InfoHub Logo

جەتىساي اۋدانىنىڭ العاباس اۋىلىندا 38 جاستاعى ايگەرىم اجىكەيەۆانى ايۋاندىقپەن ولتىرگەن ءىس بويىنشا سوت ۇكىمى شىقتى. كورشىسى، 49 جاستاعى تورەحان ەرالحان 20 جىلعا باس بوستاندىعىنان ايىرىلدى.

قايعىلى وقيعا 20 قاڭتاردا باستالدى. ايگەرىم دۇكەنىنە تاۋار الۋعا شىعىپ، ورالماعان. اناسى مەيرامگۇل بەردالييەۆا دەرەۋ ىزدەۋگە كىرىسىپ، بۇرىن ەكى ادام ولتىرگەنى ءۇشىن سوتتالعان كورشىسىنە كۇدىك كەلتىرگەن. ول سول كۇنى ءوزىن اقتاپ شىققانىمەن، ەرتەسىندە جوعالىپ كەتكەن.

ەكى اپتادان كەيىن كۇدىكتىنىڭ تۋىسى پوليسياعا حابارلاسىپ، اۋلادا جەردەن مۇردەنىڭ قولى شىعىپ تۇرعانىن ايتقان. تەرگەۋشىلەر شوپپەن جابىلعان شۇڭقىردان جالاڭاش، ازاپتالعان دەنەنى تاپتى. «ءتۇرىن تانۋ مۇمكىن بولمادى – ءبارى ءىسىپ كەتكەن، دەنەسى كوگەرگەن، قولدارى تىلىنگەن. قىزىمدى جاي ولتىرمەي، قورلاعان»، – دەيدى اناسى.

وتباسى قىلمىسقا بىرنەشە ادام قاتىسقان دەپ سانايدى. كۋاگەرلەر ايگەرىمدى دۇكەن ماڭىندا ۇرەيلى كۇيدە، كۇدىكتىمەن جانە تاعى بىرنەشە ەر اداممەن بىرگە كورگەن. ءبىراق دۇكەننىڭ بەينەباقىلاۋ جازباسىن تۋىستارىنا ءالى كورسەتپەگەن.

تەرگەۋ بارىسىندا ەرالحان ون جىل بويى ايگەرىمنەن اقشا بوپسالاپ كەلگەنى، ءتىپتى نەسيە الدىرعانى انىقتالدى. جوعالعان كۇنى 420 مىڭ تەڭگەسى بولعان، ءبىراق دەنەسى تابىلعاندا نە اقشاسى، نە كيىمى بولماعان.

سوت شەشىمى شىققانىمەن، تۋىستارى 20 جىلدىق جازانى تىم جەڭىل دەپ باعالادى.