InfoHub Logo

ءاز جانىبەك حان، جيرەنشە ونىڭ باس ءۋازىرى، ءارى شەشەن، بىلگىر ادام بولعان. ولار 14-عاسىرلار شاماسىندا بولعان. وسى كەزدەگى كاسىبى تەڭىز جاعاسىنداعى استارحان قالاسىن سالدىرعان سول ءاز جانىبەك حان دەپ ايتادى. وزبەك حاننىڭ تۇقىمىنان بولۋى ءتيىس. جيرەنشە شەشەننىڭ اكەسىنىڭ اتى — كەڭەس، ايەلىنىڭ اتى قاراشاش ەكەن. كەڭەستىڭ ۇلى جيرەنشە مەنەن قۇزعىننىڭ ۇلى كوسە ەكەۋى ءبىر كىسىنىڭ قىزدارىنان تۋعان قارسى بولە ەكەن. جيرەنشە شەشەندىكپەنەن حانعا، حالىققا ءقادىرلى بولعان. ال قۇزعىننىڭ ۇلى كوسە وتە جىلدام قايىمشىل، تاپقىر كىسى بولعان. ءبىراق حان مەنەن جيرەنشەگە باعىتى قارسى، پىكىرى قوسىلمايتىن. قۋلىق پەن امال-ايلانىڭ نەشە ءتۇرلىسىن ويلاپ بىلەتىن. حان مەن ۋازىرگە دە بەلگىلى ساقتاناتىن ءقاۋىپتى ادامىنىڭ ءبىرى بولعان.

بىرنەشە جينالىس، ماجىلىستەردە حاننىڭ تارتىپتەرىنىڭ جيرەنشەنىڭ قاتەلىك، كەمىستىكتەرىن حالىق الدىندا دالەلدەپ كورسەتىپ، كوپكە قولايلى ۇسىنىستار ايتقاندىعىنان كوسەنى حان ورداسى قۋدالاپ، قولايسىز كورەتىن بولعان. ءاز جانىبەك حان حالىقتىڭ باسشىلارىن جيناپ، ءبىر ۇلكەن ءماجىلىس قۇرادى. ءبىراق كوسەگە قابار تيمەيدى. حاننىڭ جينالىسىن سىرتتان ەسىتكەن كوسە نە اڭگىمە، كەڭەس بولار ەكەن دەپ ەستۋگە ءوزى كەلەدى. كوسەنىڭ كەلگەن كەزىندە جيرەنشەگە ءاز جانىبەك حان ءبىر سۇراق بەرىپ، سونىڭ شەشۋىن سۇراپ جاتىر ەكەن. حان:

— وتىرىك پەن شىننىڭ اراسى قانداي، جيرەنشە شەشەنىم؟ — دەپتى.

جيرەنشە:

— وتىرىك ءسوز ورگە باسپايدى. شىندىققا شىق جۇقپايدى. وتىرىك پەن شىن ون قايناتسا، قوسىلمايدى. وتىرىك پەن شىننىڭ اراسى اسپان مەنەن جەردەي، — دەپتى.

سول كەزدە قۇزعىننىڭ ۇلى كوسە ورنىنان ۇشىپ تۇرەگەلىپ:

— تاقسىر، شەشەننىڭ جاۋابى شىندىققا جاتپايدى. وتىرىك پەن شىننىڭ اراسى اسپان مەن جەردەي الىس ەمەس، وتە جاقىن، تەك ءتورت-اق ەلى، — دەپ الاقانىن جايىپ، قۇلاق پەن كوزدىڭ اراسىن ولشەپ كورسەتىپتى. اراسى انىق ءتورت ەلى بولىپتى.

— وتىرىك پەن شىننىڭ اراسى اسپان مەن جەردەي ەمەس، ءتورت ەلى دەگەنىمنىڭ ءمانىسى—قۇلاق ەسىتكەن وتىرىك، كوز كورگەن شىن. قۇلاق پەن كوزدىڭ اراسى الىس ەمەس، تەك ءتورت ەلى. سوندىقتان وتىرىك پەن شىننىڭ اراسىن الىس دەگەن جاۋاپ دۇرىس ەمەس. تەك ءتورت ەلى،—دەپ كوسە ءسوزىن ماقۇلداتىپ، حاننان ات ءمىنىپ، شاپان كيىپتى.

---