InfoHub Logo

استانا. 2 ناۋرىز. «وتباسى بانك» تۇرعىن ءۇي جاعدايىن جاقسارتۋ ماقساتىندا ءبىرىڭعاي جيناقتالعان زەينەتاقى تولەمدەرىن (بجزت) پايدالانۋعا وتىنىمدەردى قابىلداۋدى قايتا باستايدى. بۇل تۋرالى بانك باسپا ءسوز قىزمەتى حابارلادى.

بانك وكىلدەرىنىڭ ايتۋىنشا، وتىنىمدەردى قابىلداۋ دۇيسەنبى، 2 ناۋرىزدان باستاپ قايتا جۇزەگە اسادى.

ەستەرىڭىزگە سالا كەتەيىك، قاڭتار ايىنىڭ سوڭىندا «وتباسى بانك» بەرەشەكتى ءىشىنارا نەمەسە تولىق وتەۋ ءۇشىن بجزت پايدالانۋعا وتىنىمدەردى قابىلداۋدى ۋاقىتشا توقتاتقانى تۋرالى حابارلاعان بولاتىن.

بانكتە بۇل قادامدى وزدەرىنىڭ قاشىقتان قولجەتىمدى قىزمەتتەرىن – ءموبيلدى قوسىمشا مەن otbasybank.kz پورتالىنداعى جەكە كابينەتتى جاڭا تالاپتارعا بەيىمدەۋ قاجەتتىلىگىمەن ءتۇسىندىردى. بۇعان دەيىن تۇرعىن ءۇي جاعدايىن جاقسارتۋ ءۇشىن بجزت پايدالانۋ ەرەجەلەرىندە «بەرەشەك» تەرمينى «نەگىزگى بورىش» تەرمينىمەن اۋىستىرىلعان.

«بۇل دەگەنىمىز، ەندى زەينەتاقى قالدىقتارى ارقىلى نەسيەنى ءىشىنارا نەمەسە تولىق مەرزىمىنەن بۇرىن وتەۋ كەزىندە تەك نەگىزگى بورىشتى وتەۋگە بولادى. بۇرىن «بەرەشەك» تەرمينىنە سايكەس كەلەتىن اي سايىنعى تولەمدى تولىق وتەۋ زەينەتاقى تولەمى ەسەبىنەن مۇمكىن بولمايدى. نەسيە بويىنشا پايىزدار مەن اي سايىنعى تولەمگە كىرەتىن باسقا دا ىلەسپەلى تولەمدەردى قارىز الۋشى ءوز قاراجاتى ەسەبىنەن تولەۋى ءتيىس»، — دەپ ءتۇسىندىردى «وتباسى بانك».

وسى جاڭالىققا بايلانىستى «وتباسى بانكتەگى» قارىزداردى ءىشىنارا جانە تولىق وتەۋ پروسەسى قايتا قارالۋعا جاتتى، بۇل وتىنىمدەردى قابىلداۋدىڭ ۋاقىتشا توقتاتىلۋىنا سەبەپ بولدى.

«بولاشاقتا بۇل وپەراسيا ەكى بولىكتەن تۇراتىن بولادى: الدىمەن نەسيە بويىنشا سىياقى جانە باسقا دا ىلەسپەلى تولەمدەر ءوز قاراجاتى ەسەبىنەن تولەنەدى، سودان كەيىن نەگىزگى بورىش – زەينەتاقى قالدىقتارى ەسەبىنەن. بۇل ءۇشىن «وتباسى بانكتەگى» اعىمداعى جانە ارنايى شوتتا قاراجاتتىڭ بار ەكەنىن الدىن الا قاراستىرۋ قاجەت بولادى»، — دەپ حابارلادى ۇيىم.

بۇعان دەيىن ءبىز 2 ناۋرىزدان باستاپ «وتباسى بانك» كەزەكتە تۇرعاندارعا تۇرعىن ءۇي ءبولۋ ءراسىمىن وزگەرتەتىنى تۋرالى جازعان بولاتىنبىز. ەندى بانك تەك ينۆەنتاريزاسيادان وتكەننەن كەيىن عانا تۇرعىن ءۇي بولەدى.