InfoHub Logo

استاناداعى مەرەكەلىك كونسەرتتە بروندالعان كولىكتىڭ ءورت ءسوندىرۋ جۇيەسىنىڭ كەنەتتەن ىسكە قوسىلۋى جۇرتشىلىقتىڭ نازارىن اۋداردى. الەۋمەتتىك جەلىدە تاراعان ۆيدەودا كولىكتىڭ استىنان ءتۇتىن شىعىپ، كەيىن ءورت سوندىرگىش كوبىك اتىلعانى بايقالادى. بۇل جاعداي كوپشىلىكتىڭ الاڭداۋشىلىعىن تۋدىرىپ، كولىككە نە بولعانى تۋرالى سۇراقتار تۋىنداتتى.

بۇل تۋرالى Infohub.kz اقپارات اگەنتتىگى حابارلايدى.

وقيعانىڭ ءمان-جايى

7 مامىردا استانادا وتان قورعاۋشىلار كۇنىنە ارنالعان سالتاناتتى شارا ءوتتى. قازاق ەلى الاڭىندا مەملەكەتتىك ورگانداردىڭ ۇزدىك ساربازدارى مەن اسكەري وركەسترلەر ونەر كورسەتتى. سونداي-اق، قوناقتار ءۇشىن زاماناۋي اسكەري تەحنيكالار مەن قارۋ-جاراقتار كورمەسى ۇيىمداستىرىلدى. وسى شارا بارىسىندا بروندالعان كولىكتىڭ ىستەن شىققانى تۋرالى اقپارات تارادى.

مەملەكەتتىك كۇزەت قىزمەتىنىڭ جاۋابى

قازاقستان رەسپۋبليكاسىنىڭ مەملەكەتتىك كۇزەت قىزمەتى Instagram پاراقشاسىندا بۇل جاعدايعا قاتىستى رەسمي مالىمدەمە جاسادى. ۆەدومستۆونىڭ حابارلاۋىنشا، ۆيدەودا كورىنگەن جاعداي تەحنيكانىڭ ورتكە قارسى قاۋىپسىزدىك جۇيەسىنىڭ ىسكە قوسىلۋىنان بولعان.

««الان» بروندالعان ماشيناسىنىڭ بورتىندا بولعان بالالاردىڭ ءبىرى كەزدەيسوق اۆاريالىق ءورت ءسوندىرۋ جۇيەسىنىڭ ىسكە قوسقىشىن باسىپ قالدى»، - دەپ ءتۇسىندىردى قىزمەت وكىلدەرى.

مەملەكەتتىك كۇزەت قىزمەتىنىڭ مالىمەتىنشە، بۇل وقيعا كولىكتىڭ قوزعالتقىشى مەن ەلەكتر سىمدارىن ورتتەن قورعايتىن جۇيەنىڭ قالىپتى جۇمىس ىستەۋىنە اكەلگەن. بۇل جۇيە اۆتوماتتى تۇردە جۇمىس ىستەيدى جانە تەحنيكانىڭ ەنەرگيامەن جابدىقتاۋ جۇيەسى ءوشىرۋلى بولسا دا، ىسكە قوسىلۋى مۇمكىن.

«ءورت سوندىرگىش زاتتىڭ شىعارىلۋى تەحنيكانىڭ ىستەن شىققانىن بىلدىرمەيدى»، - دەپ اتاپ ءوتتى ۆەدومستۆو.

ەستەرىڭىزگە سالا كەتەيىك، 9 مامىردا قازاقستان جەڭىس كۇنىن اتاپ وتەدى. ەل بويىنشا مەرەكەلىك شارالار ءوتىپ جاتىر.