informburo.kz
شىمكەنت مەتاللۋرگيا زاۋىتىنىڭ ادۆوكاتتارى رەيدەرلىك شابۋىل بەلگىلەرى بارىن مالىمدەدى
شىمكەنت مەتاللۋرگيا زاۋىتىنىڭ باسشىلىعى پوليسيانىڭ ارەكەتىنە قاتىستى جاڭا مالىمدەمە جاساپ، زاۋىتقا جاسالعان زاڭسىز رەيدتىڭ ۇيىمداستىرۋشىلارى ءالى جازالانباعانىن ايتتى. بۇل تۋرالى كومپانيانىڭ باسپا ءسوز قىزمەتى حابارلادى.
بۇعان دەيىن Sin YuanSteel كومپانياسى شىمكەنت پوليسياسىنىڭ ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى سوت سانكسياسىنسىز زاۋىت اۋماعىنا كىرگەنىن مالىمدەگەن بولاتىن. قۇقىق قورعاۋ ورگاندارى وزبەكستاننان بەلگىسىز بىرەۋدىڭ حابارلاپ، كاسىپورىن اۋماعىندا قىتايدان كەلگەن ەڭبەك ميگرانتتارىن كۇشپەن ۇستاپ وتىرعانى تۋرالى اقپارات بەرگەنىن العا تارتقان. الايدا، توو كومپانياسى قازاقستاندا زاڭدى تۇردە تۇرۋعا بارلىق رۇقساتى بار ونداعان قىزمەتكەرىنىڭ زاڭسىز ۇستالعانىن ايتقان ەدى.
بۇل مالىمدەمەگە باس پروكۋراتۋرا رەاكسيا ءبىلدىرىپ، ينۆەستيسيالىق پروكۋرورلار سوتقا دەيىنگى تەرگەۋدى باستادى.
Sin YuanSteel كومپانياسىنىڭ باسشىلىعى جاڭا مالىمدەمەسىندە ۇستالعان قىزمەتكەرلەردىڭ بوساتىلعانىن، ءبىراق زاڭسىز رەيدتى ۇيىمداستىرعانداردىڭ جاۋاپسىز قالعانىن اتاپ ءوتتى.
«باس پروكۋراتۋرانىڭ ۋاقتىلى ۇيلەستىرۋىنىڭ ارقاسىندا زاڭسىز ۇستالعان قىزمەتكەرلەرىمىز بوساتىلىپ، تاركىلەنگەن ءتولقۇجاتتارىمىز قايتارىلدى. بۇل ءبىزدىڭ قىزمەتكەرلەرىمىزدىڭ قۇقىقتارىن تولىق قورعادى، وسى ءۇشىن العىسىمىزدى بىلدىرەمىز. الايدا، وقيعانىڭ نەگىزگى سەبەپتەرى ءالى دە اشىلماعان جانە كىنالى تۇلعالار جاۋاپقا تارتىلماعان»، - دەدى Sin YuanSteel كومپانياسىنىڭ تەڭ قۇرىلتايشىسى كە سيۋيۋن.
ونىڭ ايتۋىنشا، پوليسيانىڭ ارەكەتى سالدارىنان وندىرىستىك ۇدەرىس توقتاپ، كومپانياعا ايتارلىقتاي شىعىن كەلگەن. ۇستالعانداردىڭ اراسىندا 30 ميلليون دوللارعا جۋىق ينۆەستيسيا سالۋدى جوسپارلاعان ەكى الەۋەتتى سەرىكتەس بولعان.
«پوليسيانىڭ ارەكەتىنەن تىكەلەي ەكونوميكالىق شىعىنىمىز 200 مىڭ دوللاردى قۇرادى، جاناما شىعىن 500 مىڭ دوللارعا جەتتى. سونىمەن قاتار، مەملەكەت 200 مىڭ دوللار كولەمىندە سالىق كىرىسىنەن قاعىلدى. بۇل كاسىپورىننىڭ دامۋىنا جانە جەرگىلىكتى ەكونوميكاعا ەلەۋلى زيان كەلتىردى»، - دەدى كە سيۋيۋن.
زاۋىت باسشىلىعى باس پروكۋروردىڭ نازارىن بۇل جاعدايعا اۋدارۋدى سۇراپ، زاڭسىز رەيدتىڭ باستاماشىلارى مەن ۇيىمداستىرۋشىلارىن انىقتاپ، قىزمەت بابىن تەرىس پايدالانعان تۇلعالاردى جاۋاپقا تارتۋدى تالاپ ەتتى.
«ق ر قىلمىستىق كودەكسىنىڭ 362-بابى، ياعني «قاتىگەزدىك نەمەسە قىزمەتتىك وكىلەتتىكتى اسىرا پايدالانۋ» بويىنشا قىلمىستىق ءىس تىركەلدى. بۇل جاي عانا قاتەلىك ەمەس، كاسىپورىندى رەيدەرلىك جولمەن باسىپ الۋعا باعىتتالعان ارەكەت نەمەسە ودان دا تەرەڭ ماقساتتار كوزدەلگەن بولۋى مۇمكىن دەپ سانايمىز. زاڭنامادا قاراستىرىلعانداي، تولىققاندى تەرگەۋ جۇرگىزىلۋىن تالاپ ەتەمىز»، - دەدى ادۆوكات مارات بايزاقوۆ.
ول كومپانيانىڭ قىزمەتىنىڭ اشىقتىعىن جانە بارلىق سالىق تەكسەرۋلەرىنەن ءوتىپ جاتقانىن اتاپ ءوتتى.
Sin YuanSteel – قازاقستاندىق-قىتايلىق بولات قۇيۋ زاۋىتى. كومپانيا 2016 جىلى اشىلعان. وندىرىستىك كەشەن «امير-ا» ج ش س بازاسىندا «وڭتۇستىك» يندۋستريالدى ايماعىندا قۇرىلعان.
-
رەسەيدىڭ سانكسياعا ىلىككەن ءىرى جوباسىنىڭ ارتىندا كىمدەر تۇر؟ "Arctida" ۇيىمىنىڭ تەرگەۋى قازاقستاندىق بيزنەسمەندەردىڭ بايم كەن ورنىنا قاتىسىن انىقتادى.
-
كەڭەس وداعىنىڭ باتىرى ءاليا مولداعۇلوۆانىڭ بالا كۇنگى دوسىنا جازعان، بۇرىن بەيمالىم بولىپ كەلگەن حاتى اقتوبەدەگى مەموريالدىق مۋزەي قورىنان تابىلدى. حاتتا باتىر قىزدىڭ مايدانعا اتتانار الدىنداعى ويلارى مەن تاباندىلىعى باياندالادى.
