InfoHub Logo

اتىراۋدا قاراباليندەر اۋلەتىنىڭ قايعىلى قازاسىنا قاتىستى قىلمىستىق ءىس بويىنشا سوت وتىرىسى باستالدى. بۇل ىستە سۇلتان سارسەمالييەۆ ايىپتالۋشى رەتىندە جاۋاپ بەرىپ وتىر. تەرگەۋ نۇسقاسى بويىنشا، ول قايىن جۇرتىنىڭ ولىمىنە قاتىسى بار ەكەنىن مويىنداعان.

بۇل تۋرالى Infohub.kz اقپارات اگەنتتىگى حابارلايدى.

ءىس بويىنشا كۇدىكتىنىڭ ءىزى قالاي انىقتالدى؟

اتىراۋ وبلىستىق پوليسيا دەپارتامەنتى تەرگەۋ باسقارماسىنىڭ اسا ماڭىزدى ىستەر جونىندەگى اعا تەرگەۋشىسى تەمىرحان قاجىمۇراتوۆ سوتتا كۇدىكتىنىڭ ءىزى قالاي تابىلعانىن باياندادى. ونىڭ ايتۋىنشا، تەرگەۋ بارىسىندا 40-تان استام ادامنان جاۋاپ الىنعان. ولاردىڭ قاتارىندا مارقۇمداردىڭ تۋىستارى، كورشىلەرى جانە وقيعاعا قاتىستى اقپارات بەرە الاتىن ازاماتتار بولدى.

بانك شوتى مەن تاكسي جۇرگىزۋشىسىنىڭ جاۋابى

تەرگەۋشىنىڭ سوزىنشە، العاشقىدا ەرلى-زايىپتىلار ءىز-تۇسسىز جوعالعاندار رەتىندە تىركەلگەن. كەيىن پوليسيا ولاردىڭ بانك ەسەپشوتتارىن تەكسەرىپ، اقشا قوزعالىسىن، قاراجاتتىڭ قايدا جانە قاشان جۇمسالعانىن انىقتاۋعا كىرىسكەن.

«الدىمەن ەسەپشوتتار تەكسەرىلدى. اقشا ءتۇستى مە، قاي جەردە جۇمسالدى – ءبارى قارالدى. سول كەزدە كۇدىكتى سارسەمالييەۆتىڭ شوتىنا اقشا اۋدارىلىپ جۇرگەنى بەلگىلى بولدى. كەيىن اۋىلعا اپارىپ-اكەلگەن تاكسي جۇرگىزۋشىسى انىقتالدى. ول قاراشا ايىندا ەرلى-زايىپتى مەن بالاسىن جەتكىزگەن. قايتار جولدا ونىڭ جانىندا مەيرامگۇل مۇقانعالييەۆا دا بولعان»، – دەدى تەمىرحان قاجىمۇراتوۆ.

ءقازىر سوتتا قىلمىستىق ءىستىڭ بارلىق ءمان-جايى قارالىپ جاتىر. تەرگەۋ تاراپى بۇل ءىستى اسا اۋىر قىلمىس رەتىندە باعالاپ وتىر. ايىپتالۋشىعا قاتىستى تۇپكىلىكتى شەشىمدى سوت قابىلدايدى.