InfoHub Logo

رەسەيدىڭ اركتيكاداعى ەڭ ءىرى ونەركاسىپتىك جوبالارىنىڭ ءبىرى – بايم كەنىن يگەرۋدەگى ميللياردتاعان دوللارلىق قۇپيالار اشىلۋدا. چۋكوتكاداعى بۇل جوبا بۇرىن قازاقستاندىق KAZ Minerals كومپانياسىمەن جانە ونىڭ نەگىزگى اكسيونەرلەرى ۆلاديمير كيم مەن ولەگ نوۆاچۋكپەن تىعىز بايلانىستى بولعان. سانكسيالارعا بايلانىستى جوبا رەسمي تۇردە رەسەيلىك قورعا وتكەنىمەن، تەرگەۋشىلەردىڭ ايتۋىنشا، ونىمەن بايلانىستى قازاقستاندىق ءىز ءالى دە جويىلماعان.

بۇل تۋرالى Infohub.kz اقپارات اگەنتتىگى حابارلايدى.

بايم كەن ورنى: قازاقستاندىقتاردىڭ ىزدەرى

بايم كەنىن يگەرۋ جوباسى چۋكوتكاداعى پەسچانكا كەن ورنىندا جۇزەگە اسىرىلۋدا. مۇندا مىس پەن التىن وندىرىلەدى. جوباعا جالپى قۇيىلعان ينۆەستيسيا كولەمى ءبىر تريلليون رۋبلدەن اسادى. العاشقىدا بۇل كەن ورنى رومان ابراموۆيچ پەن الەكساندر ابراموۆقا تيەسىلى بولعان. كەيىننەن جوبانى KAZ Minerals ساتىپ الدى.

الايدا، حالىقارالىق سانكسيالاردىڭ كۇشەيۋىنە بايلانىستى شەتەلدىك كومپانيالار ارقىلى رەسەيلىك اكتيۆتەردى يەلەنۋ قيىنداپ كەتتى. تەرگەۋشىلەردىڭ مالىمەتىنشە، الدىمەن بايم كەن ورنىنىڭ اكتيۆتەرى ۆلاديمير كيم مەن ولەگ نوۆاچۋكقا قاتىسى بار «Trianon Limited» اتتى قازاقستاندىق كومپانياعا اۋدارىلعان. ال 2024 جىلدىڭ كوكتەمىندە جوبا «پالميرا سيەۆەرا» اتتى رەسەيلىك جابىق قورعا بەرىلدى.

بايلانىستاردىڭ جالعاسى

رەسمي تۇردە بايم كەن ورنى بۇرىنعى قازاقستاندىق تىزبەكتەن تىكەلەي يەلىكتەن شىققانىمەن، «Arctida» ۇيىمىنىڭ تەرگەۋى بويىنشا، قازاقستاندىق بيزنەسمەندەرمەن بايلانىستار مەردىگەرلەر مەن دەلدالدار ارقىلى ساقتالىپ قالۋى مۇمكىن. مىسالى، كەن ورنىنىڭ باسقارۋىمەن جانە قۇرىلىسىمەن اينالىسقان «ۆەگا رازۆيتيە» ج ش س 2024-2025 جىلدارى «گدك بايمسكايا» جشس-نان 10 ميلليارد رۋبلدەن استام قاراجات العان. بۇل اقشانىڭ 2،5 ميلليارد ءرۋبلى كەيىن باا-دە تىركەلگەن «Odin Consulting FZE» كومپانياسىنا اگەنتتىك كەلىسىمشارت بويىنشا اۋدارىلعان.

تەرگەۋشىلەردىڭ دەرەگىنشە، «ۆەگا رازۆيتيە» كومپانياسىنىڭ قۇرىلتايشىسى دۋبايداعى «Nord Rim DMCC» بولعان. «Arctida» بۇل كومپانيانى ۆلاديمير كيمنىڭ باسقاراتىن Bank RBK ارقىلى بايلانىستىرادى. رەداكسيامىز Kompra.kz ارقىلى جۇرگىزگەن تەكسەرۋىمىز «Trianon Limited» كومپانياسىنىڭ قۇرىلتايشىلارى قاتارىندا ۆلاديمير كيم مەن ولەگ نوۆاچۋكتىڭ بار ەكەنىن راستادى. سونداي-اق، قازاقستان قور بيرجاسىنداعى Bank RBK حولدينگىنىڭ اففيليرلەنگەن تۇلعالارى تىزىمىندە «Trianon Limited» مەن «Nord Rim DMCC» كومپانيالارىنىڭ بار ەكەنى انىقتالدى.

جاڭا ەسىمدەر، ەسكى بايلانىستار

«Arctida» ۇيىمىنىڭ نۇسقاسى بويىنشا، تاعى ءبىر بايلانىس جەلىسى چۋكوتكادا تاۋ-كەن جوبالارىنا ينفراقۇرىلىم سالۋمەن اينالىساتىن «سيەۆەرنىە ينجەنەرنىە رەشەنيا» جشس-نا اپارادى. بۇل كومپانيانىڭ قۇرىلتايشىسى «Nomad Construction Limited» بولىپ تابىلادى. Kompra.kz سايتىنىڭ مالىمەتىنشە، بۇل كومپانيامەن قازاقستاندىق تاعى ءبىر بيزنەسمەن – الەن بايگازين بايلانىستى. «Arctida» ۇيىمى ونى ولەگ نوۆاچۋكتىڭ بيزنەس سەرىكتەسى رەتىندە كورسەتەدى.

الەن بايگازيننىڭ ەسىمى بۇعان دەيىن دە Orda.kz ماتەريالدارىندا كەزدەسكەن. بۇعان دەيىن ءبىز ونىڭ جەتىسۋ وبلىسىنداعى كوكسۋ وزەنىندەگى سەس قۇرىلىسى جوباسىمەن بايلانىسىن جازعان بولاتىنبىز. بايگازين سونداي-اق شىعىس قازاقستانداعى «التاي» تەحنوپاركىنە قاتىستى داۋعا دا ىلىككەن ەدى.

«Arctida» ۇيىمىنىڭ تەرگەۋى مەن ءبىزدىڭ رەداكسيامىزدىڭ تەكسەرۋى كورسەتكەندەي، جوبا رەسمي تۇردە رەسەيلىك جابىق قورعا وتكەنىمەن، ونىڭ اينالاسىندا قازاقستاندىق بيزنەسمەندەرمەن جانە ولاردىڭ سەرىكتەستەرىمەن بايلانىستى مەردىگەرلەر، دەلدالدار مەن كومپانيالار ءالى دە بار.

بۇعان دەيىن Orda.kz سايتى بايم جوباسىنىڭ ۆلاديمير كيمنىڭ اينالاسىنداعىلارمەن بايلانىسى تۋرالى جازعان بولاتىن. سول جاريالانىمداردا كيمنىڭ نۇرسۇلتان نازاربايەۆتىڭ سەنىمدى تۇلعاسى جانە «ءاميانى» رەتىندە بىرنەشە رەت اتالعانى دا ايتىلعان ەدى.