InfoHub Logo

شيەلەنىسكە بايلانىستى: قاتتى اۋىرمايتىن، ءبىراق ۇزاققا سوزىلاتىن اۋرۋ. ەشقانداي شانشۋ دا بولمايدى. باس نەمەسە مويىن اينالاسىندا تۇيىندەلىپ قالعان سەزىم بولادى. جەتكىلىكسىز ۇيقى، دەپرەسسيا جانە سترەسس ەڭ باستى سەبەپتەرى.

ميگرەن (باس ساقيناسى): قاتتى اۋىرتاتىن جانە شانشيتىن باس اۋرۋى. كوبىنەسە كوزدىڭ ارتىندا سەزىلەدى. جارىققا جانە داۋىستارعا قارسى تىتىركەنۋ، لوقسۋ جانە جۇرەك اينۋى بولادى. سەبەپتەرى مەزگىلسىز تاماقتانۋ جانە گورموندى دارى-دارمەكتەر.

سولقىلداۋ: وتە قاتتى اۋىرتادى. كوبىنەسە ءبىر كوز اينالاسىندا نەمەسە ارتىندا سەزىلەدى. مۇرىننىڭ بىتەلۋى، كوزدىڭ جاساۋراۋىمەن بىرگە بولۋى مۇمكىن. اۋرۋى كوبىنەسە ۇيقى كەزىندە كەلەدى. ءسپيرتتى ىشىمدىكتەر جانە تەمەكى مۇنىڭ ەڭ باستى سەبەپتەرى.

گايموريتكە بايلانىستى: اۋىرتپالى جانە تۇراقتى. مۇرىننان توقتاماي سۋ اعادى. اۋىرعانى مۇرىن ۇستىنەن باستاپ، ماڭدايعا جانە قۇلاققا دەيىن جايىلادى. سەبەپتەرى گايموريت ينفەكسياسى جانە مۇرىننىڭ بىتەلۋى.

اللەرگياعا بايلانىستى: تاناۋلاردىڭ بىتەلۋى، كوزدەردىڭ جاساۋراۋى، قىشىتپا جانە باستىڭ شانشۋى بەلگىلەرىنەن بايقالادى. گۇل توزاڭى، زەڭ (زاك، كوگەرۋ) جانە شاڭ اۋرۋعا سەبەپ بولادى.

كوفەينگە بايلانىستى: شانشىتىپ اۋىرتادى جانە شامادان ارتىق كوفەين تۇتىنۋدان تۋىندايدى.

شارشاۋعا بايلانىستى: اۋرۋ، بەلگىلى ءبىر جەردىڭ اۋىرعانىمەن شەكتەۋلى ەمەس. شارشاتاتىن فيزيكالىق قوزعالىستار، تۇشكىرۋ، جوتەلۋ، ىسىك، ميگرەنمەن بىرگە كورىنۋى مۇمكىن.

سۇيەك ارالارى: باستا قىسىم جانە قىسىلۋ سەزىمى. جاقتىڭ اۋرىپ شىتىرلاۋى ارقىلى بەلگىسىن كورسەتەدى. جاقتاعى كەلەڭسىزدىك جانە سترەسس بۇعان باستى سەبەپ.

ريەۆماتيزم: مويىندا نەمەسە باستىڭ ارتقى جاعىندا، قيمىلداعاندا ارتاتىن اۋرۋلار. تۇز جينالۋىنان جانە سۋىقتان بولادى.

كوزدىڭ شارشاۋى: كوز اينالاسىنداعى اۋرۋ سەزىمى. كورۋدىڭ ناشارلاۋى جانە استيگمات اۋرۋدىڭ سەبەپتەرى.

كوزىلدىرىكتىڭ سايكەس كەلمەۋىنەن دە باس اۋىرادى. ەمى: كوز دارىگەرىنە قارانىپ، كوزىلدىرىكتى اۋىستىرۋ كەرەك.

جاقپايتىن تاماق جەسە دە باس اۋىرۋى مۇمكىن. ەمى: اسقازاندى تازارتسا، باستىڭ اۋرۋى قويادى.

قانازدىقتان دا باس اۋرۋى تۋىندايدى. بەلگىلەرى: باس اۋىرادى، كوزدىڭ قاراشىعى ۇلعايىپ، ماڭداي مۇزداپ، تامىردىڭ سوعۋى السىرەيدى. ەمى: باسىڭىزدى ورامالمەن قاتتى تاڭىپ، تەگىس جەردە شالقاڭىزدان جاتىپ ءبىر ءسات دەمالىڭىز. كەيىن كوفە نەمەسە شاي ءىشىڭىز.

وي ەڭبەگىمەن اينالىساتىن ادامدار كۇنىنە ءبىر مەزگىل تازا اۋادا سەرۋەندەۋدى ۇمىتىپ، كۇنى-تۇنى قاعازدان باس الماعان كەزدەرى باسى اۋىرادى. ەمى: ا) لەگەنگە ىستىق سۋ قۇيىپ، 10-15 مينۋت اياقتى تولارساققا دەيىن مالىپ وتىرىڭىز؛ ءا) ءبىر شاي قاسىق جالبىز ءشوبىن 1 كەسە قايناعان سۋعا تۇندىرىپ ءىشىڭىز، كەيىن دەمالىڭىز؛ ب) وي ەڭبەگىنەن شارشاپ جۇرگەن ادامداردىڭ بالىق جەگەنى ابزال.

باس اۋرۋىنا باس ساقيناسى، جەلكە جانە جۇيكە نيەۆرالگياسى دا سەبەپشى بولادى. بۇل اۋرۋلار نەگىزىنەن جۇيكەنىڭ جۇقارۋىنان - السىزدىكتەن تۋىندايدى. بەلگىسى: باسى اۋىرادى، اشۋشاڭ بولادى، ياعني سىركەسى سۋ كوتەرمەيدى. ەمى: ا) مازاسىز ويلاردان ارىلىپ، جاقسىلاپ تىنىعۋ كەرەك؛ ءا) شاي ءىشۋ قاجەت؛ ب) جۇمىرتقانى شيكىلەي كەسەگە جارىپ، ۇستىنە قايناعان سۋ قۇيىپ ابدەن ارالاستىرىڭىز، وسىنداي قوسپانى كۇندە از-ازدان ىشسەڭىز، جۇيكە اۋرۋىنان قۇتىلاسىز.

جۇيكەنىڭ جۇقارۋى (نيەۆراستەنيا، نيەۆروز) - بۇل اۋرۋ مۇعالىمدەردە ءجيى كەزدەسەدى، ياعني بۇنى ۋستازداردىڭ كاسىبي اۋرۋى دەسە دە بولادى. ەمى: ا) كۇندە 1 اس قاسىقتان بال جەۋ كەرەك؛ ءا) كيىكوتى، قالاقاي ت.ب. دارىلىك وسىمدىكتەرمەن ەمدەلۋ كەرەك؛ ب) ماڭدايعا جۇقالاپ كەسىلگەن شيكى كارتوپتى تاڭىپ قويىڭىز؛ ۆ) تاڭەرتەڭگىلىك اش قارىنعا ايران ىشكەن - باس اۋرۋدىڭ مىڭ دا ءبىر ەمى؛ گ) باسىڭىز اۋىرعان كەزدە قوس قولىڭىزدى شىنتاقپەن قوسا ىستىق سۋعا مالىپ وتىرساڭىز، باسىڭىزدىڭ اۋىرعانى قويادى. ىدىستاعى سۋ سالقىنداپ بارا جاتسا، ىستىق سۋمەن ارالاستىرىپ، تەمپەراتۋراسىن ءبىر قالىپتا ۇستاڭىز.

قان تاسپاسى (گيپەرتونيا)، اتەروسكلەروز اۋرۋىنا شالدىققاندا كارديولوگ، تەراپيەۆت دارىگەرلەرگە، ينسۋلتقا شالدىققاندا نيەۆروپاتولوگ دارىگەرگە، ال ميىڭىزدا قاتەرلى ىسىك نە بىتەۋ جارا بارى انىقتالسا، نەيروحيرۋرگ دارىگەرگە  قارالىپ، تەكسەرىلىپ ارنايى ەم العان ءجون. كەكشيمە، ياعني مەڭ-زەڭ ەتكەن مەنينگيت اۋرۋىنا شالدىققان جاعدايدا ينفەكسيونيست دارىگەرگە بارىپ، ەم العان دۇرىس.

---