن جانە ۇيالى تەلەفوندارىن تاركىلەدى.

ەكستراديسيا ماسەلەسى

جەرگىلىكتى اقپارات قۇرالدارىنىڭ حابارلاۋىنشا، الداعى ۋاقىتتا بۇل ازاماتتاردى قازاقستانعا ەكستراديسيالاۋ ماسەلەسى يندونەزيا ادىلەت مينيسترلىگىمەن، ۇلتتىق پوليسيانىڭ حالىقارالىق ىستەر بولىمىمەن جانە وزگە دە قۇزىرلى ورگاندارمەن بىرلەسىپ قارالادى. بارلىق راسىمدەر ۇلتتىق زاڭناما مەن حالىقارالىق كەلىسىمدەر اياسىندا جۇرگىزىلەتىن بولادى. قازىرگى تاڭدا سارسەمالييەۆ سولتۇستىك لومبوك پوليسيا باسقارماسىنىڭ ۋاقىتشا ۇستاۋ يزولياتورىندا قاماۋدا وتىر.